戀上你的溫柔: 第二章
第二日既朝早 肥賢一早打電話比叫我去食早餐 就當去吐下苦水啦
我地約左係學校隔離間麥當勞到食 我到果陣佢同少均已經食緊
我買完個餐坐低後就開始講
我:[唉 琴日Miss陳叫我多啲搵張若情]
少均:[搵佢做咩？]
我:[Miss怕我跟唔上 所以咪叫我搵佢問下書咁囉]
肥賢咬住個豬柳蛋講:[呢個張若情本身好似唔係咁 佢以前都算一個唔讀書既學生 中規中矩 但佢好似中三果陣屋企發生左啲事 之後佢就發奮讀書]
我:[咁佢認真讀書之前都係冇朋友嫁咩]
少均:[你知咁多做咩呀 食你個早餐啦 就遲到啦]
我死死地氣咁食埋剩底既野 同時個心係到諗緊呢一個怪女仔既過去係發生咩事先令到佢咁
小息果陣時 雪雪因為阿波食左佢個蛋糕 所以雪雪嬲到一本書打落阿波個頭到 幸好彩班上面既女同學都拉住左雪雪 如果唔係發生命案都似
亦因為咁阿雪今日lunch唔同我地食 所以得我地4個男仔係到hehehehe
食食下飯 阿波突然講左句足以震驚13億人既說話
阿波:[其實我鍾意阿雪呀 我今日食左佢個蛋糕都係想同佢親近啲 點知佢嬲左我]
佢講完之後 面上帶著一份失落
我未試過拍拖 又點會明白阿波講既野
肥賢:[喂 放學不如去打波 陪你散下心囉]
我同少均點頭示好 都好既 平時都冇點做過運動 就當去挽下啦
放學之後 我地4個去到學校附近既獅子會球場 4個係半場2打2
老實講 我對籃球真係一竅不通 但為左陪阿波 唔識打都要打下既
打左一個鐘左右 天都開始黑 阿波同少均去左買野飲 得返我同肥賢係球場坐
肥賢同我講
[阿波呢個傻仔 鍾意阿雪又唔識表達 但成日又想同阿雪拉近距離]
我:[咁點解阿波佢唔同阿雪表白]
肥賢:[佢擔心表完白之後連朋友都做唔到]
我:[咁點解佢鍾意阿雪既]
肥賢:[有一次 佢唔舒服冇返學 加上佢父母長期唔係香港 所以屋企得佢一個 佢果日發高燒 係阿雪放學走去陪佢睇醫生 ]
我:[唔怪得阿波鍾意左人啦 不過比我都會感動到]
肥賢:[係阿波冇乜表示啫 所以如果佢肯追既 應該會追到既]
講講下佢地都返左來 飲完野 我就自己走去廁所洗手
突然有把女聲岀現
[係咪好肚餓呀 我帶左野食來呀 快啲食呀]
我行去個花圃後面 見到有個著住我地校服既女仔係到餵緊幾隻流浪狗食野
但我睇唔到佢個樣 不過呢個女仔都幾有愛心呀
有隻狗見我行過來 佢慢慢咁退後 個女仔擰轉頭
我嚇到行後左兩步 係我眼前咁有愛心既女仔 竟然係張若情
其實真係好難接受 一個咁奇怪既人竟然咁有愛心
雖然我個反應好似誇張左 但我諗返起少均今朝講既野
[佢屋企發生左啲事所以先咁]
或者佢都唔係好怪啫 可能只係冇人了解佢所以先令人覺得佢奇怪啫 不如試下同佢做朋友
我帶住呢個心態講
[Hi 係到餵狗呀？]
講完之後我都覺得尷尬 OMG 呢個咩問題來 之後佢企左起身 行近我講左句
[你件衫冇攝好]
講完之後佢又攞左張黃紙岀來
我笑住講:[現家都放學啦 你仲有帶係身既]
張若情:[拎住]
我攞左張黃紙之後同佢講
[我叫張天翔呀]
佢冇答我 頭也不回咁走左
我洗完手 返去搵肥賢佢地 拎埋書包之後就各自散
返緊屋企果陣係到諗 雖然佢好怪 可以放左學都管住人 冇乜朋友 不過佢都幾有愛心呀 邊會有人真係會餵流浪狗
都無謂諗咁多啦 想做就做 下次地理堂試下同佢傾計先