消失的五年: 《四》

2014年2月10日 …… ？


今年明明係2009年，有咩可能會係2014年吖，無可能，無可能 ……


為咗證實係部電話有問題， 我行番入大堂，响保安枱面攞起份日報，左上角嘅日期 ………… 2014年2月10日！


我深呼吸咗一下，好平靜咁行番出後園坐低，個腦不停咁諗






“有咩可能由2009年變成2014年？黐撚線㗎！“


發生咗咁多不可思議嘅嘢，已經遠遠超出我所能承受嘅能力，冷靜過後，依家唯一方法就係問人，問最親嘅人！


我拔足狂奔，一直咁跑，直至跑到龍園公園對出個電話亭，開門入錢，打咗比老婆，啲，啲，啲，啲 …… 電話傳嚟嘅竟然係






"你所打嘅電話已經停止服務，請你查清楚再打嚟 ……"


再試，但係結果都係一樣，攪咩啊！


冷 …… 靜，呼 ~ 既然係咁，我就轉打比另一個親人，啲、啲、啲 ..... 電話終於接通，耳筒傳嚟一把熟悉嘅聲音






「喂，邊位？」


「家 ... 姐，係我吖，阿東啊！」


「阿 …… 東？阿 …… 東，真 …… 係你？嗚嗚 ………… 真係你，你仍然在生，太好喇，等咗咁多年，終於 ………… 嗚嗚，呢幾年 …… 你去咗邊啊？」家姐一路講，一路喊


「家姐，我真係完全唔知發生咩事？我依家好亂吖，你可唔可以話比我知家怡同 Michael 去咗邊？我搵唔到佢地！」我緊張咁問


「 ………… 細佬，自從你失蹤咗之後，發生咗好多好多事，我都唔知應該由邊度講起好，但係你要冷靜啲聽我講，我所講嘅野，你可能一時三刻接受唔到 ……」家姐吞吞吐吐咁講






「你講，我好冷靜！」我深呼吸一下，就話


「自從你零九年突然人間蒸發，呢五年間發生咗好多好多野 …… 失去咗家庭之柱，所有問題就一下子咁湧出嚟，供樓、水電煤、學費 …… 咩都要錢，你都知道我要照顧阿爸阿媽，幫唔到幾多，家怡為咗頭家，送完 Michael 番學之後，就去時裝店做兼職，但係兼職又搵到幾多吖，當啲積蓄用晒，借無可借，被迫將層樓賤賣，攞住嗰少少錢搬番去外家 ……」家姐就將呢幾年所發生咗咁事講出嚟


「咁佢地即係喺外母度啦！」我搶住咁話


「佢地 …… 已經 …………」家姐欲言又止


「家姐，妳快啲講比我知啦！」見家姐咁樣，我就更加擔心






「佢地 …… 已經 …… 移咗民去加拿大！」家姐一字一字講出呢番話


「妳講咩啊，佢地移咗民？究竟發生咗咩事？妳快啲講吖！」我唔能夠相信家姐所講嘅嘢


「細……佬，嗚嗚 … 你 …… 冷靜啲，你都知你外母一向睇錢幾重㗎啦，你失蹤咗，家怡又要照顧 Michael，仲要比錢佢阿媽，一個女人仔又點攪得掂吖，等下一年，等下
又一年，你仍然音訊全無。


嗚嗚 …… 喺上年，家怡識咗個男人，個男人好有錢，比咗一筆錢你外母，跟住就向家怡提出一齊過加拿大生活，家怡考慮咗好耐好耐，最後佢為咗 Michael 嘅將來，就同佢 …… 嗚嗚 …… 過咗加拿大 ……」家姐越講起傷心


「咩話？家怡帶咗 Michael 過加拿大？無可能，今日 Michael 生日，你地唔好再玩我啦！」我完全唔能夠接受家姐所講嘢事實






「細佬，家姐知你一時間好難接受，依家番咗嚟，你仲有好多嘢要解決，出面好多警察搵你，你自己小心啲！」家姐跟住就講


「做咩會有警察搵我？」我好疑惑咁問


「佢地 …… 話你殺咗人，所以失蹤咁多年！」家姐口震震講


「咩話？我殺咗人？」我急住追問