《單戀的故事》: Ch.22

於是，我決意在一個月後相約她見面。

「點樣啊，婚姻生活係咪好幸福呢？」我好奇她發表感受。

「幾好啊，唔洗再怕會被人傷害，每次翻屋企，總會有人陪自己，再多嘅寂寞空虛，都會一掃而空。」芷晴笑說。

「其實我有樣嘢想問好耐......點解係佢？點解咁突然？唔通你有咗？！」我一口氣地道出疑問。

「我邊度似有咗！我咁Fit！你就有咗！」



「至於......點解係佢啊？

咁可能要從以前講起，

之前，我一直迷戀住Harry，但後來我發現，自己所鐘意嘅只係昔日嘅佢，今時今日，佢已經變咗到好陌生。

雖然係咁，呢份愛意我放底唔到，唯有默默咁記住，等時間去淡忘。

過咗無耐，我就遇到Ken，即係我老公，我哋第一次見，佢就話鐘意我，問佢原因，佢居然答唔知，只係感覺喎。



起初我都好抗拒，但慢慢相處落，發覺佢性格為人唔錯，還掂自己年紀都唔細，所以就接受佢。

到咗佢向我求婚，話好想同我到終老，可能係我發現，佢愛我，多過我愛自己，於是就答應咗。」

我面色一沉，

「照你咁講，你好似無鐘意過佢。」

「我鐘意佢，只係我未夠愛佢。



畢竟，有時候我一起身都會問自己，點解我枕邊人唔會係Harry，曾經我聽過這句說話，內容係陪自己過人世嗰個，唔會係一生最愛。

以前我覺得好荒謬好離譜，認為係啲人為自己作借口。

只不過，自己嘅一生最愛，永遠都唔係對方嘅摯愛。

對於無法得到及遙不可及嘅事物，人總係傾向留戀。

人啊，始終係犯賤。

不過，我會努力去令自己慢慢咁習慣有佢嘅生活，慢慢咁學識去愛佢，慢慢咁學做好老婆。」

原來如此，難怪她當日會以「努力」的詞彙去形容自己對Ken的感情，始終，她不愛他啊。

但是，她這樣的心態，不就對Ken不公平嗎？Ken可是非她不娶，而芷晴，卻是心繋他人。



「係我眼中，你咁樣做一樣自私，咁咪等於精神上出軌？」我難以竭止怒氣。

「唔好扮企係道德高地講我啦。

唔通你敢講，同女朋友一齊嗰時，一刻都無諗過我？

你可以承認，真係完完全全咁放低咗我？

你可以發誓，你個心只有女朋友一個？

如果你心入面無我，咁點解你仲成日嚟揾我？一句講曬，因為你仲鐘意我！

你根本，同我無分別。」



甚麼？她居然強行把我拖下水？我只是出於朋友的關心而已......

「你講咩啊？我只係關心你咋！我哋係朋友嚟㗎，你點可以咁講。」

真的只得純友情嗎？不帶任何愛意？

腦海中，忽然浮現此問題。

「答案，只有你自己知。

有啲事，唔洗講得太白。」

說罷，她轉身離開，而我，也沒有挽留她的想法。

芷晴好像變了......還是我一直都未能了解


她？

不過，我仍然相信自己心裏只有女友，絕無他人存在。

作者的話：呢幾日遲更唔好意思，所以今日會加更，同時聽日應該可以完故！