關於少女的故事: 17-跑步

劉曉晴切完蛋糕之後就雙手合十，許願吹蠟燭。

跟住，我地每人食D食D，就食完舊蛋糕啦。

最後，我地行左去元朗千色店，影貼紙相。

相入面有我，有劉曉晴、譚越其、于夏君、李永輝同杜學禮，六個人。

個個人對眼都P到好大，連D男仔都P到好似女仔咁。





我地都P到好似中左幅射咁樣衰。呢種回憶雖然不堪入目，但誰又未曾MK過？

十月二十三日，又黎到一年一度既陸運會。

仲記得中一既時候，係陸運會果日，我睇上左陳汝州。

佢係跑道上回眸，展現一副酷似李治廷跟王力宏的臉，簡直迷倒萬千少女。

今年，宇宙跑100米、200米同800米。





而我同劉曉晴就因為唔想落場比賽，所以就參加左啦啦隊。

「Yellow House，啪啪啪！」啦啦隊員一齊嗌口號。

陸運會開始左無幾耐，就到陳汝州上場啦。

啦啦隊長：「我地而家轉口號。大家跟我一齊叫：『陳汝州，加油！陳汝州，加油！』」

唔知點解宇宙係起點上見到我，佢好開心咁同我揮手，而我亦揮手回應。





準備啦。三，二，一，跑呀。



「咇！」一聲，賽事隨即開始！

陳汝州反應好快，聽到聲之後就瞬間跑出，領先同學一個馬鼻。

陳汝州愈跑愈快，即使後邊既同學仔發力追趕，仍然無力回天，只能在陳汝州之後屈居亞軍。

陳汝州輕輕鬆鬆咁就攞左一百米、二百米同八百米既金牌。

譚越其今次就玩跨欄、跳高同跳遠，而且都得到兩面金牌，一面銀牌。

另外，插班生鄭熙龍係擲鐵餅同標槍都分別攞到金牌同銀牌。





果然係我地班既三大運動健將，戰績都不相伯仲。

正因為如此出色，佢地幾個身邊都有好多女性朋友對佢地虎視眈眈。

即使譚越其名草有主，同左劉曉晴一齊，仍然不時收到女同學既情信。

而劉曉晴都發覺佢男朋友身邊好多狂蜂浪蝶，所以成日都向我抱怨。

無辦法，同高質素既伴侶拍拖就係咁，成日都提心弔膽，驚對方俾人搶左去。

所以好多人都寧願揀個同自己同Level或者退而求其次既伴侶。







中二果年，秋季旅行去左蝴蝶灣燒野食。

有D人鍾意燒，有D人鍾意食，而我就鍾意負責食，哈。

班男仔起左火之後，我地就開始燒。

我好肚餓，所以首先燒左D快熟既野食，例如腸仔同魚蛋。

燒完腸仔同三粒魚蛋之後，我搶先食左粒魚蛋。

所以，我個碟上面就有一條腸，兩粒魚蛋。

肥輝見到我碟野，就係度笑，笑住話：「黃寶靈，你做咩燒左條JJ出黎呀？」

我：「頂你，咩JJ呀？人地食緊野嫁！」





我望一望碟上既腸仔，旁邊仲有兩粒魚蛋，真係有D似性暗示。

我尷尬地笑一笑，然後叉住條腸，一啖食落肚。

我：「哼，而家無野啦？」我食到嚼嚼聲。

肥輝：「你食腸個樣好可愛。」

我：「你都痴線既，你食你既腸啦。」

肥輝：「係既，係既。」

後尾，直頭有人攞燒烤網黎燒野食。





甚至有人帶埋菠蘿黎燒，我食左舊，原來好Juicy，好好味。