女神回憶錄: 第一章 阿豬阿狗都女神？

2012年9月1號

「登登～登～登～」我望一望手錶：8點10分，時間啱啱好，冇遲到。
我抬高頭望一望課室嘅大門上面寫住:2E。
「唉！果然又係E班......」冇錯，我上年嘅成績好榮幸咁坐落喺全級最尾嗰30名之內，所以我今年好榮幸咁去咗全級成績最差嗰班 —E班。
「喂！阿軒！做乜成碌木咁企喺班房門口唔入嚟吖？」
「得啦！而家咪行入嚟囉。」喺班房入叫我嘅係阿朗，佢係我喺中一嗰陣識嘅，可能我同佢都係唔多鐘意讀書又鐘意搞事，慢慢我地就變成咗死黨。
當喺我行入班房嘅同時，我亦周圍咁望下，睇下有冇我識嘅朋友係今年同我同班，順便就望下有冇靚女咁吖嘛，但係我又好似一個都搵唔到喎。
就係咁我平凡嘅中二生活就此展開，直到嗰一日⋯⋯2013年3月26號。



「各位同學！小組專題研集嘅題目已經派咗畀大家啦！記得喺4月10號之前交吖！」
「阿軒吖，你嚟緊星期六有冇嘢做吖？不如嚟我屋苑會所度做小組研集吖？」
「今個星期六？是但啦。」我見阿朗咁有興致做功課我都唔係幾好意思潑佢冷水。
於是乎星期六，亦即係3月26號。我同另一個組員阿sam就去咗阿朗屋苑會所到做project。
正當我地三個人都做到又悶又攰喺度休息食零食嘅時候嘅時候突然有個人拍一拍我膊頭。
「hello~你好吖！我叫小琳吖，你地都係嚟呢度做project㗎？」喺我眼嘅係一個好細粒，得得意意嘅女仔。
聽到佢突然間咁問我有少少反應唔切，佢見我冇乜反應佢就繼續講:「我認得你吖，你係2E班嘅學生吖嘛，我地係同學嚟㗎！我讀2C㗎。」哦！原來係同學嚟嘅。
「哦！你好吖！我係阿軒吖，係呢？有咩可以幫到你？」
「嗯⋯⋯冇吖⋯⋯我見你地枱面好似好多嘢食咁，大家一場同學⋯⋯不如請我食包薯片吖！」我望住小琳紅都面晒咁提出呢個請求，唔知點解覺得呢一刻嘅佢好可愛。
「咁咋？當然冇問題啦！」於是小琳就拎住包薯片好開心咁返咗去佢班fd度啦。


「喂，朗哥吖。你點睇？」
「咩點睇吖軒哥？我就淨係睇到我地少咗包薯片。」呢個死係到要串下我先安落嘅。
「我係話條女吖，覺唔覺佢好可愛吖？」
「一般咁啦⋯⋯」
「唔係喎，我就覺得佢直頭係我心目中嘅女神咁喎」
「唔係吖？有冇咁誇吖？佢靚咩？」望真啲，小琳佢眼大大，塊面就有少少baby fat，個人就細細粒咁，我諗如果要話佢好靚咩？又唔算係。但係至少我就覺得佢好吸引我囉。
「咁你又唔好咁膚淺，下下都講樣。有時唔一定要好靚都可以係女神嘅。」
「哇！你咁講真係係人都做到女神喎！不過呢佢女唔女神呢我就唔太清楚，我淨係知佢就係隔離2C班阿輝個女朋友。」
「吓？哦⋯⋯」唔知點解我聽到呢個消息會覺得有啲失落嘅。
而喺嗰一刻嘅我已經將呢個走嚟拎薯片食嘅女仔當咗係我「女神」。