【懸疑】《連登連環殺人事件》: —-第五章—- 4.

紅色格仔襯衣，深藍色牛仔褲加上vans的黑色平底鞋。連埋住這身打扮由觀塘商業大廈走出來，他抬頭眸視黑晶晶的晚空，伸了個懶腰，看起來心力交瘁。
 
拖著疲倦的身子，他走到附近的巴士站候車。
 
接二連三的兇案，加上今次身處現場，他結果被幾個綠色西裝警探多次問話，一個咬蘋果的老傢伙更不斷質問他。
 
煩厭的日子，何時才能終結？
 
街道上沒有人，連埋住倒抽一口氣，然後大喊：「啊！！！」
 




把心中的悶氣通通發洩出來，感覺好多了。
 
可是，他馬上感到強烈的眸光投向自己，環視四方卻不見有人。
 
錯覺吧，連埋住這樣想。
 
戴上耳機，把它接軌手機，他在播放歌單中選了陳小春的「取消資格」。隨著音樂奏起，他沉醉在另一端世界去，口裡還哼起歌來。
 
「最怕其實被取消資格......」
 




「好難聽啊，收聲啦......」躲於轉角街道的康仔厭惡的喃喃。
 
除了他，還有子熹和影姨窺視著連埋住。
 
「佢好似好大壓力咁喎，又嗌又唱。」子熹說。
 
「我都聽到好大壓力啊。」
 
「一陣比你慢慢發洩囉。」
 




「有道理，嘿嘿。」
 
影姨一臉茫然：「你地到底想點啊，唔係諗住捉佢埋暗角打獲下話？」
 
「差唔多啦。」康仔竊笑：「不過唔係暗角囉。」
 
「你唔好亂嚟喎，我地咁樣係知法犯法啊。」
 
「喂喂。」子熹叫二人：「車到喇。」
 
巴士徐徐駛泊到站，連埋住舉步踏進藍光車廂，付錢後直上樓梯。
 
空蕩蕩的上層，他選了最後座的右隅坐下，甫坐不久，聽到幾人也走至上層。
 
腳步聲於車廂蕩漾。




 
連埋住初時並不為意，但是當那三人分別走到他的旁邊，和前方的雙人座位時，他警戒的脫下耳機。
 
「你地......咪係上次班警察？」他驚訝的睜大眼。
 
「嘿嘿。」康仔擺出虛偽的歡笑，搭着他肩膊：「做咩見到我地咁驚啊？」
 
「我無呀。」
 
「無既話，你隻眼做咩擘到咁大先？」
 
連埋住抑壓心情，換成冷靜的模樣。
 
「幾位搵我有咩貴幹？如果係要問關於案件既事，我頭先已經同左你地同事交待過。」
 




「唔怕老實講啦，我地暫時唔係警察喇。」康仔手心用力抓壓著連埋住。
 
「喂，好痛啊，做咩阿你？」
 
「無啊，做咩啫？」
 
「你再用力我就報警。」
 
「你報警囉，你夠膽就試下。」
 
康仔以挑釁的語氣道，連埋住心生不忿，從口袋掏出手機。解鎖手機後，他按進撥電話的數字鍵盤，準備撥號999。
 
猛地，手機仿佛受到強烈吸力向上飛，消失於連埋住的視野裡。他呆了半响，才意識到子熹以閃電般的速度奪去手機。
 
「搞掂。」子熹和唐仔擊掌。




 
「兩個死仔包。」影姨也不禁失笑。
 
連埋住羞怒，意欲搶回手機：「比翻我啊！」
 
子熹把電話拿高至半空，眼神像是說「你試下嚟搶吖」。
 
他不服氣，續說：「你唔係諗住咁樣要脅我下話？我半隻字都唔會講架。」
 
康仔狡猾的皺眉頭，跟子熹打個眼色：「好唔聽話喎有人。」
 
「咁無辦法啦。」子熹用連埋住手機按進黃色笑臉app，檢查之下，果然是以admin身份登入了。
 
連埋住瞥見屏幕，馬上意識到情況不妥，大吵大嚷：「喂你地到底想點啊！」
 




子熹說：「你喺討論區已經係眾矢之的，你估下而家我地幫你作一個官方回覆，鬧返連登仔轉頭，唔知會點呢？」
 
連埋住硬嚥口水。
 
「記唔記得連登討論區冒起前，高登討論區既老闆得罪用户後既下場係點呢？」
 
「我好似有印象。」影姨把食指托頭：「啲高登仔罷上討論區，結果人流大減，損失慘重，個admin之後仲要求啲用家返番去...」
 
康仔頷首，又再用力攬緊連埋住膊頭：「你聽到個後果啦？」
 
「你...你地......」他氣得乾咳了幾聲。
 
「睇你個樣，好似未識驚啵。」
 
「如果我用你既身分，承認你就係果個兇手，唔知又會點呢？」子熹在屏幕上打起字來。
 
「唔好啊！我唔係兇手啊！」
 
「除左你仲會係邊個喎。」
 
「好啦......我講喇，你比翻我先啦。」
 
子熹沒有理會他，繼續專心打字，直到子熹打完「自首帖文」後揚言要上載，他終於忍不住爆出一句。
 
「係阿田，阿田啊！」
 
「阿田？」子熹驚訝。
 
連埋住掩眼點點頭。
 
子熹與影姨和康仔互視一眼。
 
「原來真係果個叫阿田既女仔......」影姨說。
 
「等等先。」康仔警惕的問：「你唔係為左攞番部電話，求其講個人架嘛？」
 
「我先唔似你份人咁賤。」連埋住低垂了頭。
 
「證據呢？有咩令你覺得佢就係兇手？」
 
「唉，一言難盡。」
 
連埋住輕嘆，望著掠影而過的街燈，說起半年前的故事。