關於少女的故事: 08-奔跑吧

同劉曉晴做左跑Online情侶之後，我地同李永輝成日都一齊玩跑。

同朋友打機，可能係促進感情最有效既方法。

李永輝係跑到叫做「肥輝ovo」，而劉曉晴就叫「曉晴ovo」。

由宇宙同Emma一齊果日起，宇宙無再搵我，連跑Online都好少玩。

天氣開始凍，眨下眼就黎到十二月。





雖然我鍾意宇宙係由十月幾號既陸運會開始。

但係我唔知點解種情好深，放唔低陳宇宙。

每次係佢Facebook見到佢同Emma既甜蜜合照，我都不禁心酸。

我係度諗，唔通大波既女仔真係咁得人鍾意？

因為我覺得Emma除左大波，就乜野都唔係。





我除左每日有飲木瓜奶之外，仲有幫自己推淋巴按摩，但係結果都係麻麻地。

點解我又肥又無波？明明身體D脂肪多到可以再整多兩團脂肪出黎，但係點解D脂肪唔集中係心口呢？



對於陳宇宙，我始終放唔低，唯有希望佢同Emma快D分手啦。

我同自己講，到佢地分手既時候，我就應該盡快表白。





十二月，聖誕聯歡。

班入面，個個人都買左樣禮物，包裝好再拎出黎抽獎。

我抽到26號，份禮物睇落去仲好似好大份。

心諗無死啦。

點知一拆開，原來係5L既礦泉水。

屌。

而劉曉晴就抽到紙巾，肥輝抽到朱古力，于夏君就抽到爆旋陀螺。

佢地都嘲笑我，抽到枝咁重既水。





然後肥輝就自告奮勇話要送我返屋企，幫我攞水返屋企咁話喎。

果次係我第一次俾人送我返屋企，不過果個人係肥輝，所以根本就無咩特別既感覺。

講到送人返屋企，我諗起一件事。



中一果年下學期，我每日都同劉曉晴一齊放學咁濟。

有一日，佢突然話想知道譚越其住係邊度。跟住我地放學就係1D班出面捕佢。

等佢唔為意既時候，跟蹤佢返屋企。





明明劉曉晴都唔順路，但係都一齊搭西鐵，之後行去譚越其所住既屋村。

行到尾聲，劉曉晴話自己好似變態佬，跟蹤人返屋企。

而我就覺得好好笑，因為要小心翼翼咁尾隨譚越其，又怕佢突然擰轉頭望到我地，真係好刺激。

女仔鍾意一個人起上黎，真係可以好變態，成個痴漢咁。

上電腦堂既時候，劉曉晴仲用我Facebook偷偷咁stalk譚越其。

果陣時，有隻Facebook Game叫做Restaurant City。

我地幾乎次次上電腦堂都會玩咁濟，我地仲起到間餐廳好靚。

當時我地既夢想就係同鍾意既人結婚，然後一齊開間Cafe。





唔知係咪個個少女都有過呢種夢想呢？