「呼....呼....」 

滿身傷痕的我帶著Marla一路狂奔, 

「我會拖住佢時間,你趁機會就快d走!」


「.....Peter!」






話未說完,就已經被追上,受了傷的我無力反抗,被壓在地上,他用束帶綁著我雙手,向後用力一扯,隨後是清脆的一聲,


啪喀!


整條手臂都給他扯斷了,我甚至能看到自己手臂連接肩膀的骨頭和神經線,我痛不欲生,雙眼開始逐漸模糊。


明明剛才仍是相安無事,為甚麼會發展成這樣......






.....
....
........
................


「係喎,話時話你ies係咩題目?我個陣求其做份問卷唔記得咗。」


「吓!?你個衰人吖!我唔會話你知架!」






「咁最後有幾多人幫你做?」


「阿爸,阿媽,你,同埋.....好似冇。」


「原來都冇人肯幫你做架?」


「係呀...我仲諗住返學時間多啲人流添....」


「個個都趕返學,邊得閒幫你!」






「唔係呀,你咪肯幫我做囉。」


她對著我露出一個滿足的笑容,就像陽光般燦爛,為她白裡透紅的肌膚再添一分姿色。


此刻我覺得當時為了她而遲到,



賺了!


走著走著,我們到了一棟宏偉巨型的鐘樓面前。






「Peter,你睇下呢棟野,上面有隻眼係到咁怪嘅,佢好似係咁望住我地咁,好得意呀!」


「你就覺得得意,呢個地方充滿我嘅痛苦回憶.....」我不知在躲在這裡被哥哥發現多少遍,回想到也起了一身雞皮疙瘩。


「你講緊咩呀?」


「冇,我成日都自言自語。」


「但你個樣咁驚咁嘅。」






反正都是我的夢,不如....我緊閉著眼睛,一把牽著了她的手。


「你.....你,你,你....」Marla似乎被這個舉動嚇呆了。


若不是在夢,斷我也做不出這種大膽行徑,我慢慢張開眼睛,看見Marla滿臉通紅,並眼泛淚光,鼓起泡腮。


「對...,對,對唔住呀!」我立即鬆開手。


「唔...唔緊要嘅,如果你係驚嘅話。」說罷,Marla主動把我的手牽著。






就這樣,我們牽著手,靜靜地看這鐘樓。


「嗚吽吽!嗚吽吽!嗚吽吽!!」鐘樓突然瞳孔擴張,並發出奇怪的哮叫聲。


我們把耳朵掩著希望蓋過那刺耳的叫聲,正當把集中力都放在鐘樓時,背後有一條用來固定貨物的束帶勒住我的頸部,我即時用手肘向後揮擊。


「噗!」那人的腹部被我擊中,馬上鬆開了束帶。


仔細一看, 「你係.....!」


是那個......!那個.....叫甚麼來著..... 總之是那個有不良嗜好的同事!


「我係叫阿明呀!!」


「喔!!!道友明!!」


他二話不說又衝上來用束帶攻擊我,


「Marla!企係我後面!」我把雙臂形成一個交叉動作去抵擋他的鞭擊。


我回頭偷看了一眼Marla是否見得到我的英姿,才發現她一早已經跑到老遠去了,
 這女人......


「似乎你好緊張個女仔。」導友明邊說邊流下令人作嘔的口水絲。


「唔好對佢郁手!」


導友明向著Marla的方向直奔,我也即時把他拉著,攻擊他的腳部,令他失去平衡跌倒。


我再拖著Marla一路狂奔........


「我會拖住佢時間,你趁機會就快d走!」


想不到這句,就是我今晚的遺言。


打開眼,我馬上檢查雙手是否仍然健在,幸好....


只是一場惡夢。


我看一看時鐘,凌晨5時正。


不知夢中的Marla最後有沒有事....雖然是夢,但我也不想她受到傷害,尤其是想起道友明那張口水直流的臉....


