【王道】《我每晚都會發畀阿哥追殺嘅惡夢》: 第二十七章————金羊（楓篇）
就在搖搖擊來，最近自己身體的那刻，Peter一手把它抓住，令阿藍收不回他的武器。
「而家係邊個攞唔翻？只要我用力扯，除非你放棄武器，如果唔係你就會出圈。」Peter說。
「你！咁我都可以扯翻你！睇下邊個大力啲！」阿藍回駁：「同埋，唔係咁天真以為回力鏢真係識回力嘛？你以為自己睇緊漫畫呀？你以為係連登寫故呀？就算我唔擋你都收唔翻武器！」
「睇下點，順便提提你，我扔嘢叻你見識過架啦。」說罷，Peter便把回力鏢投了出去。
「！？」阿藍想起那次Peter用高難度姿勢也能射中他的同伴，心裡便開始慌了，自己正處於兩難局面，若去擋住回力鏢，武器就得捨棄，若不擋，便很大機會被打翻三杯水，直接落敗。
「你已經畀我將軍！」Peter說。
「嘖！」阿藍到最後仍趕不上作出對策，啪嗒幾聲，三杯水便被回力鏢擊中，應聲倒地。
「第一場嘅勝者係—Peter！！！」阿淵隨即宣佈。
Peter用計贏得甚是精彩，在場的百位觀眾都看得目不轉睛，勝利宣言一出，便是換來極大的鼓舞歡呼聲。
「Peter你有啲料到喎，一定係平時跟得我多！」一回到休息室，Gary就上前搭話。
「ok啦.....叫做有驚無險。」Peter回話。
「第二場！Gary對露仁夾！！請參賽者出場！！」阿淵宣佈。
「竟然係你？！」露仁夾看到Gary出現，異常驚訝。
「上次你係班房咁串，而家就話畀你知我識唔識玩呢個遊戲！」Gary說。
原來露仁夾是Gary、Peter的同學，上次給露仁夾他們故意刁難，Gary知道對手是他，夠能藉此反擊，心裡何其高興。
露仁夾選擇的武器是武士刀，一邊揮舞一邊擺出各種架勢：「好彩我一直都有學開劍道，總算可以大派用場。」
露仁夾把武士刀耍得有模有樣，每次揮擊都彷似劃破空間，在場的人都看得猛地嚥下口水。
「睇你都係得個樣架啫，我呢把先係真正最強嘅武器！」Gary舉高他的手：「各位觀眾，攞你命三千！！！」
攞你命三千，集十多種武器於一身，包括有西瓜刀、鐵鏈、火藥、硫酸、毒藥、手槍、手榴彈、殺蟲水等，每種武器也能獨當一面。攞你命三千雖然不便攜帶、難以使用，但勝在容易製造，改造性強，故亦成為七大武器之一。
所有人看到Gary的武器都呆苦木雞，不懂反應，阿淵也極度震驚。
「點解你會搵到呢把嘢....我明明已經將佢收到好隱蔽....」阿淵喃喃自語。
「點呀，驚嘅話而家投降都未遲架。」Gary洋洋得意地說。
「唔好咁多嘢講啦，快啲開始啦主持人！」露仁夾對阿淵說。
「好，咁比賽內容呢....就玩捉羊達陣啦！」阿淵指指場邊的紅色線：「每段時間都會有羊放出嚟，你地捉到羊同時又到達紅色線內，時間到嗰陣邊個捉得最多就算贏啦。」
比賽立即開始，羊從地下升起至場面中心：「咩咩咩咩～」，牠表現得非常從容，殊不知背後已埋伏兩名要捉拿自己的惡魔。
「咁簡單？我兩三下就搞掂佢啦！」Gary衝向那隻羊。
「你過到我呢關先講。」話音未落，露仁夾便手起刀落，往Gary的臉劈去。
千鈞一髮之間，Gary及時反應過來，彎下身體，只有頭髮給他削去幾攝，更順勢抱起了羊。
「哈，辣殺！秒殺你啦！」Gary用左臂夾起羊，右手拿著攞你命三千抵禦露仁夾的攻擊。
但羊那有可能如此溫馴，夾緊牠便是換來一番強烈掙扎，隨後逃脫在場內到處亂跑。
「一隻手係捉唔實佢....」Gary看著從自己手上逃走的羊。
「哈，咁即係話我地要捉實羊，就要雙手並用，武器等於冇得用。」露仁夾說。
「你笑咩呀，你都要用雙手捉架啦，我地嘅處境係一樣！以為笑就佔上風呀？」Gary說。
露仁夾把武士刀收回腰間的刀鞘，對Gary笑而不語。
「........」Gary不明露仁夾在得意甚麼，回頭便問觀眾席上的Marla：「佢究竟笑乜呀，我唔明喎。」
「佢有得帶住武士刀喺身，你就要放低咁大抽嘅攞你命三千先得，點睇都係佢著數啲...」Marla回答。
「原來係咁，唔怪之得佢笑到咁淫啦。」Gary點頭以示明白。
「首先達陣嘅係露仁夾！！」阿淵宣佈。
就在二人對答其間，露仁夾已經捉住羊抵達紅線內。
「好彩對手係個蠢材，先可以咁輕鬆～」露仁夾又對Gary得意傲慢地笑。
「阿淵，我要投訴，條友成日對住我淫笑，好影響我表現。」Gary說。
「你唔好咁多幻想啦，你咁嘅樣，最多而家出隻金羊畀你地，一隻當兩隻，自己拆掂佢啦。」阿淵回話。
緊接出現的是一隻金燦燦的羊，顯然不可能是正常生物，這時大家才明白，那些羊是阿淵的機械羊。
「吓，咁我頭先咁辛苦捉隻羊為咩呀？」露仁夾問。
「你話輕鬆嘛，咪睇下而家仲輕唔輕鬆。」說罷，Gary立即動身去搶金羊。
「你就想！」露仁夾見狀，搶先跑到紅線前，擺出架勢阻擋Gary。
「哼，係時候用我隱藏已久嘅絕招。」Gary雙手抱緊金羊，準備衝刺。
「絕招？唔通Gary仲有咩招數係連我都未知？」在休息室透過電視直播觀看比賽的Peter流下冷汗。
「惡魔蝙蝠幽靈！」Gary邊喊出招式名，邊用雙腿以極快速度Z字型的奔向露仁夾。
露仁夾不慌不忙，把腳向前一伸，碰的一聲，Gary便被絆倒在地。
「.......咩咩咩咩~」金羊踏過Gary身體逃走了。