簡介

IG相入面,總有一張你唔捨得刪除同某人合照嘅相。佢哋都統稱為,過客。



「喂,你同佢都分咗手啦,IG做咩仲留住同佢影嘅相?」

當朋友咁問我,我總會笑住咁答:

「懶得Del姐,而且影得我幾靚仔啊。」

我係咪好傻?人哋都Move on曬,del曬相,得翻我一個咁傻仔留念。

但其實,我係唔捨得放棄段回憶。有時候我會諗,如果當日我哋嘈交,或者我讓你一步,你又讓翻我少少,可能幾年後嘅我哋仲可以再一次係呢個地方影翻同一張相。



可惜世界就只有因果,沒有如果。

我唯有,好好保存住每張相,至少你哋教識我要更加愛自己、唔再死纏爛打。

因為你,我會記得去愛自己,唔好淨係識對你好,只因付出曬都唔一定會得到相應嘅回報,可能換來你嘅背叛。

因為你,我會學識適當時候放手,明白愛情嘅世界,唔可以只有死忍,係要互相包容、互相尊重先可以一齊行到終點。勉強留低你,又有咩意思?

因為你,我習慣自己一個人。



講到底,我仲係好想你翻嚟我身邊。
事實係,你一早學識放下、忘記我。

所謂懶得Del相,只係一種藉口。

祝福你,每一個大時大節,都有一個比我更好嘅人陪住你。