喪"師": 12-逃亡大計

車匙已經到手，依家要諗下計劃。
點樣避開啲喪屍出去？
上車之後去邊？
我地班有15個學生，聰仔死咗，但加埋我同隔離班嘅言仔就有16個，要點樣坐曬上車呢？其實係去向方面我早有想法，一定要去人口密度低嘅地方先安全，呢附近可以駛上獅子山山腰，落車我地再行上去。以前行獅子山嘅時候，我都留意有啲地方有人非法耕作，我諗我地上到去，有山有水，糧食唔會成問題。然後就係個個4人私家車，我地16人個要點坐呀，唔通要俾幾個人瞓入行李箱咩，會唔會谷死㗎！我揸車就一定要一個人坐駕駛座啦！副駕駛就試下坐4個啦！2個坐凳，2個坐大脾。後面就坐11個啦！5個坐凳，5個坐大脾，剩一個就自己搵位涉啦！然後到最重要嘅就係我地點樣避過出面嘅喪屍上車。係呢幾日我都可以用到自己手機，因為我本身有帶充電線係身，keep住有充電，同埋嘗試聯絡外界，但都聯絡唔到任何人。而我地每個老師嘅手機都裝咗個app，可以控制學校嘅燈同影音。我初入職嘅時候，都覺得學校嘅呢個技術好正，好先進。似乎依家可以大派用場。我諗住，係我地逃走嘅時候我關咗全校嘅燈，除咗3B課室嘅燈，開埋個到嘅廣播，3B課室係學校嘅最入面，我先將啲喪屍引到距離校門最遠嘅地方，為我地逃走爭取時間。計劃總係好理想，所以我都要幫班細路練習下至得。我集合佢地同佢講咗我嘅計劃，佢地有啲表現得好驚，怕失敗，怕出到去俾喪屍咬死。但冇辦法，我同佢地講，我地冇得簡，如果留係到我地只會餓死。逃走係我地唯一有可能生存落去嘅方法。之後，我反覆咁同佢地講我嘅計劃，要佢地背返俾我聽，亦問佢地有咩問題！佢地就好多問題，但都幫助我去完善我嘅計劃。
但有啲問題係我都解決唔到嘅！
「MISS，如果我跑得唔夠快，俾喪屍捉住咁點呀？」
會死囉！我想咁答但唔可以，我再嚇佢地，佢地到時驚到腳軟都唔知點算。係呢個時候語言藝術就好重要啦！
「我希望所有同學都可以安全上車，冇得唔得，我地都一定要得，一定要安全上車。」
佢地點頭，之後我就指揮佢地開始練習點樣上車。「你4個坐前面，其餘坐後面，到時可能會有啲人跑得快，有啲人跑得慢，我唔會同你地編位，我地要靈活咁行動，跑得快就坐入面，逐個坐返出嚟！我地要係最短嘅時間內上車。之後呢幾日我地都會練習下，6日之後我地就出發。」我拎課室啲凳係課室最入面排成車嘅坐位，叫佢地企去另一邊，我叫開始，佢地就衝去坐。頭個幾次都唔太順利，佢地都坐唔曬入去。
我壓低把聲教佢地：「你地要坐逼啲呀！貼啲呀！」




「要再快啲！」
「唔好猶豫啦！快到就即刻上車，喪屍要追到嚟啦！」
「再嚟過，1分45秒太耐啦！」
「1分鐘都唔夠！要再快啲！」
「做得好！30秒！但我知你地仲可以再快啲！」
「15 秒！你地到時要保持咁快，甚至要更快！」仲有就係我好清楚，萬一有學生上唔切車，我地就要有所犠牲。於是之後我就係佢地後面扮埋追佢地嘅喪屍，等佢地知道去到咩程度就要即刻關門。我冇明言我地要犠牲任何人，我只話要安全。
「關得太遲啦！我都可以捉曬你地啦！」
「你見到佢係最後一個俾我捉咗，你就要關門啦！」
我全程冇提及「喪屍」，「殺」同「死」呢啲字，佢地感覺呢啲演習好似遊戲咁！大概佢地都唔太明白到時失敗真係俾我地丟低。終於到咗我地要走個日，我地照計劃行事，引咗班喪屍去最入之後，我放班學生出去，班學生就輕手輕腳咁跑，我行最後。可惜「計劃終係趕不及變化」，即使我關曬呢邊嘅燈，其中一個小朋友係開校門嘅時候都整咗啲聲出嚟，吸引咗喪屍嘅注意，佢地向我地衝嚟。「跑呀！」我大叫。






#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/