嗰晚我喺香港仔隧道穿越咗: 反攻

喺最近幾日，收到好多133電話打嚟唔出聲，感覺係1啲警告，不過都無損我繼續揭穿真相嘅心，倒數兩篇，希望大家繼續支持。

我同曾皇帝問咗自家大本營所在之後，就即刻動身前往，不過四圍都係炮火，唔可以喺條街度大搖大擺咁走，只可以行山路偷偷潛行，不過好彩都唔遠。

我哋本身嘅位置係赤柱，只要係香港人都知赤柱最出名之1就係監獄，勢估唔到喺嗰面嘅世界赤柱都係有監獄，都係1樣關押最嚴重嘅犯人。由於香港島啱啱打返嚟，仲分緊贓，所以九龍都有喺度駐軍，而大本營就喺深水灣，近赤柱之餘，亦都近香港仔隧道嘅門，可以方便返去原本世界。

雖然當時係凌晨，但係夜空被爆炸、炮火同火光照到仲光過日頭，炮轟聲連綿不絕，雖然九龍軍豁出性命，但冷兵器點都唔夠火炮嚟，即使佔領香港島有繳獲一批兵器，但見佢哋都唔係太識點用，死傷慘重。

「不如我哋而家現身幫手振奮吓士氣，擺平咗呢先。」





「大局為重，想贏1定要返去大本營重整旗鼓，再一鼓作氣先得。」

「但係佢哋同送死無分別，唔幫手會全軍覆沒。」

「做大事，有啲犧牲都無辦法，如果真係想幫佢哋報仇，就快啲去到大本營，整合所有軍隊作出總攻擊！」

「我……我做唔出眼白白睇住啲人送死嘅行為，你返去先，我喺度幫手，你快啲返去再派大軍嚟救我哋喇，快！」

曾皇帝見我咁堅決，只好自己1個匆匆忙忙咁趕去深水灣。雖然我口講留喺度幫手，但其實我都唔知可以點幫。我環顧4周環境，淺水灣除咗海灘，其他都係山頭多，而九龍軍就分佈喺山上面打遊擊戰，雖然香港島軍喺開揚嘅海灘，但先進嘅軍備令佢哋完全佔據優勢，九龍軍唯1比香港島軍佔優嘅只有人數，大概2比1，但軍備嘅差距令人數優勢一下子抹去，更陷入劣勢。





「如果想贏，1定要奇襲先得。」玩三國志玩得多，啲計謀開始有用。

我跑上山，捉住其中1個九龍兵，佢1眼就認得出我係邊個，於是我對佢落1道命令：「叫所有士兵將燈火吹熄，跑落山坡，喺嗰個山窿集合，我哋要反擊！」

雖然個士兵半信半疑，但都跟住我說話去做，畢竟我喺嗰個世界嘅身份係1個將才、智將。

唔駛1分鐘，所有士兵都已經集合哂喺山窿，首先我話畀佢哋知曾皇帝安全無恙，仲返緊去大本營揾救兵，佢哋聽完無不興奮莫名、士氣大振。然後我再同佢哋講呢場淺水灣落坡戰應該點打，我有咩計仔拿下呢場戰役。最後我再教埋佢哋啲現代化武器應該點用。

唔駛10分鐘，成條team嘅戰意已經超級高昂，對呢場戰役係志在必得，喺我1聲號令之下，大家兵分兩路：上路繼續喺山上點燈佯攻，只不過我做咗啲手腳，利用隨手可執到嘅材料──樹葉、草同樹枝令燈火數量倍增，配合晚上山的濃霧令視野變差，令香港島軍以為我哋有增援，軍心稍稍動搖；下路就迅速又寧靜咁潛行接近香港島軍，喺弓箭射到嘅距離拉弓引箭，將操控大炮嘅炮手以箭穿心致命。香港島軍見狀立刻引發恐慌，不過作為對手嘅大將都唔係省油燈，1句說話穩住軍心不特止，仲即刻帶頭衝上嚟迎擊。我都唔執輸，極速叫班弓手跑返上山，敵軍見到目標出現之後，起勢係咁追上去，縱使佢哋大將發覺事有蹊蹺想叫停都無人理，1切都盡在我預料之中，除咗個大將覺得事有蹊蹺之外，佢哋1半人喺啱啱埋伏射箭嘅地方經過之後，我同1班埋伏嘅近戰兵現身伏擊，近戰之下，佢哋嘅槍炮比唔上我哋嘅刀劍，而且人數上面佔優，好快就生擒咗佢哋嘅大將，而佢哋亦都乖乖投降。





