【校園】現實與平行時空的愛情故事: 第三十六章 – 錯的時間錯的人-3 (時光短暫)

- 第三十六章 – 錯的時間錯的人-3 (時光短暫)
 
時間一分一秒流逝。
 
即使想珍惜並唔係可以永遠擁有。
 
…………………分隔線…………………
 
一齊之後幾日，我同阿心約左社劇其他朋友一齊去溜冰。
 




其實我同阿心一齊左幾日，但一直都未拖手。
 
唔知點解有種仲係似朋友既感覺。
 
可能之前我地成日係埋一齊，朋友既感覺比較習慣左。
 
溜冰途中，Hedy過黎問我。
 
「唔見你地拖手既？仲未拖呀？」
 




「係呀」
 
「要唔要幫下你地呀？」
 
「唔洗啦」
 
之後Hedy就溜冰走左去。
 
跟住我就去左搵阿心傾計。
 




傾傾下突然Hedy衝左過黎我同阿心中間。
 
「做咩咁尷尬呀？拖啦！」Hedy一手捉住阿心隻手，一手捉住我隻手，等我拖住阿心。
 
就係咁，我地就真係拖住左。
 
原來有啲野其實係可以好簡單。
 
溜完冰之後，我地都自然拖住大家。
 
慢慢變成一對平常既情侶。
 
大家去完餐廳食野之後就各自各返屋企。
 
我就送阿心返屋企。




 
-中六-
 
好快就到中六，準備考DSE。
 
岩岩開學無耐，唔知係我面色紅潤定係神釆飛揚。
 
拍緊拖既人係開心啲。
 
好快就有兩個八卦既女同學黎問我，阿桶同阿飯。
 
經過佢地問多兩問之後就知道左我拍緊拖啦。
 
仲係到估阿心個名。
 




真係比佢地笑死。
 
直到我生日果日，好彩咁岩唔洗返學。
 
到左生日12點果一刻，阿心已經同我講生日快樂。
 
好開心有個女朋友陪自己過生日。
 
呢日阿心約左我一齊去海洋公園過生日。
 
我地去玩滑浪飛船，買雨衣一齊玩，雖然排左好耐，但係都好開心。
 
之後又玩下翻天飛鷹，一人一隻鷹，轉呀轉。
 
我地又一齊坐下纜車，佢同我講，其實佢懼高，唔敢望下面。




 
我地好開心過左呢一日，佢之前已經同我講佢呢日夜晚要陪屋企人食飯，所以陪唔到我。
 
好快就要同佢道別，臨走之前，佢比左份禮物比我。
 
係一個用玻璃樽裝住既星星，唔係紙摺既星星，係飲筒摺既星星。
 
佢之前有教過我點摺，但我都係唔識，原來佢就係諗住摺黎送比我。
 
佢係一個好體貼既女朋友，成日都會諗人地先，又會好細心送啲野比我。
 
我好開心有呢個女朋友。
 
好可惜……
 




好可惜過我生日之後大約兩個星期既一晚。
 
佢突然同我講佢仲好掛住佢前男朋友。
 
同佢做同學，一齊左兩年既前男朋友。
 
「我唔想一邊掛住佢，但又一邊同你一齊，咁樣我好辛苦，我又唔想你唔開心」
 
就係咁，我就決定放走佢。
 
果一刻，我冇同詠珩分手果種傷心，只係有一種失落。
 
我同阿心一齊只有一個月。
 
或者我冇咁中意阿心？
 
或者我只係順其自然一齊就算？
 
可能我只係覺得終於有拖拍既時候就已經失去左。
 
想珍惜既時候已經離開左。
 
就係咁，我又回復單身。