阿淵一行人便到訓練房看個究竟。

「嘩,阿藍你冇事啊嘛....」Gary看得愣怔。

房間大小好比一間標準的壁球室,一進去,只見一個又一個的殘影拉起猛風。

「呼....呼.....做咩過哂嚟?」阿藍打開眼,停下訓練。

「你係做緊啲咩訓練?」阿淵好奇。





「你地應該知咩係精神時間屋?」阿藍解釋:「我做緊類似嘅嘢,我能力並唔係增加自己速度,而係減慢四周嘅速度,所以我合埋眼做嘅訓練可以等於平時十幾倍。」

「但你喺夢到做肌肉訓練有咩用?都唔會變到大隻。」Gary問。

「唔係咁簡單,因為我發動條件係合埋眼,所以我要用好多時間嚟適應,令自己就算合埋眼都可以靈活行動。」阿藍回答:「依加都掌握得七七八八,要唔要同我測試下?」

「都好!」說罷,他們便開始一起進行訓練。

另一方面,Peter一行人正在找掠奪團的據點。





「小秋,你預唔預知到個地點係邊度....」Peter提議:「漫無目的咁搵都唔係辦法。」

「其實我個發動條件都幾麻煩....」小秋說明自己的能力:「我每次入夢可以揀一個人嘅未來嚟睇,但就只此一次,如果要再睇就要廿四小時後再入夢先睇到。」

「咁呀....咁就再搵下囉....」Peter灰心地繼續走。

「咁阿淵呢?雖然係分身,但應該都識幫手諗辦法?」小秋問阿淵分身。

「終於都識問我喇咩!」阿淵分身突然開口。「你有冇咩計呀?」Peter問。





「緊係有啦,有咩可以難到阿淵,只要我用...」話音一落,阿淵分身便把自己的雙眼發射上天。

「...........」Peter和小秋看得目瞪口呆。

「我已經啟用夢世界搜尋功能,跟我嚟啦!」阿淵為他們指示方向。

很快,三人便沿路到達了掠奪團據點。

「呢度好靚喎....」三人都被這裡的五光十色吸引。

「咪住,我地唔係嚟觀光,快啲去搵楓先。」Petet說。

「你搵唔搵我哥哥喺咩位置?」小秋問阿淵。

「都話有咩可以難到阿淵,我緊係搵到啦,佢就喺嗰邊。」阿淵指向不遠處。





走到附近,只見楓一人孤獨地的坐在地上,呆呆的看著燈光。

「哥....」小秋走到楓的背後。

「小秋...!」楓驚訝地看著三人:「你地做咩過嚟呢邊....」

「我地喺嚟接你走,唔好幫啲衰人啦。」小秋想拉走楓。

「衰人?咁Vincent就唔係衰人?」楓變得激動:「佢點樣喺背後講我...我全部都知!」

「嗰邊唔係得佢一個架嘛,仲有我喺到,你唔好再走錯路喇....我唔想見到你咁...」小秋抱著楓。

「小秋....其實係咪所有人都唔鍾意我....我知架....我知架....所有人都同當年嗰個班房啲人一樣.......」楓說起些不明的話。





「唔好...唔好諗起嗰件事...」小秋說。

「當年嘅...咩事?」Peter問。

楓開始記起令他改變一生的回憶—

當年楓和秋的父親時常酗酒毒打家人,母親忍無可忍之下,終於也提出離婚。

並禁止父親再度接觸家人,就在事情過渡,以為一切都風平浪靜之際。

砰!砰!

