喪"師": 22-佢笑只因為佢太痛苦

以下為言仔角度：我好擔心小可，我佢傷得好嚴重，尋晚Miss安排咗佢自己同小可一個營。於是，第二朝，天一光我就出營，想睇下小可好返啲未。我一出營就見到Miss橫抱住小可向樹林方向走，我衝上佢地面前問：「Miss，小可好啲未？」
Miss冇答，只係默默留眼淚，望住懷中嘅小可。我捉住小可隻手，好冰冷，我望住小可嘅面容，已經變成陰暗嘅鐵青色。我晃然大悟，原來「死」就係咁，我捉緊小可隻手，亦流下眼淚。
我跟住Miss入咗樹林，近營地嘅一個空地，Miss放低小可係空地到，拎咗一個剷係旁邊挖，默不作聲咁係到挖，我都係到幫手挖！直到夠深夠大，Miss將小可放咗入去，亦集合曬所有人係到。
Miss強忍淚水同我地講：
「小可尋晚走咗，佢係為咗保護我地嘅田地，我地嘅糧食而死嘅！如果你地想見小可最後一面或者有咩想同佢講嘅話可以而家同佢講。」
到我地埋好小可嘅屍首之後，係上面堆成墳頭咁嘅樣，Miss就帶領我地跪低，向墳頭叩咗3個響頭，講：「小可！你安息啦！多謝你對大家嘅付出，請你一定要保佑我地！」大家走嘅時候，我只見到Miss摸住墳頭講咗三個字，我聽唔到佢講咩，但我知道佢係講：「對唔住！」之後個幾日，Miss都如常帶隊入田地做嘢，只係比起之前更早返嚟，佢係泉水嘅下游處理啲馬騮屍，將佢地拆皮，斬成小份，然後冼冼，下游嘅泉水都被染成鮮紅色。我見到Miss處理緊啲馬騮屍嘅時候眼神係空洞嘅，面無表情。當佢拎住一盤支離破碎嘅馬騮肉上嚟嘅時候，我見到佢成面同成身都係血。
「拎去煮！」佢將盤肉遞俾同學，淡淡咁講咗三個字。然後佢就落返去冼面，冼衫。
自從小可死咗之後，Miss就變到沉默寡言，除咗俾指示我地之外，冇再講其他野。發生咁多事，望住Miss態度嘅變化，我覺得佢正面臨崩潰嘅邊緣。如果再發生啲咩事，我真係怕佢，怕我地會承受唔住。但，點解？點解？點解壞事總係一件接一件咁發生？殺我地一個措手不及！小可死咗冇幾日，一日小森同小非係附近執柴，佢地突然跑返嚟大叫：「救命呀！救命呀！」
Miss抄起個剷就向佢地個個方向跑，我都拎咗枝棍跟埋去。
只見小森同小非向我地嘅方向跑過嚟，而小森就用手掩住頸上嘅傷口，手上沾滿血。原來後面有喪屍追住佢地。個啲喪屍唔係邊個，就係失蹤咗兩個月嘅詩詩同埋晴晴。Miss見到之後都豫疑咗兩三秒，但好快佢就舉起剷將詩詩同埋晴晴揮低，揮低之後又再不停剷佢地個頭，直至佢地郁唔到為止。小森同小非跑到我後面，過咗一陣我聽到喪屍嘅低吼聲，小非聽到小森嘅低吼聲都退後，同佢拉開一啲距離。Miss另過嚟望住佢地，我只見Miss早已被濺到成面血，佢一面流住兩行眼淚，一面苦笑，拖住個鐵剷向小森方向行，係小森撲埋嚟嘅時候一嘢將佢揮低，然後不停剷佢個頭，剷到佢完全失去活動能力。「又死一個！哈哈！又死一個！又死一個！哈哈！」Miss一面瘋瘋癲癲咁笑，一面望住小森條屍講，最終跪坐咗係旁邊。如果其他人唔知就咁睇，一定會誤以為Miss係變態殺人狂。




但我知道佢唔係，佢笑只因為佢太痛苦。
過咗一陣，我見Miss撐起自己極度疲累嘅身軀，係小可墳頭旁邊挖，我同小非見到都幫手挖，一齊挖咗3個大窿，為小森，詩詩同埋晴晴各自做咗個墳。
#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/