戀上你的溫柔: 第四章

第四章 

[其實上次多謝你呀]

[唔得唔得咁樣唔好]

[呀 點先可以有啲誠意]

一個少女係自己屋企廁所對住塊鏡 練習應該點樣向少年道謝



你地好 我叫張若情 我係學校係一個成績比較好既人 亦係一個領袖生 不過我比較獨來獨往 但其實我並唔鍾意自己一個

就因為我成績好 所以比人既感覺 就係一個學霸 而係人地眼中 學霸係唔需要朋友 學霸既朋友就只係教科書 

而且因為我係領袖生 領袖生既責任就係當同學犯校規 我就有責任去警告佢地 甚至捉佢地去見訓導主任 

其實我唔想做學霸同領袖生 我都想做一個普通高中生 可以同一班同學放學去商場行 食飯時唔需要自己一個坐係小食部 望住其他人有講有笑

中四開學既第一日 我已經派左第一張既黃紙 



我:[呢位同學 你衣衫不整]

講完之後 我拎左張黃紙比佢 

男:[我現家攝返得唔得]

我:[唔得]

我轉身離開果陣 聽到佢地幾個既笑聲 我諗佢地應該恥笑緊我 唔緊要啦 已經習慣 



不過岩岩個男仔係邊個呢 我認得後面四個係隔離班既同學 但我對岩岩個男仔真係一啲印象都冇

中四第一次既地理堂 同我想像中一樣 冇人坐我隔離 

過左一陣 門口企左個熟悉既身影 原來係岩岩比我捉儀容不整既男同學

我諗佢應該知我係一個咩人 就算唔知佢啲朋友都話左比佢知 

既然我都冇朋友 得罪多個又有咩所謂 放學果陣 Miss仲叫我得閒幫下佢跟進度

不過我諗佢寧願自習都唔會問我

有一日放學 我一如既往去買野食比公園既狗仔 佢地食食下突然行後左 我擰轉頭 係琴日比我捉果個男仔 

佢啲衫又冇攝好 於是我又比左張黃紙佢 



佢收左之後同我講 [我叫張天翔呀]

我冇理佢就走左 哈 呢個人怪怪地 比張黃紙佢仲係到介紹自己

呢一個月 張天翔都係地理堂係咁撩我傾計 不過除左關於地理科既都冇答過佢 

有一日 我因為冇食到早餐 所以個胃勁痛 所以我伏左係枱到 打算等小息完左再返班房 

之後張天翔拍我 問我做咩事 講完之後佢就衝左岀課室 我就繼續伏係枱到 伏左一陣 佢又返來拍我 不過呢次佢手上有個三文治同一包朱古力奶 

佢叫我食左個早餐 仲企左係課室門口幫我留意有冇老師 

雖然我係一個領袖生 知道係課室食野係犯校規 但我真係冇理咁多 呢個三文治同朱古力奶 係我第一次感受到溫暖



小息打鐘之後 我未向佢道謝佢就已經走左 食完個早餐之後 我冇岩岩咁辛苦 真係好多謝佢

放學之後 我都有去公園餵狗狗 點解佢地食緊野既 平時都冇人餵佢地嫁 

原來果個人係張天翔 佢係因為我今朝唔舒服 所以過來幫我餵狗狗

我企左係到發呆 乜佢唔討厭我咩 佢企左起身 係佢走之前 我問左佢一句 
[我地係咪朋友]

[你覺得呢 夜啦 早啲返屋企啦]

我從來都未聽過呢句說話 好彩佢轉身走左 如果唔係佢一定見到我面紅 

多謝你 令我感受到有朋友關心既感覺