消失的五年: 《四十》

依家凌晨三點幾，係潛入去嘅最好機會，如果搭的直接上去曉明街，一定會比人懷疑，既然係咁，唯有响翠屏邨落，再行上去！ 


母校正面係曉明街，而右邊就與隔離學校相連，淨番兩邊就用鐵絲網圍住，而網嘅外面就係斜坡，呢一點對我非常有利！ 


落咗車，沿長樓梯向上行，周圍環境好靜，燈光亦好昏暗，上到曉明街，跨過欄杆，就係外圍嘅鐵絲網，前面一片漆黑，企响生滿一大片野草嘅斜坡上面，我將手機燈光較暗，一步一步，小心翼翼咁向前行，只要過咗更亭，就可以諗辦法入去！ 


扶住鐵絲網，喺只得半個腳位嘅石駁上行，眼前黑到乜都睇唔到，一唔小心就會跌落斜坡！ 






好唔容易過咗更亭，只要再行前多少少，响個彎位，會有棵大樹遮掩，呢個位就最適合！ 


我慢慢喺袋入面攞出個鉗，喺鐵絲網嘅一邊，由下向上整出一個入口，咁多年無番嚟，估唔到要用咁嘅方法番母校！ 


企响樹嘅後面，喺微弱燈光下左右張望，確保安全就跑去最近嘅後樓梯，上到一樓，坐响梯級，我需要冷靜落嚟諗吓下一步。 






望住手上面呢條較細嘅銀色鎖匙，全校咁大，連天台有成六層，距離天光淨番兩個鐘左右，究竟呢條匙係用嚟開咩？


其實過咗十幾年，我已經完全唔記得當年嘅班房喺四樓定五樓，邊層可以行去禮堂，邊間房打邊間房，所有印象都好模糊，但行到呢一步，只有盡快去搵，盡力去試！ 


呢層一樓，如果無變，就係教員室同圖書館，我嘗試將條鎖匙插入前面度房門，但係條匙太細，而匙窿太大，根本就唔啱，咁 …… 即係證明呢條匙唔係用嚟開班房！ 






如果唔係開啲房門，無理由咁仆街放响班房入面，佢叫得我搵，應該係啲多眼嘅地方，我放輕腳步咁行，一轉彎，就係中間條樓梯，我應該上定落，抑或繼續向前行好呢？ 


我選擇繼續行完呢層，一路行右手邊仍然係班房，到盡頭就係前梯，就响我準備轉上二樓嗰陣，我回頭一望，發現原先中間樓梯嘅側邊，有啲閃光，我好奇行番轉頭，越行越近，終於比我發現可以用呢條鎖匙嘅地方！ 


眼前係兩排嘅儲物櫃，" L " 形咁放响樓梯側邊幅牆，想當年中四以上學生先有得用，每層有八十個左右，合共四百幾個，有啲用密碼鎖，有啲用鎖匙，有啲無鎖！ 


我用電話嘅光照向啲櫃，由最高嗰行開始試，見有鎖頭，就插入鎖匙，一扭，雖然唔係每個都用鎖匙，但淨係一樓，我已經試咗五十幾次，好可惜無一個啱。 


一樓試完，就跑上二樓，跟住三樓，然後四樓，最後 ….… 到五樓。 






時間 : 05:06 


仲有唔夠一個鐘就天光，呢層已經係最後兩排，我會唔會一開始就搵錯目標 …… 


既然最後一層，快快手試埋再算，我仔細咁由最高一行開始，第一行、第二、第三、第四、第五行，呢排又唔得，眼前就係最後一排，第一行、第二、第三、第四、第五 …… 


响我試到最底嗰行第五個儲物櫃，發現櫃面貼咗一張貼紙，一張黃色嘅哈哈笑貼紙，係呢個喇，終於比我搵到喇！！