之後,思堯便把早已調好的醬汁落在鍋上煮,並拿起一小支鐵匙羹。

「喂擘大多次。」思堯撈起醬汁說。

「又嚟?」我害怕地問。

「怕咗你⋯⋯」思堯低頭吹一吹匙羹上的醬汁,並遞向我說「咁得未呀?」

「啊⋯⋯好味!」我嘗過後立即讚賞道。





思堯沒有理會我,直接把醬汁倒在碟上。

「好,搞掂一味,你幫手鋪檯先啦,我炒埋碟菜好快出嚟。」

我聽完便拿著報紙走出廚房預備飯桌,並且把那碟金菇肥牛卷和盛好的白飯拿到飯廳。

思堯也很快炒好菜上碟拿出來。

「好!食飯。」我興奮地說道,並拿起筷子開始吃起來。





思堯的廚藝一如以往地沒有令我失望,兩道菜都美味非常。

「你煮飯落太多水啦,搞到好似粥咁。」思堯卻看來不太滿意我的廚藝。

「似粥幾好呀,容易啲消化嘛。」我開玩笑說。

「第時結婚之後日日都有你煮嘅飯食,真係諗起都幸福。」我說道。

「車,邊個話嫁俾你?」思堯笑說。





「你唔嫁俾我可以嫁俾邊個喎。」

「你學識煮好啲飯先再講啦。」

我們就這樣輕輕鬆鬆地渡過剩餘的晚上,幫思堯洗好碗好我也跟她道別。

「疊memo仲有幾多?」思堯在我懷裡問道。

「嗯⋯⋯睇下先,剩返唔夠一半啦。」我拿出memo看了看說。

「原來我地呢個暑假已經一齊經歷咗咁多嘢。」思堯把我抱得更緊。

「係呀,一齊創造咗好多珍貴嘅回憶。」

「呢啲回憶,你之後會記得㗎呵?」





「梗係會,你當我邊個,記嘢我最叻。」我笑說「之後我仲會同你創造更多更多回憶,然後係你老咗唔記得嘢嗰陣,逐件逐件好似故仔咁講俾你聽。」

「口甜舌滑。」思堯靜默了一會說「有時都唔知你邊句真邊句假,愛上你呢種男人就永遠只可以係希望同失望之間徘徊。」

「唔好諗咁多啦,放心,我應承你唔會俾你對我失望。」我抱著思堯和她深深一吻。

「都夜啦,今日玩咗咁耐你都攰啦,快啲返去抖吓啦。」思堯吻後說道。

「好啦,拜拜,你都早啲抖啦。」

「拜拜。」
已有 0 人追稿