關於少女的故事: 13-一天女友

返到屋企之後，原本我仲諗住劉曉晴會打黎，講個好消息我知。

點知今次收到既，係于夏君打黎。今次仲要係個壞消息黎。

我：「喂？」

夏君：「喂？黃寶靈？」

我：「係，咩事？」





夏君：「劉曉晴頭先打黎又係喊哂口咁，仲話好憎你tim喎。」

我：「下？點解呀？」

夏君：「佢話譚越其鍾意果個唔係佢，而係你喎。」

我：「無理由架。佢點會鍾意我？我同佢只係得閒傾兩句咋喎。」

夏君：「你咪話佢鍾意男仔頭性格既女仔既，你咪係囉。」





我：「我…我係咩？」

原來，我地之間既關係出現左三角形。

劉曉晴鍾意譚越其，而譚越其鍾意我。

今次，仲難解決過討厭既數學題。







人與人之間既關係，就好似玻璃。

破碎左之後，就算勉強修補，都會清清楚楚咁留下裂縫。

三月十六日之後，劉曉晴無再搵我。

其實譚越其鍾意我，都唔係我想既，點解要嬲我喎？

所以我打左電話俾譚越其，想同佢講我唔鍾意佢。

我：「譚越其，我有野同你講呀。」

譚越其：「你係咪想話唔鍾意我？」

我：「係呀，你點知嫁？」





譚越其：「我估到啦，我估你仲係鍾意陳汝州tim，係咪？」

我：「……」

譚越其：「唔緊要，你開心就夠，你快樂，我就快樂。」

我：「咁你可唔可以轉移鍾意劉曉晴，同佢拍拖呀？」

譚越其：「可以，不過有一個條件。」

我：「係咩呀？」

譚越其：「你做我一日女朋友。」





下？



我：「下？」

譚越其：「我話，做我一日女朋友，OK？」

為左劉曉晴既幸福，我諗左一陣。

我：「可以，不過要去好遠既地區，唔可以俾任何識既人見到。」

譚越其：「咁，我地今個星期六，就去觀塘行街啦。」

我：「就咁話啦。」





譚越其：「到時見，拜拜。」

我：「拜拜。」

終於到左星期六，三月二十一日。

果日我著左件紅黑格仔恤衫，黑色裙，仲戴住頂帽。

我同譚越其講到明，要去到觀塘先俾佢拖手。搭車果陣佢亦都好乖咁無做D咩。

我地落左車，譚越其第一時間拖實我雙手，十指緊扣。

呢個時候，我竟然感覺到心跳加速，無理由既，我只愛陳汝州一個。





譚越其：「你第一次俾男仔拖手？」

我：「我…我？係呀。」

譚越其：「哈哈哈，我都係第一次拖女仔手。」