消失的五年: 《八》

由呢度行去救護站，只係一條大直路，但係沿途異常危險，多人多車，好易瀨嘢，安全起見，我決定行入天富苑，過對面天秀公園，落隧道到濕地公園，再直行就係救護站，呢個方法雖然行多好多冤枉路，但一定穩陣過行天瑞路！ 


我摸摸額頭，見到仲有少少血，於是除咗件Tee，綁喺頭上面，再著番件風褸，就跑去天秀公園！ 


去到天秀公園，沿足球場外圍跑，不知不覺，跑到通往天悅輕鐵站嗰條隧道，呢條每日必經之路，諗下諗下，好自然咁行咗落去，慢慢落斜，令我諗起呢度就係成件事嘅起點，昏迷咗，一醒番就已經五年之後，一切一切都係由此而起！ 


我行到落頭先醒番嗰個位，短短兩個零鐘，已經完全唔同晒，响隧道幅牆，忽然多咗一個塗鴉，上面寫住 






KWOK KIN TUNG 


I AM WAITING FOR YOU 


HAHAHAHAHAHAHAHA 






望住牆上面嘅塗鴉，感覺好似比人當傻仔玩緊一樣，怒火一下子湧出嚟，一拳又一拳咁打落幅牆度，將心入面所有不快發洩晒出嚟，睇住流晒血嘅拳頭，我同自己講 


「我一定會摷你出嚟餵狗！」 


發洩完，行番上隧道，向濕地公園方向跑過去，離開濕地公園條隧道，再行幾分鐘就到救護站。 






前面就係救護站，點知响我過馬路一刻，無意向右一望，發現救護站嘅後門，正正泊咗架警車响度，仆街有無咁啱吖！ 


一到夜晚，後門就成為唯一嘅出入口，再無其他辦法可以入去，如果我依家調頭，一嚟外眼，二嚟都唔知可以去邊，騎虎難下，死就死，我故作輕鬆咁行去後門，戰戰兢兢嘅十幾秒路程，背脊不其然冒出冷汗 .....