消失的五年: 《十》

林輝，一位我好尊敬嘅前輩，我十八歳出班就跟佢，咁多年佢教識我好多好多嘢，對我好似仔咁看待，我好記得第一年初出班，十下十下，做轉跳樓 case，嗰男人由二十幾樓跳落地下，爆開晒，血肉模糊，我第一次望到咁嘅情景，成個人突然虛晒，面青口唇白，暈一暈，正常情況下，我做細嘅係負責執番晒啲手手腳腳同啲內臟，輝叔見到，就叫我上車等，自己落手落腳執，事後就同我講 


「第一次無暈低，已經好叻，慢慢嚟，做做下就慣，你只要記住，你係去幫人，唔係害人，就冇有怕，加油吖，新仔！」 


自此之後，我就好信任輝叔，既然咁啱比佢撞到，唯有將成件事講晒比佢聽。 


輝叔聽完之後，講咗一句 






「其實由頭到尾我都唔相信你會殺人！」 


「多謝你相信我，輝叔」簡單一句，勝過千言萬語，我望住佢，就講 


「依家唯一線索，就喺個公文袋度！」輝叔提醒我咁話






一開，我將公文袋入面啲嘢倒晒出嚟，放晒响枱面，一睇，有一張相，兩條銀色鎖匙，一本爛咗一半嘅書同一張記憶卡 ！ 


我攞起張相，係一張彩色嘅合照，正確啲嚟講，係一張畢業典禮嘅大合照，我對呢張合照一啲都唔陌生，因為我正正就係相中主角之一，一九九五年中五畢業嗰年，但係張相依家有啲特別，相中多咗四個窿，我唔係好肯定嗰四個係邊個，而我個樣就被畫上黃色哈哈笑公仔，反轉背面，有一行字 


「遊戲正式開始，老朋友」 






我將張相放番入袋，跟住攞兩條鎖匙嚟睇，只不過係兩條普通嘅銀色鎖匙，一大一細，大嗰條似門匙，細嗰條就似開匙頭、信箱之類，無乜特別。 


望住嗰半本書，係本陳年嘅寫真集，封面寫住「YUKISS 內田友紀寫真集」，內田友紀， 一套日劇《同一屋簷下》，而迷倒不少少男嘅女神，想當年女神周惠敏、楊采妮都一定係長髮，內田友紀雖然短頭髮，但感覺好陽光，成個鄰家女孩咁，我記得，我都有偷偷地去信和買過佢張相！ 


呢本寫真係日本版，嗰時嚟講，一定唔平，我緊係無錢買啦，印象中亦無睇過，但好奇怪，本嘢得番頭嗰幾十頁，無咗後半，完全諗唔起同我有咩關係！


最後係一張舊款 SanDisk 記憶卡，藍色2GB，大大張，我問輝叔有冇轉換器，佢話應該有，不過要搵下，就响呢個時候， 


「叮噹」