《給前度的一封信》: （完）

佢帶領我坐係一張長櫈上，為求我可以更加投入同舒適。

表演，開始。

「本來係為咗慶祝我同你可以重新開始而準備，但而加......不過有頭有尾都好嘅，我哋因魔術而相識，因魔術而代表結束。」佢淺笑，散發出淡淡嘅苦澀味。

佢指示我伸隻手出嚟，並且用黑色絲巾遮掩住我對手，然後詢問：

「如果要用一隻動物去形容我哋嘅愛情，你會用？」



動物？

狗？貓？蛇？兔子？

思考咗一陣，我諗呢種動物係最適合嘅答案。

「雀仔。」我肯定咁回應。

「點解呢？」佢似乎有啲驚訝我嘅選擇。



「曾經，我哋都因為愛情，而願意住係鳥籠入面，雀仔因為一日三餐嘅穩定糧食供應，所以非常留戀同享受當中，從來都無產生想離開嘅念頭，甚至情願放棄係天空任意飛翔嘅機會，都盼望係鳥籠之中渡過餘生。

直到，有一日，嗰籠開始生銹而爛，佢最初努力呼喚主人、吸引佢嘅注意，希望得到佢嘅關注而修復好，卻發現主人竟無視自己，仲認為鳥籠嘅損毀情況普遍，最後，佢仲被鐵籠內嘅爛鐵鈎而整親自己，羽毛鈎爛嘅一瞬間，佢開始意識到，呢個地方唔會成為安身之所。

即使，有一日主人理解到問題所在而攞去整，昔日受傷嘅痛苦、被人無視嘅冷落感，仍然刻印係佢腦海中，任憑其他雀仔勸說佢入翻去，佢都係好怕再一次受苦。

所以，佢下定決心飛走。

你以為佢真係無情？可以話走就走？
唔係㗎，佢每日都好辛苦咁掙扎緊。



你唔會知，佢決定離開嘅前一日，
獨自係鳥籠入面傷心同喊咗好耐，
只係，主人從來都無細心注意到。

其實，佢早就察覺到鳥籠嘅門口位置破爛咗，只需輕輕一推就可以馬上逃走，不過佢選擇等待，可惜最後都係換嚟撕裂心臟般嘅痛楚。

最後，雀仔離開束縛自己嘅鳥籠，重投自由嘅懷抱，雖然佢間中會掛住往事，不過佢一啲都唔後悔，而加嘅佢，非常嚮往係廣闊無垠嘅天空中自由自在嘅飛，唔會再受鳥籠嘅傷害，可以自己一個享受。

雀仔，本來就唔應該生活係鳥籠入面，自行築巢，先係佢哋真正嘅生活。

你話，用雀仔形容，唔係最貼切咩？」

「你講故事咁叻，可以考慮出書賣。」我分唔清呢句係讚美定諷刺。



「我哋都係自己人生嘅作者，呢個故事我就寫好，句號，就交比你負責？」

「好。」

戛然，佢拉起黑色絲帶，一隻雀仔無故憑空出現！

「如果佢代表我哋關係，咁就交比你親自放佢走，學你咁講，還佢自由？」

......

我呆住咗，唔知點反應好。
雖然我知道佢魔術技巧高，但無諗過可以做到呢個境界，甚至......估中我心思。

或者，天下最清楚我嘅人非你莫屬。
然而，就算係咁都無阻我改變主意。



「不如我哋一齊放佢走，一齊放低所有往事去重新開始，好無？」我主動提議。

「好啊，洗怕你？」

「一、二、三！」我哋一齊倒數，親手放走隻雀仔，望住佢飛得越嚟越高，越嚟越遠，就好似放下心頭大石。

從今以後，唔需要再背負包袱。
終於可以，好好咁放下過去往事。

「時候唔早，我走先啦。」不知不覺已經過咗一個半鐘，感覺就似重新經歷三年前嘅所有。

「嗯，再見。」別人眼中嘅簡單揮手道別，而我哋都清楚明白，呢一句再見，意味住，大家都唔會再次見面。

可能，我再揾唔到好似你咁嘅人，可以了解同埋明白我，或者最後要孤獨終老添。



只不過，我唔後悔自己做嘅決定。

唔向前望，又點會知未來嘅人生？
我淨係知道，盲目嘅眷戀，最後只會成為自己前進嘅最大包袱。

我嘅前度，再見了。

<全文完>