【王道】《我每晚都會發畀阿哥追殺嘅惡夢》: 第二十四章————四人會議（楓篇）
「點解你又會喺呢度？」Peter疑惑。
「呢度係我整出嚟，點解我唔可以喺度？」阿淵回話。
「呢度係你整出嚟？！」
「係呀，之前完成咗極樂，無聊就整多個RPG世界出嚟，我仲整埋啲武器喺度，力盡完善，見你地玩得咁開心，我都老懷安慰。」
「咁即係呢啲人都係你放入嚟？」
「吓，佢地唔係你朋友咩？」
「緊係唔係啦，佢地追殺緊我喎。」
「竟然係咁？！好啦，你放心交畀我。」說罷，阿淵便從口袋拿出了一條短柄。
「呢舊嘢....有咩用....」Peter不明其用。
「睇我表演啦。」阿淵按了短柄上的按鈕，柄口就伸出一道激光，猶如星球大戰的現實版。
七人看見阿淵的激光劍，都甚是詫異，更多的是驚恐，何等人物方能使用這種寶物，對阿淵不敢小覷。
一劍揮去，把七人手上的長柄武器都砍去一半，他們立即嚇得屁滾尿流，逃之夭夭。
「唔該哂你....」Peter向阿淵道謝。
「嗰班人係咩事，無啦啦會走嚟呢度。」阿淵看著逃跑中的七人。
「我都唔知，聽啲同學講佢地好似叫「七色極光」。」
「「七色極光」？！個名又幾有型喎。」阿淵接著說：「咪住先，你啲同學？咁多人都開始連夢咩？」
「我都好驚訝，如果唔係誤打誤撞入咗嚟，我諗有排都唔知呢件事。」Peter回話。
「如果越嚟越多人連夢，件事唔知會發展成點，有少少擔心......」
「要唔要叫埋其他人一齊商量下？」
「都好，人多好辦事，搞清楚咩事先再決定點做。」
然後，他們便相約大家在Peter學校附近的那間炸雞店見面。
「人齊未？」阿淵問。
總共四人，坐在以往熟悉的卡位。
「um…..應該就齊啦。」Peter回答：「阿蓮要翻工嚟唔到，Hugo因為就快考試所以想專心溫書唔過嚟。」
「所以呢度就有我、Marla、Peter同埋呢位仁兄係？」Gary說。
「我叫史蒂夫‧淵，叫我阿淵就得。」阿淵穿起一身潮牌，上身以Supreme為主，下身就是一條EVISU牛仔褲。
「第一次喺現實見到你，感覺好微妙....」Peter說。
「啊！我記得你好似喺崔翼望嗰班人其中一個！」Marla驚訝的說。
「係呀....不過我已經冇幫佢做嘢，而家喺新極樂幫手。」阿淵看了看其他人，然後問：「唔見上次嗰個蛋撻頭嘅？」
「喔，佢就係Hugo，佢要專心溫書，所以唔會參加今次討論。」Peter回話。
「咁可惜，佢咁聰明應該幫到我地唔少.... 」阿淵明顯有些失落。
「唔緊要啦，我例哂啲問題出嚟先，真係解答唔到嗰啲先再搵佢幫手。」說罷，Peter便拿出他那本陳舊的筆記本：「首先，點解最近會有咁多陌生人連到入夢？」
「係呀，呢個我都想問，之前Hugo唔係講過要諗埋Peter先可以成功連夢架咩？」Gary問：「佢地話Peter係構成呢個夢嘅伺服器，咁Peter有冇察覺到啲咩？」
「我其實冇咩特別感覺，如果要講感覺最強嘅話，應該喺我入夢殺牙俊嗰次，嗰時真係好似要乜有乜，隨心所欲，夢世界根本就喺為自己而設嘅感覺。」Peter接著說：「但自從畀崔翼望捉完之後，嗰種感覺已經接近消失。」
「講起呢件事，究竟幫我地捉住崔翼望嘅人喺邊個？Peter你上次好似講過喺你嘅.....哥哥？」Marla小心地在Peter面前提起哥哥二字。
「嗯...我醒翻之後第一眼見到嘅人就喺哥哥，佢話佢送我嚟醫院，不過我唔知係咪瞓得太耐所以有幻覺....」Peter一想起哥哥眉頭便緊皺：「冇理由嗰個已經死咗嘅哥哥....」
「其實你係咪確定佢死咗架？」Gary繼續問：「之前嘅黑衣人，同埋喺夢入面追殺你五年，點諗都有可疑，個夢如果係死人又點會連到入去？」
「咁假設佢冇死嘅話，點解佢要追殺我？以我識嘅哥哥，唔會喺一個壞人，佢冇理由唔搵翻屋企人，仲要不斷殺我奪取我嘅嘢。」Peter說。
「佢想奪取嘅，會唔會係某一樣對你唔好嘅嘢？如果佢唔係壞人，不斷殺你一定有佢嘅原因。」Marla說。
「某一樣對我唔好嘅嘢....？」Peter苦苦思索，想到了一個解釋：「佢可能想幫我攞走血友病！呢個病由細纏到我大。」
「咁所以佢追殺你就想攞走你血友病，但可能因為某啲未知原因而要暫時假死？」Gary說。
「唯有係咁解讀.....」Peter回話。
「關於呢件事...崔翼望都係畀過Peter嘅相我地睇，我地先可以成功入夢，雖然唔知佢點知，但可以推斷新一批入夢嘅人係睇過Peter嘅相，或者透過某種媒介連入夢。」阿淵推論。
「我可以肯定佢地冇見過我，如果唔係琴晚嗰七個人都唔會唔識我，所以後者說法會更合理。」Peter說。
「其實我聽過班上同學講，佢地曾經喺街見到一個奇怪標誌，嗰晚就發咗個怪夢。」Marla再說：「而家我嗰班都流傳緊，話要唔知經過咩特別儀式先會發到怪夢，但最後都要見翻個標誌先得。」
「吓！連你地學校都開始有人入到夢？到底有幾多人知道呢件事....」Peter感到詫異：「咁佢地有冇講過個標誌係點？」
「佢地好似講過喺係逃生牌上面。」Marla回答。
「咁奇怪？我地可能要去搵下個標誌，我始終覺得咁多人知，大家係夢入面互相廝殺搶奪都唔係好事，盡量都要移除。」Peter再提意：「我地都要搵出邊個整呢啲標誌出嚟。」
「好，咁呢件事就有待調查。」阿淵說。
Peter把這次會議的重點記錄在筆記本上，看著這本筆記，也想起Hugo曾說過黑衣人也是用同一款，在商討過後，發現哥哥仍生存的機會很大，心裡便更渴望調查一切，得到真相。