母親在外工作,兄妹二人留守在家的那夜,門外傳來兩下熟悉,而且令人恐懼的拍門聲。

「哥哥....」小秋拉著楓的衣袖。





「冇...冇事...我去睇下。」楓小心翼翼,顫抖著身體走到門前。

楓拉來一張矮椅子,湊夠高度便在門上的貓眼窺探是誰人。

一看之下,楓嚇得雙腿發軟,在椅子上摔了下來。

「做咩?係邊個...?」小秋問。

「喂開門呀,我知你地喺入面!唔好扮撚哂嘢!」再來兩下刺耳的拍門聲。

「係....係嗰個人....」楓已被嚇得六神無主。

原來,父親這晚又喝得爛醉,跑來騷擾楓秋一家人。





「開門呀!!」砰!父親一腳踢在門上。

「.....嗄...嗄...」楓雙手不停發抖,拿起鎖匙,抖得噹噹作響。

「唔好開門呀哥哥....」小秋拉著楓。

「........」楓皺起八字眉,呼吸凌亂,說不出一句話。

楓對父親的陰影已經埋得太深,父親一舉手一投足對楓來說都是極度令人恐懼,楓在心理影響之下,沒有辦法不服從父親的命令。

 咔嚓,門被打開。

「哈嘍,兩位小朋友。」父親露出了猙獰的笑容。

話音一落,父親立刻關上門。

「你地過得好開心啦?」父親一來便給了楓一記耳光:「害到我雞毛鴨血好開心啦?」

「........」楓不敢作聲,眼角含淚,身體僵硬的站著。

「今日你答唔啱,唔使旨意我放過你。」父親把聲線壓沉:「我鍾意海水味多啲定雨水味多啲?」

啪—!

「答呀!!」父親怒吼。

「你唔好打哥哥....」躲在角落的小秋突然開聲。

「喔.....依加連你都想反抗我?」父親轉移目標,走向小秋。

「.....!」楓看到小秋有危險,身體卻因害怕而無法動彈。

父親捏著小秋的頸:「話時話,你都未答過我問題,不如依加試下?」

楓看著父親一巴一巴地搧在小秋臉上,眼淚不停流下,一邊害怕著父親,一邊想保護妹妹,內心的掙扎令他苦不堪言。

「啊啊啊啊啊———!!!」楓按捺不住,拿起在飯桌上的叉子,跑向父親。

父親回頭一看,已經太遲,楓把叉插進了父親的雙眼。

「嗚呀!!!」父親掩著眼睛,跪在地上慘叫。

「走呀,走呀!!」楓拉著小秋往門外跑,一直跑到母親工作的地方求救。

最後,父親受到了法律制裁,也失去了雙眼,從始一沉不起。

終於擺脫了父親的魔掌,以為能正常生活,怎料這時才是噩夢的開始。

「媽,你睇下我篇文!」楓拿了自己救下妹妹過程的文章給母親看。

「嘩,好叻仔喎,識寫咁多字。」母親稱讚楓。

「係呀,呢篇係今日中文堂要交嘅功課,題目係一件好事。」楓說。

母親聽到後,只是微笑,摸摸楓的頭。

幾天之後,中文老師也把作文批改完成,並叫楓在全班面前朗讀一次自己的文章。

楓滿心歡喜,心想老師一定是賞識自己的行為,才想分享給全班知道,於是自信滿滿地走到黑板前,開始朗讀。 

「我今天做了一件好事,我用叉子插了父親的眼睛,救了妹妹,媽媽也很開心。」 

朗讀完後,全班都鴉雀無聲,沒人懂得反應。

「嗱,各位同學仔聽到啦,首先,叫你地作四十字嘅文章,好明顯佢唔夠字數,而且冇運用到時地人事四大要素,只係得時人事。」老師開始挑剔楓的文章。

「.......」楓的心情一變,彎起八字眉,呆了看著老師。

「最最最大嘅問題係咩大家知唔知?」老師看一看同學的反應,繼續說:「就係佢亂咁作啲故事出嚟,我要求嘅係真人真事,呢篇就係最好嘅反面教材。」

「.......我....」不幸來得太突然,楓一時說不出話。

「不過最差已經呢篇文章,其他同學仔都做得唔錯,千奇唔好學佢就得。」老師說。

全班頓時用異樣眼光看著楓,一直竊竊私語,楓不懂反應,只是彎起八字眉,看著眼前的一群魔鬼。

從那時起,楓眼中的世界只是一個燃燒中的地獄,旁邊的老師就是撒旦,自己無處可容,所有人都拒絕自己。

「啊啊啊—!!!」楓突然向老師窮追猛打,流著淚,發著瘋,把內心的壓抑都釋放出來。

也因此事,楓被判退學,之後的每一所學校都因類似事件而革除楓的學位。

楓也開始不斷找自己真正想做的事,可是直到現在,沒有一樣能延續下去。

世界就好像否定他的存在,就好像把他拒諸門外一樣。