消失的五年: 《三十六》
當一切都準備好，一斌就行入廁所，攞住個裝滿水嘅膠出嚟，一嘢淋落俊龍度，眼口被密封，俊龍只能夠發出，
「唔、唔、唔 ……」聲同急促嘅喘息聲 ……
見佢成身震晒，一斌仲施施然行去開大個冷氣，令俊龍更加苦不堪言，兩、三分鐘後，一斌就將俊龍口嘅膠紙撕開，佢口震震咁講
「大 …… 佬，你係係 …… 咪認錯人？我 …… 都冇得 …… 罪 …… 你，你放過我 …… 啦！」
一斌指一指我，示意我去出聲，我就話
「談俊龍，你冇得罪我？咁我又得罪咗你啲咩？仆你個街，點解要害得我慘？精精地好快啲講晒件事出嚟，如果唔係，哈，你就死撚緊！」
「大 …… 佬啊！我真真係 …… 唔知你講 …… 咩啊！」
聽到佢咁答，一斌隨即攞起身旁支棒球棍，諗都唔諗，一嘢扑落去佢左邊膝頭度！
「嘭 ~ 」
突如其來一棍，俊龍痛到不斷掙扎，發出淒厲嘅慘叫
「啊啊 …… 啊啊啊 …………」
之後，就係夾雜求饒嘅喊聲
「嗚嗚嗚 ………… 你地 …… 究竟想點？ 我 …… 真係咩都唔 …… 知㗎 ……」
一斌嘴角向上一戚，連隨扑落佢另一邊膝頭，
「啊啊 …… 啊啊啊啊 …… 啊 ……………………」
慘叫聲傳遍每個角落，隔咗陣，一斌放低手上支棒球棍，行到俊龍身邊，喺佢耳邊細細聲講
「你好撚嘈啊，我完全聽唔到啲音樂！」
講完就密封番佢個口，再調高啲音樂聲，獨個自咁跳舞！
雖然只係短短一兩分鐘，但成個氣氛已經唔同晒，一斌出手快、狠、準，一瞬間扑落俊龍膝頭，望見俊龍不停咁慘叫，我反而有一刻同情佢 ……
同時，一斌咁反常嘅行為，大大出乎我意料之外，望落去，佢 ………… 好似變咗另一個人咁 ……
睇住被密封口嘅俊龍，不斷飲泣，一斌自我陶醉完，完全無諗住停落嚟，隨手攞起把刀，手起刀落，落俊龍隻左手手臂度，「嚓」一聲，一條五、六吋嘅血痕即時出現， 接二連三嘅痛楚，令俊龍用盡氣力咁掙扎同發出
「㗅㗅 …… 㗅 …… 㗅㗅㗅 …… 」
搖晃幅度太大，一個唔小心，俊龍連人帶櫈撻咗落地，呢一跌，令到面上嘅眼罩同膠紙稍稍移位，俊龍露出一隻滿佈紅根嘅右眼，當我同佢有眼神接觸之後，俊龍強忍痛楚咁講
「你 …… 咪 …… 郭健 …… 東？」
「你終於認得我嗱，究竟我老婆同個仔喺邊啊？講啊！」我一步一步行埋佢身邊
「東，我地 …… 係咪 …… 有咩誤會？我點知 …… 你老婆同個仔喺邊，邊個話 …… 你聽？」俊龍一面無辜咁樣
「你唔駛再扮嘢，一 ……」
就响我想講 「一斌」之際，旁邊嘅一斌忽然提腿，毫不留情咁抽落俊龍個肚度，俊龍失控咁撞落牆度，「嘭」一聲，就昏迷過去 ……