「係喎,仲要幫Gary做埋啲卷,差小小就唔記得。」我用1個多小時就完成了,雖然有一半是亂做的....


嗶嗶嗶嗶,嗶嗶嗶嗶...


剛好我的鬧鐘響起,梳洗過後,我便回到客廳準備吃早餐。


「喂!你琴晚係咪又著住校服瞓教呀?叫咗你唔好咁懶架啦,讀書又係咁,做人又係咁!」


我馬上從書包拿出那份有86分的數學卷給老媽看,她沉默了十多秒,然後語重心長地搭著我肩膀說, 

「阿仔,雖然我地唔係咩名門貴族,但我由細到大都教你要誠實,點解你要出貓?」


「唉,你覺得係就係啦。」我推開了她的手。


我是沒有溫習,不過我也沒有作弊,想不到老媽會如此不信任我。


「Peter,呢幾年你嘅成績都未試過咁好,你呃到人呃唔到你呀媽架。」


我的數學成績的確是無緣無故變好,一時之間也想不到該如何回答。


此時我的電話響起,


「喂?」


「喂,係咪Peter呀?」


「係呀,咩事?」


「老細叫我通知你,你今晚唔使返工喇,正確啲講應該係之後都唔使返。」


「吓,點解咁突.....」


話未說完,對方就已經掛了線,那聲音好像是道友明的聲音....


可是為甚麼我會被裁員,明明沒遲到早退,對工作又認真負責。反而道友明經常睡眼惺忪,又借故裝病請假,應該是他被裁員的呀。


最近奇怪的事情真多。


「唉,返完學先再算。」


我回到課室,Gary還在繼續他的罰抄,


「喂你仲未抄完咩?」


「緊係未啦,成本書咁厚,我抄咗成晚通宵都未抄完呀!」


「吓,有冇咁多呀,《論語》喎。」


「咩《論語》呀?唔係《三國誌》咩?孔明吖嘛?我差幾次就抄完架喇!」


「頂你呀!係孔子,唔係孔明呀!今次又畀你累死啦!」


信賴Gary是一個最弱智的選擇。


「咁我個十份pastpaper呢?」Gary問。


「做好哂啦我......」不過有一半是亂做的,幸好沒有認真做,要不然就便宜了這個弱智。


到了放中午飯的時間,一如以往,我打算隨便在小食部解決就算,但不幸地,剛好碰上了Gary。


「Peter哥,不如一齊出去食?冇人肯同我食炸雞呀!」


「我...我都唔想食喎。」


顯然我的拒絕是沒有用的,我仍然被Gary帶了出校外,我們到了炸雞店的門外,正準備排隊點餐,


「Peter!!太好喇,你平安無事!!」


一名女孩飛樸過來抱著我,差點就失平衡倒下。


嗯....?這是橘子味....?


「你係.....Marla?」


「係呀,你...記唔記得我地琴晚做過嘅事?」


在旁的Gary聽到這句之後像是中了邪,捉住我瘋狂追問, 

「個女仔係邊個嚟?點解好似同你咁熟?你地琴晚到底做過啲咩唔見得光嘅事!!!」


「你唔好咁大聲先,我地坐低一五一十講清楚,我而家都好迷惘。」我說。


選好了位置,我們三人便坐下來。


我們互相凝望,沉默好幾分鐘都沒有說話,


「係呢,Marla你係咪記得琴晚嗰個夢...?」我決定打開話題。


「係呀,我記得同你行到去鐘樓,之後比個怪人襲擊,你隻手仲.....嚇死我喇。」Marla一臉膽心。


「咁睇嚟我地嘅夢係相連。」


有可能甚至Hugo和道友明,還有哥哥,都是相連的。


不,哥哥已經死了.....


「咩夢呀?講緊咩呀?」Gary問。


「其實我會成日都會發比人追殺嘅惡夢。估唔到,呢個夢竟然會同其他人相連到。」


「我都係唔知會同你相連到....但一見到你就忍唔住同你講嘢.....」Marla說。


「我地要好好傾下呢件事。」我說。