關於少女的故事: 15-插班生

四月一日愚人節，譚越其同劉曉晴穩定發展左一個幾禮拜。

日日睇住佢地一齊返學放學，小息又一齊去食野或者去籃球場。

其實我睇到好羨慕，因為我鍾意既人並唔係單身。

我又唔想做第三者，破壞Tiffany同宇宙既關係。

呢個時候，手機傳黎sms，原來係杜學禮，佢話：「I love you, Bonnie.」





我回信：「唔好玩啦。」

杜學禮又send message黎：「愚人節快樂，哈哈。」

我即刻打電話俾佢：「喂，杜學禮。」

杜學禮：「咩事呀？寶靈姐。」

我：「今日愚人節，我不如試下同宇宙表白？」





杜學禮：「痴線既咩你？人地仲拍緊拖喎。」

我：「咁又係，咁算啦。話時話你做咩同我講I love you？」

杜學禮：「今日愚人節，梗係同你D愚人玩下啦。」

我：「妖！無野啦，拜拜。」

但係，多少人係愚人節講既係情話？又多少人係情人節講既係愚話呢？

時間好快去到七月，臨近暑假，某個星期五。

我地又一齊玩跑，夜啦，就開傾場傾計。

連一向淨係識讀書既于夏君都俾我地導埋，一齊玩跑。

宇宙突然入左黎我個傾場，話有野要同我講喎。

宇宙：「我好似要留班呀。」

我：「下？真係架？」

宇宙：「係呀。」





我竟然感覺到有D開心，因為可以同宇宙同級。但同一時間又燉佢唔開心，畢竟留班唔一定係好事。係咪好矛盾呢？

後黎我上學校既網站睇分班結果，宇宙果然係留係2C班。

而譚越其都轉左班黎C班，意思即係我地幾個將會一齊讀2C班。

卒之成個暑假都淨係掛住同朋友玩跑同Restaurant City，無乜點讀書。

九月一日，開學日，我地正式成為中二級學生。

第一日集隊，我見到好多同學都高左。

劉曉晴：「Bonnie，你高左又瘦左喎。」





我：「係咩？你都係呀。」



劉曉晴：「你睇下果邊，肥輝唔肥啦。」

係喎，經過一個暑假，肥輝高左，瘦左又靚仔左，直頭好似男神咁。

好彩我個宇宙都高左，btw，佢同Tiffany仲未分手。

集隊完，返上課室，一個跟住一個行樓梯上二樓。

而家係屬於班主任主持既班會時間。

我地男班主任叫黃Sir，係一個中坑。





女班主任叫Miss Chan，係一個無人要既中女。

入課室之前，黃Sir話：「今年我地隨意調位一次啦。」

因為咁，我同左劉曉晴一齊坐。

黃Sir：「我地今年有插班生，新同學，出黎介紹下自己啦，喂，鄭熙龍，出黎。」

跟住，我後面就有個同學企左出黎，去到黑板前面。

佢：「大家好，我叫鄭熙龍，英文名Hayden，因為搬屋，今年插班黎到呢度讀書，請多多指教。」

鄭熙龍個人黑黑實實，個樣仲有幾分英氣，一定迷倒唔少少女啦。





佢講完之後，坐返去我後面個位。