喪"師": 18-我冇把握，孤身前往係最保險嘅決定

物資拎返嚟之後，我就將4塊橫額圍住綁係周圍嘅樹到，擋到幾多出面嘅視線得幾多。另外兩塊，我就放咗係營入面，依家唔凍，可以墊係下面，等個地下冇咁凹凸不平，我地可以瞓得好啲。等冬天嘅時候，就用嚟當被冚。日復日，就快係到安頓咗一個月，班學生都已經熟習咗呢到嘅生活，自動自覺幫手洗嘢煮嘢，練習爬樹。但我地啲糧食已經食得差唔多，而且啲gas都係只剩返小小，最多只能捱到一個星期。但我地種嘅嘢邊會咁快有收成，而且佢暫時得啲芽同葉，我都睇唔出其實係啲咩嚟，唔通到時我地食樹皮咩。
於是我又打算落去搵下有冇食物，睇下會唔會有生果樹個啲。同埋我都想落去山腰以下嘅地方望下，而且以前我都見過有人係下面燒烤場旁邊嘅平地露營，話唔定係個到個可以搵到啲嘢食。
因為要落更遠嘅地方，同埋越下面可能越多喪屍，我就一早梳洗好，裝咗樽水同帶咗一個蕃薯準備出發，唔係我怕我天黑前返唔到嚟！同上次一樣，小千同言仔都想跟埋我去，咁我都帶埋佢地去。我地衝到山腰以下開始放慢步速，始終，我地未行過，要謹慎啲。就到燒烤埸嘅時候，我就行得更慢，因為個到好可能有喪屍。燒烤場有4層，我地剛落到最高個層係冇喪屍嘅，我企係邊緣望向下面個層，下面就有3隻喪屍。而呢層就有兩個營，見到枱面放咗啲雜物，有一支汽水。太正啦！上面班細路知道有汽水飲一定好開心啫。
今次我都係叫小千睇水，我同言仔負責執嘢。我覺得呢兩個營一定要收返去，我地就唔使瞓得咁逼。我先睇睇入面，有兩個背囊，入面都係啲水樽毛巾牙擦同埋衫，我拎咗個兩個背囊出營，打算陣間都要帶走埋。之後，我輕手輕腳咁拆咗個營，將佢捲好收入袋。收好之後，我見到言仔拎住個個黑色大垃圾袋已經裝咗大半咁滿，我望望入面裝咗咩，汽水、公仔麵、刀、剪刀、紙杯、紙碟仲有營燈等等。我係個袋到拎返小小嘢出嚟放係另一個黑色大垃圾袋到，咁等陣間，小千都可以拎啲，綁好兩個袋之後。
我細細聲對佢也講：「撤退！」
我地就開始跑返上去，小千言仔一人拎住一個大袋，我就揹住兩個背囊，左手拎一個營　右手拎一個營。估唔到咁順利，我地係2點前就返到營地，仲夠時間清潔下兩個營，個晚就即刻用咗，我地可以4、4、3、3人咁分，瞓得舒服好多。而且，個晚我就用紙杯分咗個支500ML嘅可樂俾大家飲，一人分到1啖半到。我冇飲到，因為我唔本身就唔飲汽水，由上大學個時就已經戒咗。雖然我冇飲到，但望住佢地乾杯後嘅笑顏，我都好開心，平時都唔覺，有一啖汽水飲原來係一件咁幸福嘅事。如果唔係怕引到啲喪屍嚟，我真係好想開返開營火會，大家一齊跳營火舞同埋唱營火歌好好慶祝一下。「可樂！可樂！」我想像我地圍住支可樂係到一面跳舞、一面吶喊！
我低頭陰陰嘴係到笑。
小千問我：「Miss，你係到笑咩呀？」
「冇咩！好飲嗎？」我問。
「好飲！係我飲過最好飲嘅可樂！」




聽到佢咁講，我嘅笑意就更深。我地係營地拎到兩包公仔麵，但都只夠我地食一日，於是第二日我都係要去搵下糧食。有見沿住樓梯行都冇咩新意，所以今次我打算行樹林冇路嘅位置，雖然我真係有啲怕會盪失路，因為我平時已經好路痴，依家仲要係呢啲到到都好似一樣咁嘅樹林入面行，真係怕我就咁一去不返。所以我打算沿路用刀仔係樹上做記號，去到轉彎或者上落位就砌啲石仔係地下，咁應該就冇咁易走失。至於今次，我堅持唔帶學生一齊去，只願一人孤身前往，因為呢個我真係冇把握，帶住佢地我會好壓力，而且萬一佢地係樹林入面走失，我真係唔知點搵佢地。我嘅方向感好可能會令我漸行漸遠，一諗到呢啲情況，我就唔敢帶任何人同行。---以下為言仔角度：依家已經4點半，Miss由今朝出發到依家都未有蹤影。因為佢堅持獨自前往，冇人陪佢出去。行入樹林，我地都知比起喪屍更危險嘅係唔熟悉嘅地形，好容易迷路。
我好擔心，事實上係我地成班都好擔心，如果Miss出咗啲咩事，我地呢班小朋友根本冇可能係呢個地方生存得耐。我開始係到諗，佢會唔會迷路？以為自己行緊返嚟，其實越行越遠。會唔會俾野豬撞到受傷所以返唔到嚟？會唔會中左啲非法放置嘅捕獸器？望住時間一點一滴咁過去，我地已經食咗嘢，但留咗半個蕃薯，期待Miss一返嚟就可以食嘢休息。我地都係營帳外坐底靜靜望住Miss行入樹林嘅方向。
但直到5：05，過咗平日我地要入營休息嘅時間，Miss都未返到嚟。
天開始越嚟越黑。
我只能講：「等多5分鐘都唔見Miss 的話，我地都要入營！」


#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/