【懸疑】《連登連環殺人事件》: —-第三章—- 5.

「喂，康仔！」
 
「...嗯？」
 
「起身喇，唔好再瞓喇。」
 
「做咩啊...」康仔迷迷糊糊的張開沉重眼皮。
 
「胡Sir叫我地即刻去Safe House啊。」
 




「Safe House！？」
 
他好像聽到咒語一般，馬上清醒過來，眼前的人是芊芊。
 
「係啊，你肯定係瞓到死豬咁無睇電話啦。」
 
康仔往桌上手機瞧瞧，果然胡文軒已經打了多電話給他。
 
「阿宜出左事？」康仔瞪大眼。
 




芊芊憂心的說：「我都唔太清楚，過左去先知。」
 
兩人快步前去Safe House，甫至走廊便已看見MK晴、影姨和胡文軒。
 
他們的臉上，皆印著不悦的神色。
 
胡文軒前方還有幾個眼熟的人，當中穿綠色西裝服的老男人，康仔一眼便認出是誰。
 
「蘋果陳點解會喺度？」康仔衝上去問。
 




「搞事囉，唔通嚟幫手咩。」MK睛拿著一大盒零食說。
 
蘋果陳聽到他的話，嚴肅的說：「你嗌邊個蘋果陳呀？無大無細，嗌我陳Sir呀。」
 
康仔瞪著蘋果陳，一言不發。
 
「咁請問阿陳Sir，你肯帶埋你啲人離開未呢？」胡文軒開腔。
 
「我點解要走呢胡Sir？」蘋果陳走近向胡文軒：「呢度係警局範圍，而我地又係警察，你要我走，會唔會有啲於理不合？」
 
兩人僵持不下，互相怒目而視。
 
康仔向影姨打個眼色，示意她解釋發生何事。
 
影姨湊近康仔及芊芊，小聲說：「頭先MK晴打算幫阿宜換啲新既零食，點知上到嚟咁啱見到蘋果陳佢地係咁敲Safe House既門。佢去問咩事，佢居然話我地無資格用呢間房，想趕阿宜出嚟，所以我同胡Sir即刻趕過嚟。」




 
「我地無資格？」康仔感到荒謬的反問。
 
「係！」蘋果陳聽到康仔的話，插嘴說：「你地要保護既人又唔係咩重要證人，同兇手又無直接關聯，你地要保護個肥婆唔緊要，但憑咩可以用呢間房保護佢？」
 
「如果阿宜發生咩事，係咪你負責先？」胡文軒質問。
 
「咁又唔係喎。」蘋果陳冷笑一聲：「咁只係代表你地無能力，應該乖乖地讓出重案組既權位。」
 
「唔通你地B組既人會好過我地？只係識得阻住自己人，警隊真係比你地害死。」
 
「如果今次比你用左呢間房，保護一個唔夠資格用Safe House既人，開左條先例，咁警隊就真係比你地害死。」
 
「點解你永遠都係咁黑人憎架呢？」
 




「彼此彼此啦。」
 
此時，走廊盡頭的升降機門開了。
 
子熹踏出升降機門快步的前來，有點錯愕的望著眾人。
 
胡文軒看到子熹，也顯得有點驚訝。
 
「你點解會喺度？我唔係叫你跟實羅明亮架咩？」
 
「呃......」子熹臉上是納悶的表情。
 
「發生左咩事？」
 
「胡Sir，羅明亮入左嚟警局，直接搭升降機上到嚟三樓，我跟住佢搭下一部，上到嚟就見到你地喇。」




 
「你意思係羅明亮消失左？」
 
「恐怕就係，你地有無見過佢？」
 
「無啊......」
 
「叮叮東東......馮！！！」
 
忽然間，走廊盡頭滾來了一件鐵罐似的物體，那東西停下後噴出大量煙霧。
 
「係煙霧彈？」康仔急喊。
 
「小心啊！」
 




煙霧馬上便充滿了整條走廊，甚麼也看不見，所有人亂作一團。
 
「咩都睇唔到啊。」
 
「咳咳咳......」
 
「啪躂啪躂啪躂。」
 
「邊個撞我啊。」蘋果陳的聲音。
 
咔嚓！
 
「做咩事咁嘈啊......嘩！」
 
「啊！」
 
一聲清脆的慘叫聲。
 
「保護阿宜！」子熹大聲的說。
 
可是在看不見的情況下，其他人根本無能為力，隔了約三十秒，煙慢慢消散而去，視野漸漸變得清晰。
 
「你地無事嘛？」胡文軒咳了兩聲問。
 
「無事......」他們答。
 
「點解無啦啦會有煙霧架。」
 
「係囉，發生左咩事啊？」
 
子熹在地上拾起一個發熱而漲了的罐子：「係土製煙霧彈。」
 
「喂...」蘋果陳突然著急的說：「道門......開左啊。」
 
眾人驚訝，胡文軒馬上衝進去Safe House裡瞧瞧，但是剛走進去，他便一怔，馬上掏出配槍。
 
「...」
 
「有無咩事啊阿宜？」子熹在門外問。
 
「出哂事喇。」
 
其他人也進去看個究竟，芊芊見狀後激動的捂住嘴巴，MK晴更是嚇得尖叫起來。
 
Safe House裡的電視畫面，依然播著Netflix的電視劇「BodyGuard」。
 
阿宜，卻睜著眼睛冤冤的倒在門前的地上，嘴唇微微張開。
 
沒有任何表面傷痕，沒有流出一滴血。
 
她的身上，還貼著一張黃色便箋。
 
而阿宜旁邊，站著一個陌生人。
 
羅明亮。