各位好,我係麥啓超,香港人,係一個slashie,你哋唔駛懷疑我嘅真偽,我用嘅絕對係真名,雖然唔係咩名人,但只要用任何一個香港人常用嘅search engine實揾到我,有埋相添。

我只所以用真名嚟寫呢個故仔,或者應該話係我嘅親身經歷,係因為想大家相信我嘅說話,更想大家可以知道我哋政府背後做緊啲乜。

件事發生係2007年,11年幾之前,之所以要隔咁耐先講,係因為呢件事之後政府一直監察住我,係近來先開始放鬆咗啲,我趁佢哋鬆懈嘅時候將成件事嘅始末完完整整同大家講,不過成件事有啲長,我唔可以一下子講哂,同埋要邊避政府邊更新,所以可能會唔定期,如果隔太耐都無更新,有可能我已經畀佢哋發現咗而幽禁住,更嚴重嘅係可能我已經被消失,不過點都好,我都會盡力同大家講哂成件事,因為呢個係真人實事,所以中間遇到嘅人同事都係基於事實,真有其人、真有其事。

2007年5月19日星期6,係我啱啱18歲生日後嘅幾日,其中一個老死鄭進斌問屋企人借咗部車一早車咗我哋幾個兄弟凌文傑、關啟璋同吳振城一齊去海洋公園玩。一直玩到公園關門先走,大約夜晚8點,我哋部車駛入香港仔隧道,而可怕嘅事就喺呢條隧道發生。

唔知係咪因為太早起又玩得太盡力,一入隧道,喺燈光柔和同埋無限汽車引擎係管道回撞嘅重複催眠聲下,斌哥竟然恰眼瞓,失控撞咗去一部巴士車尾,而尾隨嘅巴士亦因收掣不及撞咗我哋車尾,成件事無死人但有6人受傷,報紙都有報導,標題係「香港仔隧道撞車6輕傷」,內文係講載住4人嘅私家車撞到巴士再被另一架巴士撞,基本上篇報導無錯,只係描述私家車載人數上少咗一個,而少咗嗰個就係我。





點解?因為我喺撞到巴士車尾嗰時成個人飛咗出車,部車擋風玻璃爛咗,我啲friends即刻落車揾都揾我唔到,喺極度驚慌之下將成件事同嚟調查嘅警察講,啲警察就告誡佢哋話千祈唔好亂講嘢,交畀佢哋,而最後結果就係傳媒報導嘅得返4人係車,至於擋風玻璃都改稱係因為撞到巴士而碎裂,成件事就不了了之。點解我會知?當然係我返咗嚟之後問返喇,但呢啲係後話。

當時我去咗邊?其實我都唔知,我只係記得撞車嗰刻飛咗出去,但又無撞到巴士,而係直接跌咗落地,之後就昏迷咗,醒返嘅時候我唔係喺隧道入面,而係喺個山度。

「可能我啲friends特登整鬼我。」嗰時我第一個閃過嘅念頭就係呢個,於是我起身大叫佢哋個名,叫佢哋唔好玩快啲出嚟,我已經識穿咗,可惜無人回應。

「玩得咁大?我就同你哋好好玩下。」係我第二個念頭,於是我就唔理咁多,趁仲有太陽就落返山揾車搭返屋企。

沿途嘅景色既面善又陌生,對附近嘅海岸線有啲印象,但又見唔到本應存在嘅建築物,我基本上可以確認我仲喺海洋公園附近,但就係見唔到海洋公園,更奇怪嘅係連香港出哂名嘅石屎森林都見唔到。





「究竟佢哋點做到咁大型嘅魔術?係咪同電視台夾份搞嘅真人show?」呢個係我第三個念頭,但附近見唔到有cam,所以我都係繼續落山向銅鑼灣方向行。

唔知幾時開始,車來車往嘅平坦柏油路變咗做鬼影都無嘅崎嶇山路,而隧道亦都消失咗,搞到我要攀山涉水先去到銅鑼灣──一個本應一年365日都逼爆人同車、商廈參天林立嘅心臟地帶,而家竟然變成民國咁只得幾層樓高嘅建築物,而啲汽車更加係老爺到無得再老爺嘅老爺車,行都快過佢,至於啲人嘅衣著更加怪異,好似電視上啲清朝人衣著咁,完全唔知發生咩事,不過該慶幸嘅係,終於見到人。

可能我嘅衣著同佢哋分別太大,好快已經畀人發現兼圍住,我好似動物園啲動物咁畀人圍觀,唔駛十分鐘,已經有兩個陀槍嘅人走過嚟帶走我,不過把槍嘅款式好似有啲舊,面對住槍完全唔敢反抗,唯有跟住佢哋行,佢哋帶咗我去一個類似監倉嘅地方就鎖住我。