既然警方去得救護站搵我,要離開天水圍一啲都唔容易,照我估計佢地一定會响主要道路上設路障,架車一直响天影路行,過咗大十字路口,正如我所估計,真係有路障响天瑞邨對開, 


時間 : 22:55 


我即時帶番頂帽,慢速經過路障,好有禮貌咁比個五,佢地見我著晒警號,都無理我,於是我就加速上元朗公路,向大欖隧道逃走! 


揸住架救護車喺公路飛馳,都唔代表安全,我估呢個時候,輝叔嗰邊差不多頂唔住,即係好快就會全港通緝呢架救護車,科技發達,加上車上面有衞星定位,㩒個制就會搵到我嘅行蹤,我必須諗定下一步同今晚藏身嘅地方。 






過咗大欖,我飛快咁將架車駛到長沙灣,泊响救護站門口,換番便服,可能頭先太急無留意,唔知咩原因,雙手嘅前臂無拉拉多咗好多傷痕,之前一直都無嘅,以我經驗,呢啲都係長期進行靜脈注射所做成,但依家無時間慢慢研究,都係離開先,安頓好後再算。 


臨走時,我將救護車上部手機一齊攞走,掉咗將卡,就從側門離開,行過對面,好快就上咗架巴士,一坐低,已經見到兩架警車駛入發祥街,包圍架救護車,但我無再理會,靜靜咁坐响度,不知不覺就瞓著咗。 


「爸B、爸B,你喺邊啊?」 






「啊!Michael ……」 


嗄嗄 …… 一覺扎醒,原來發夢,望出窗,前面係灣仔修頓球場,於是我就㩒鐘落車,行上天橋,望一望眼前嘅軒尼詩道,嘆咗下氣,落番橋,就行到玩具街 (太原街) 。 


依家黑媽媽,咩鋪頭都關晒, 但我仲好記得,細細個嗰陣呢度仲未成行成市賣玩具,鴻興玩具仍然係啲街邊檔, 嗰時啲玩具真係平到不得了,十元八塊已經有交易,我阿嫲成日帶我落去買玩具,次次都必定一盒二盒番屋企,好鬼開心,眨下眼就二十幾年,依家所有嘢都變晒,往事 …… 只能回味! 






行到路口,轉右,拉開鐵閘,一步一步上樓梯,「叮噹」,隔咗陣,就有把男人聲講 


「咁夜,邊撚個吖?」 


「係我吖,阿東啊!」 


「阿東?」門慢慢打開,開門嘅係一位五十零歲男人,坐住輪椅,見到我,好熱情咁拉住我隻手,佢就係我阿叔 - 郭石民!