【Merry Xmas】我一個唔留神 撞死左聖誕老人！？: 序章

序章

「Joy to the world，The Lord is come，Let earth receive her King~~~」
       
        平安夜的晚上，聖詩佳音隨處報起，與途人們熱鬧的歡呼聲混和成一片優美動人的樂章。
 
然而在這普世歡騰的日子裡，有一個身影卻正獨自踏著單車在街上馳騁而過，與旁邊五光十色的聖誕佈置相映成趣。
 
「又到聖誕，又到聖誕！」我正以時速三百公里駕駛著我的BMW……咳咳，BMX飛快地回家。
 


「嘩，乜原來已經成11點45分架喇！」我伸出手望望錶上的時間，再俯視了一眼車柄掛著的外賣乾炒牛河配凍檸茶。
 
……
 
係呀我係無人約呀吹咩！
 
「無人約又點喎！」我駛進了渺無人煙的住宅區，不自覺大叫了起來 : 「只要我今晚可以Whatsapp阿詩同佢講到聲聖誕快樂，就咩都抵番晒！」
 
一諗到陣間十二點正我就可以同阿詩Whatsapp講聖誕快樂，真係想當堂跳番Part開心舞呀！
 


「無比溫暖，呵呵。」
 
落完個急斜之後，我轉彎駛入行人隧道。
 
點知就係呢個時候。
 
「嘭！」
 
一陣重搥相撞的聲音，我突然Feel到自己飛左係半空之中。
 


半秒之後，我一個完美背脊落地，成個人撻左係地下。
 
「啪！------」我痛到即刻禁實條尾龍骨。「嗚呀，好撚痛呀！！！」
 
一直等到痛楚散去不少，我才能夠緩緩重新爬起來。
 
「岩先到底發生咩事……」我輕揉著自己的眼睛，同時抬起頭來張望四周。
 
終於當我的視線尋覓到了應該對焦的東西之後，我的嘴巴頓時張開得可以塞得落整個合味道杯麵。
 
事關就在前方不遠處我的單車旁邊，竟然躺住了一個打扮成經典聖誕老人外表的肥老伯。
       
雖然本來係呢啲大時大節裡面有啲扮鬼扮馬的醉酒佬飲到貓晒訓係街邊係一件好正常不過的事，咁身為「事不關己協會會長」的我平時當然亦少理為妙。
 
之但係今次個問題係……我岩先好似係迎面撞到佢，仲順便使出左招「韋馱天跳躍」，搞到佢依家成口白泡咁訓左係地下到，郁都唔郁。


 
「屌，我一個唔留神，撞死左聖誕老人？！」