【懸疑】《連登連環殺人事件》: —-第八章—- 4.
星期六的旺角朗豪坊商場，水洩不通，到處也時乘著假期閒逛的途人。
商場平台的一層，為了吸引更多人流，臨時增設了聖誕節「打卡」位置，放置一堆聖誕節卡通人像供人拍照。
胡文軒剛在商場附近的健身室做過運動，打算來商場的美食廣場吃個午飯。
他途經這個打卡位置時，見這裡十分熱鬧，他放慢腳步瞧瞧何事。
見到不少人排著隊一個個等待拍照，位置還有很多擺成聖誕老人的員工，幫助他們拍照和換領禮品。
從一旁看，聖誕節的氣氛非常濃厚。
胡文軒只是掃視了一眼，沒感到太大興趣，準備離開之際，倏地四個聖誕老人打扮的人走到他面前。
「先生，恭喜你中獎啊！」一個聖誕老人雀躍的說。
「我？」胡文軒錯愕的指著自己。
「無錯啊，你係今日第五百位行過我地打卡位置而唔行入去既途人，可以贏得終極大獎！」
「乜唔行入去都有獎攞架咩？」胡文軒有點懷疑。
「真係架，或者你可以過嚟呢邊睇下份獎品啱唔啱你先？」
「你講左有啲咩獎品先。」
那聖誕老人怔一怔，突然說：「獎金獎品非常豐富，包括FX Creation流行袋系列、加大賀花之戀系列、家電產品......」
胡文軒蹙蹙眉，怎麼這段說話好像有點耳熟？
不過見四人的衣著應該沒什麼可疑，而且獎品乍聽頗為豐富，便跟他們走。
他們一路的走，來到平台一個人流稀疏的角落位置。
「獎品呢喂？」胡文軒問。
四個聖誕老人忽然轉過頭，對他賊賊的笑。
他一驚，背後猛的有幾人用布袋由頭蓋著他整個身子，他嚇得大聲喊叫。
「搞掂，捉住左佢！」
背後的人是康仔、阿住和王伯，他們也穿上了聖誕服裝。
套緊布袋後，他們與其餘四個聖誕老人，合力抬起他往商場洗手間方向奔走。
「救命啊！襲警啊！你知唔知我係邊個啊！」
胡文軒在布袋裡大吵大嚷，令商場的人困惑的望向他們七人。
「聖誕禮物嚟架咋，嘻嘻。」王伯指著布袋對途人說：「Merry Christmas！Merry Christmas！」
途人雖然有生疑，但大多只是觀望他們，沒有上前阻止。
「呢件禮物真係夠哂調皮啦。」連埋住托著布袋吐糟一句。
好不容易，他們帶胡文軒進一間無人的狹少洗手間。兩個聖誕老人站在門外，防止有人進來。
進去後，康仔鬆脫開布袋，把袋子隨手掉到一邊。胡文軒發現自己身處洗手間，被人包圍後，顯然驚魂未定。
「呢個人，連我講獎門人既獎品佢都信，笑死人咩。」那聖誕老人脫下帽子，原來是行動組的禿子。
胡文軒跌坐地上，細眯眯的眼睛投向眾人，他很快便發現康仔。
「康仔？點解你......」
「我地將會問你幾條問題，而家唔係事必要你講！」康仔向他大聲吆喝：「只係如果你唔講，我就唔擔保你可以完好無缺咁走翻出去。」
胡文軒先是驚訝，但再次掃視幾人後，忍不住大笑起來。
「有乜野咁好笑啊？」阿住討厭他的嘴臉。
「雖然我唔清楚點解你要捉我，但知唔知你地咁樣做，起碼要坐幾監呢？」
眾人面面相覷。
「要脅警務人員，即使口頭上既要脅，刑罰都有機會五年。而家你地郁埋手腳，我諗你地真係唔識死。」
幾人面露膽怯的臉，胡文軒見狀變得戚戚得意，怎料康仔蹲下來，對他展現具殺氣的笑容。
「咁如果唔留你活口，咁你咪無得告發我地囉？」
康仔震懾的這句話，令胡文軒再也笑不出來。
「你想點？」他乾脆地問。
「答我，你同黑社會係咪有利益關係？」
「我點解要答你？」
