呢間診所細細,竟然有張手術枱,鬍鬚佬忽然轉身,木無表情咁做手勢,示意我坐响身邊張黑色手術枱,仲要帶埋眼罩,呼 ~ 我應該點做好?既然跟得佢上嚟,唯有信任佢,好,放手一搏,坐上手術枱,深呼吸一下,帶好眼罩,再瞓响上面。 


呢刻周圍環境好靜,帶住眼罩漆黑一片,腦海不期然浮現番頭先嘅情景,依家諗番可晴最後所講嘅嘢 ……,命懸一線,佢無可能會講大話,就算佢清醒程度下降,都好清晰咁表達咗,佢唔知我講乜,咁 …… 咁 …… 會唔會係我 …… 誤會咗! 


我唔知道呢次意外係人為抑或純粹失控所做成,不過,如果可晴無講大話,成件事真係唔關佢事嘅話,我就犯咗一個唔可以補救嘅錯,眼白白犧牲咗一條生命 ……! 


點解!!! 點解呢啲咁不幸嘅事要發生响我身上,我真係好想知道成件事係點?究竟我地五個做錯咗啲咩事,嚴重到要死咁多人!




 

諗到入神一刻,我感覺到左手手背無端端比人拮咗一下,跟住聽周圍有啲腳步聲,幾秒之後,就覺得好攰、好眼瞓咁 …… 


唔知過咗幾耐,我感覺到有人拍我,仲講 


「喂,起身喇!」 






「呢度係 …… 診所?」我矇矇矓矓咁話 


「係啊,手術好成功,已經幫你攞咗背脊嗰舊追蹤器出嚟,啱啱再檢查多一次,你依家可以放心講嘢喇!」鬍鬚佬一邊講,一邊玩弄緊舊黑色正方形物體 


「真係唔知點多謝你好,其實 …… 我想問 …… 點解你要幫我?」我慢慢撑起身






「幫你?哈哈哈 …… 答啱一半啦,你老表舊時响我度幫過手,老老實實,頭先佢搵我,聽完佢講你件事之後,覺得幾神奇,咪見下你囉!」鬍鬚佬放低手上舊嘢,轉身望向我 


「咁另一半 …… ?」我好疑惑咁問 


「哈哈 …… 咪睇我個樣咁嚇人,其實我份人好溫柔同友善㗎,嘩哈哈 …… 表面我係一個普通嘅電腦老闆,實際上,我係一個不折不扣嘅發明家,呢 ~ 之前幫你檢查嗰支探測器,都係我發明㗎。」鬍鬚佬一面風趣咁講 


「咁同我有咩關係?」我仍然唔係好明,就話 


「有,幫你嘅主因,就係想知道,究竟點樣可以將個追蹤器植入人體,個位置點放,個儀器係點樣,用咩方法接收 …… ,一切一切我都想知道,因為 …… 我深信不久嘅將來,植入人體可能會被廣泛使用,咁樣政府就可以更容易去控制啲人民 …… ,哈哈哈 …… 有無悶親你啊?」






「冇,哈哈 …… 無論點都好,我真係好多謝你嘅幫忙!」 


「唔駛客氣!係啊,仲有樣嘢,頭先麻醉師同你打麻醉針嗰陣,發現你雙手上面有啲傷痕,佢話好大可能係長期進行靜脈注射所致,可能同你件事有關!」 


「真係唔該晒你!」 


果然,同我之前估計一樣,呢五年我一定不斷比人注射某種藥物,令我長時間處於昏迷狀況 …… ,黐撚線㗎,諗起都覺得可怕! 


再次向鬍鬚佬道謝之後,我就經後樓梯離開嘉賓大廈,行出佐敦道,雖然意外現場已經清理咗,但係地上面仍然隱約見到啲血跡,心頭不禁一酸,真係好內疚、好內疚 …… 無辜連累可晴! 






真係好對你唔住,可晴,希望你能夠安息!