【校園】現實與平行時空的愛情故事: 第二章 - 初戀的回憶-2（與阿詩的熟悉？）

- 第二章 - 初戀的回憶-2

由於我同阿詩係同一間小學同一班升上黎, 咁自然就會熟絡啲。

咁岩班主任就調左我同佢坐係隔離。有時上堂會傾下計, 講返以前小學既事, 有時候下對方既功課, 有時候我會幫佢出去拎下啲習作或者紙。

唔經唔覺又好似對佢有啲好感, 但又好似麻麻地想同佢拍拖, 可能佢本身係一個冇咁活潑既人, 比較文靜啲, 但係都係一個乖學生黎。

話說當年係有家政堂同木工堂, 單數學號就上學期上家政堂, 下學期就木工堂, 而雙數學號就調轉。



咁岩我同阿詩就係單數學號。

當時一知道有家政堂就即係有得學下煮野食, 心諗: 『識煮野食仲唔溝到女』

一上堂入到個家政室就灰左, 個廚房呢? 刀刀碟碟呢? 唔見哂!

只有幾張長既木枱, 一個好嚴肅同年老既Miss。

呢位Miss叫Miss麥, 一個黑口黑面既樣。



佢同我地呢班同學講, 我地今年學既就係針線。

一開始比左條深寶藍色既圍裙比我地每一個同學。

同我地講要將自己個名一針一針咁寫上去。

仲教左我地點樣將啲線穿上去枝針到, 教我地有咩針法要學, 針之前要起草稿。

好快我就開始上手, 甚麼行針步走針步回針步都已經熟悉。



不過作為一個普通男仔, 手功相比起女同學真係差啲。

不過一堂既時間比較少, 所以只係夠時間叫做起左個草稿。

對於我地呢班初哥黎講, 起草稿係冇咩難度, 但要用針慢慢刺上去真係唔係一件容易既事。

果日落左堂之後, 阿詩就立即問我點做點做。

雖然佢都唔算係一個成績差同蠢既學生, 但突然間面對起呢類手工藝既手作, 相信唔係每個人都有天份同可以好快應付到。

於是阿詩就叫我去佢屋企到教佢。我心諗: 『點解唔係學校呢? 不過可能唔夠時間同自在掛』

懷住緊張同興奮既我就答應左佢既要求。
 
無幾耐就到左果一日既來臨, 放學上阿詩屋企教佢針織。



由於佢屋企同學校既距離好近, 所以我地就行過去。

我心諗: 『單對單咁曖昧? 佢會唔會對我有好感呢?』

當我地踏出校門無耐就聽到兩把聲叫住我地, 呢兩個就係ken同阿昌。

原來阿詩仲約埋佢地一齊去阿詩屋企練習。

唔知點解有種放心既感覺。

如是者, 我地四人就去到阿詩屋企。

阿詩屋企人都算係見過, 以前小學拎成績表見家長既時候都留意到。



佢媽媽同阿詩真係幾似樣。

最後我地三個男仔就係阿詩屋企練到夜晚七點左右就決定走了。

過程當中有時我會教下阿詩點做, ken同阿昌就牛咁眼望住我地, 以佢地眼神覺得我同阿詩幾曖昧, 仲打哂眼色。

但事實上我對阿詩無咩野。當然我亦都唔知阿詩對我有無野。

就係咁, 被佢兩兄弟打眼色打足幾個鐘而完結左呢次練習。
 
經過無幾耐, 平時小息我會同阿桶阿飯等人一齊玩,但唔知點解佢地一見到我同阿詩出現既時候就會以”許氏伉儷”黎稱呼我地。

我唔知點解有種怪怪地既感覺。

或者始終對阿詩未話有心動既感覺。



結果最後佢地講講下講左個幾月都無再叫我地”許氏伉儷”