康仔一腳踏在胡文軒的手掌上，他痛喊一聲。
「我再問多你一次，你係咪同黑社會有利益關係？」
「...係。」他以幾不可聞的聲線道。
「哼！」康仔感到荒謬的搖搖頭：「枉我以前咁信任你。」
「黑社會同警察表面上係誓不兩立，但係事實根本就係互利共生既存在。」
「歪理！」
「社會如果無左反派既角色，咁我地正派亦無存在既意義。」
「咁所以你就要幫佢地忙，偷運軍火落香港？」
胡文軒驚訝得抖了一下。
「點解你會知道架？」
全靠起底組隱藏IP地址，從暗網大幅搜查軍火來港交易記錄，並追蹤買家的身份得知。
可惜賣家的資料，卻因為多重加密而查不出來。
「係網絡既力量。」康仔瞪著眼說：「快啲講，你到底向邊個買入軍火？同埋買嚟做乜？」
「...」他噤口不言。
「我地仲查到你購入軍火既對象，正正同阿田喺暗網交易既用戶一樣......你係咪就係阿田既幫兇，今次連環殺人案既內鬼？」康仔直說對胡文軒的質疑。
「我唔係！」胡文軒厲聲自辯說：「我買軍火既事，只係同本地黑幫既械鬥有關，同呢件案絕對無關係。」
「你點證明無關係？」
「好簡單，阿田用既煙霧彈同尖錐武器我係無買過，我只係向賣家買過新型手槍，唔信你可以查多次。」
康仔望向連埋住，他馬上撥電話問起底組。過了約五分鐘，他掛線並向康仔點點頭，示意胡文軒並沒有說謊。
「而且我有乜理由要殺討論區既人呢？」胡文軒反問：「我喺今次案件上，根本乜嘢好處都無。」
一時間，康仔想不到能說些什麼，始終他說的話有道理。
除非他還有些什麼，隱藏於這塊臉後。
「偵探遊戲玩完喇嘛大家？」
胡文軒徐徐站起來，以唾棄的眸目跟所有人說：「如果你地肯唔公開我同黑幫既事，我可以將今日你地傷害、要脅總警司既事一筆勾銷，唔阻你地繼續扮偵探，否則唔好怪我唔客氣，ok？」
洗手間頓時鴉雀無聲，各人臉上也懷有顧慮。康仔明白他們的難處，因此唯有妥協。
「好，但係胡Sir我可唔可以問你個問題？」
「嗯？」
「你想唔想搵出呢個真兇？」
胡Sir一怔，認真地想了想。
「我其實唔太相信重案組有內鬼，但如果真係有，我都好想揪呢個人出嚟。」
康仔點點頭，至少他知道胡文軒跟他抱著相近的信念。
「咁你可唔可以幫我一個忙？」
「做咩？」
「話我知，你係向咩人購入軍火？」
「唔...」
胡文軒沉思片刻，老實地說：「Hearts。」
「Hearts？」
「係日本其中一個最大型既黑幫組織，佢地專門提供高價值軍火，但係費用相對昂貴，好少機構願意花咁大筆錢去跟佢地買貨。」
日本大型黑幫組織......
「如果係咁...咁點解阿田會有能力去支付呢筆資金呢？我記得當時搜佢間收藏店，係搵到大量軍火架喎。」康仔百思不得其解。
「講起呢度，其實我有啲野想講。」胡文軒說：「據我地調查資料，呢個日本黑幫組織係免費提供軍火比阿田所屬既收藏店，同佢地黑幫一貫既做法好唔同。」
「你意思...阿田同日本黑幫可能有直接關係？」
「有機會，而且我同蘋果陳曾經盤問過佢，佢話佢所做既一切都係為左佢既Angel。」
「Angel...？」
「Angel可能就係日本黑幫當中既核心人員。」
Angel，Hearts......
兩者到底有什麼意思？
Hearts……
「等等！？」康仔忽然想到了某些東西的大呼。
「做咩？」眾人疑惑。
.
.
.
.
.
.
.
「Hearts既中文......咪就係傷心小棧？！」