呢個時間太陽都緩緩昇起，映照住屍橫遍野嘅大地，而敵方大將嘅面孔亦都終於睇得清楚──李少光，係當時嘅保安局局長。

日出亦都為我哋帶嚟咗真正嘅援軍，雖然有啲遲，不過可以幫手照顧傷兵、押送俘虜同運送繳獲嘅武器都係好事。

「喂，文仔，而家戰況係點？」估唔到援軍係文仔帶領。

「只可以用『慘烈』呢兩個字嚟形容。」文仔搖搖頭，搭住我膊頭講：「肥璋同星姐係荔枝角邊界對抗緊新界軍，新界軍仲好似係斌哥帶領添，雖然勉強打成平手，但呢條戰線粗略估計雙方加埋死咗幾千人。另外喺藍田亦都打得好激烈，不過好似就快支撐唔住。尖沙咀就同新界香港島聯軍打緊海戰，暫時都仲係有優勢。至於香港島呢面就真係重災區，基本上除咗大本營深水灣至隔離嘅黃竹坑仲守得住之外，其他都已經淪陷，但係如果再拖耐啲恐怕都係渣都無得凈。」

「即係只有徹底攻陷香港島呢條路行，如果唔係我哋九龍就滅國。」

「雖然唔想承認，但睇嚟會係咁喇。」

「放心，我哋1定會贏。」

「咁有信用？係咪有啲咩計仔先阿超？」





「無，不過到時1定會有辦法嘅。」

兩個鐘之後，我哋大軍終於抵達深水灣大本營，我同文仔叫啲兵將戰俘關押好，然後就去軍事房揾曾皇帝商討作戰計劃。

「我認為要先收復西港島先，等我哋唔駛兩面受敵分散兵力。」

「阿超，以我哋喺呢度嘅兵力，你覺得足夠？」曾皇帝反問我。

「或者可以試下水陸兩路同時進攻。」文仔急住咁答。

「再加埋和平宣傳。」我補充。

「和平宣傳即係點？」曾皇帝同文仔同時問。





「你哋覺得啲士兵有幾鍾意打仗？」

「應該唔會好鍾意，始終揾命搏。」文仔答。

「咁點解佢哋仲要冒生命危險上場殺敵，而唔係做逃兵或者投降？」

「因為佢哋驚會死得仲慘？」今次到曾皇帝答我。

「我都係咁諗，所以如果有得揀，佢哋大部分係絕對唔想打仗，所以我嘅計仔就係先用海陸大軍壓境，等佢哋見識到我哋係軍事力量上面絕對有能力輾壓佢哋，令佢哋心理上先輸一截，然後就利用我哋啱啱帶返嚟嘅戰俘，要令佢哋開口講我哋嘅好，擊潰其他香港島軍心入面最後嘅防線，令佢哋自動投降。」

「真係可行？」曾皇帝問。

「我都唔知，不過以我哋係呢面嘅軍力，呢個係唯1方法。好在我哋對啲戰俘尚算人道，要佢哋肯幫口講應該都有機會。」

「咁我即刻帶佢哋過嚟。」文仔講完就轉身想行動，我即刻制止住佢。





「唔好咁心急，你將佢哋帶哂去客房，解哂佢哋啲手扣腳鐐，畀餐好飯佢哋食，準備水畀佢哋沖涼，預備啲乾淨衫畀佢哋換，等佢哋搞掂哂我哋先過去，守衛都可以離開，唔駛看住佢哋。」

於是文仔就跟住我講嘅去做，軍事房只得返我同曾皇帝，於是我問佢：「聽晚我哋就要走，呢場仗你打算點？」

「作為皇帝，為咗我嘅子民，無得唔打，點都要打到最後1刻。」

「哈，果然有皇帝風範，不過時間係8點，趕唔切就要等下次。」

「無問題，我哋1定會返到去嘅，我都好期待同我啲老婆仔女再見面。」

「我會同你共同進退，畢竟你係呢度唯1同我有相同經驗嘅人，如果唔係我返到去無人會信我所講嘅嘢，我會畀人當癡咗線關入青山，哈哈！」

「啊……」突然曾皇帝心口劇痛，跪咗喺地，標哂汗，我唔係醫生，對呢個情況完全束手無策，只可以去叫人嚟幫手。





醫生扶住曾皇帝1拐1拐咁上床休息，呢刻我先發現，原來佢隻腳跛跛哋，1路以嚟陪我行咁多路，琴晚又急住返大本營叫援軍，跛腳嘅佢究竟忍受住幾多痛楚去行呢條異世界孤獨生存之路？又係啲咩原因驅使佢堅持到而家？

我決定聽晚即使佢唔肯，我都要夾硬捉佢走，等佢可以1家團聚。