Miss Chan 再笑住話 : 「唏, 唔夠你講嘞, 喂, 唔好走住, 幫 Miss 入房舉咗啲喼上柜頂度先走, 食我餐飯就緊係要使到你盡架啦。」
 
呀俊開始行入房度幫 Miss Chan 舉喼, 但當呀俊擒高幫 Miss 舉第一個喼上柜頂嘅時候, 個喼原來未鎖好就彈開咗, 部份喼內嘅嘢響柜頂上跌咗出黎, 而且當中仲係一啲好香艷嘅性感女性內衣褲黎添。
 
呀俊快快手塞番啲嘢入喼度鎖番好, 跟住就再裝吓企響下面嘅 Miss, 好彩 Miss Chan 望唔倒佢啲好嘢跌咗出黎, 如果唔係就真係尷尬死佢都似。
 
呀俊好快就將幾個喼搬哂上個柜頂度, 但番落黎後就面露住古古惑惑嘅表情黎同 Miss Chan 講 : 「搞掂, 嗱, 我呢個呀四係唔係好使好用呢?」
 

 


Miss Chan 又笑住講 : 「OK 啦, 個呀四咁靚仔就緊係掂啦。」
 
但呀俊又笑笑口咁話 : 「點呀? 仲有咩要我呢個呀四做架?」
 
見 Miss Chan 響度扭扭擰擰好似有啲嘢咁, 跟住好快佢又再同呀俊講 : 「喂,  有樣嘢想問吓你, 如果….我而家主動咁打電話去搵一個男仔,  咁唔知會唔會係有啲唔好咁呢?」
 
呀俊聽倒後心內葡萄咗一秒鐘倒, 但跟住好快就再扮無嘢咁同 Miss Chan 講 : 「咦, Miss 妳咀角含春喎。」
 
Miss Chan 聽倒呀俊咁講即時就呱呱大叫打住佢黎講 : 「喂吳英俊你講咩嘢呀?」
 


從來講中女性心事對方先至會有咁嘅大反應, 呀俊知道 Miss 想搵果個應該會係佢鍾意嘅人黎。
 
果然真係無估錯到,  Miss 跟住就再同呀俊講 : 「你頭先講得啱, 我都應該要比番啲機會自己同埋人哋嘅, 話你知啦, 呢個男仔其實係我以前嘅舊同事黎嘅, 不過以前佢曾經向我表白過幾次但我就無理倒佢, 但之後我就真係覺得有啲後悔嘅感覺, 所以而家我想打番電話比佢, 但咁夜又唔知怕唔怕會騷擾倒人, 而且我應該要同佢講啲咩先至好咁呢?」
 
Miss 已經春心動到唔識得冷靜同理智, 而呀俊就暗地裡嘆住氣黎同 Miss 講 : 「緊係唔怕啦, 有女仔半夜打電話比我我都會陪佢傾通宵啦,  而且Miss 妳咁嘅做人態度先至係正確架嗎, 唔好諗嘞, 難得燃起咗心中果團火, 妳咪就先約佢搵日出去食餐飯到時再諗吓講咩先算囉。」
 
Miss 已經亂到無哂主意, 但既然呀俊咁樣講到, Miss 就真係攞起個電話按鍵就打去。
 
望住 Miss 個緊張樣, 呀俊心內就滿不是味兒, 電話似乎已經接通咗咁, 但呀俊就隱約聽倒對方果邊傳黎咗一把女仔聲響。
 


Miss 正好緊張咁講 : 「唔該我想搵 Raphael Yip 吖。」
 
但好快呀俊就聽倒 Miss 個電話入面果條女正傳黎狂鬧。
 
「妳邊位咁夜打黎搵 Raphael 呀? 呢個時候打黎搵佢妳想同佢講啲咩呀?」
 
Miss Chan 嚇到口窒窒咁講 : 「無….., 我….係 Raphael 嘅舊同事, 我……」
 
對方條女正在爆粗咁鬧住 : 「舊咩撚嘢同事呀? DLLM 妳隻死臭雞吖,  Raphael 如果唔係去咗廁所我都唔知咁夜都仲會有啲死臭雞打電話黎搵佢, 妳隻死臭雞吖, 明知人哋有女朋友都仲…….」
 
呀俊好快搶咗 Miss 手上個電話黎講 : 「嘿, 妳老母生到妳把口都幾賤喎,  (好大聲加急口令) 我而家屌 L 番妳老母呀, 妳個冚家剷吖, 自己做雞就話人哋係雞, 我而家 x@#&%☆.........媽叉妳呀。」
 
呀俊鬧完收咗線後, 眼前嘅 Miss Chan 正紅住雙眼再唔住個咀咁, 呀俊比番個電話 Miss 再講 : 「所以話, 粗口係要用黎對付呢啲人架嗎。」
 
Miss Chan 滴咗一滴眼淚出黎再苦笑住講 : 「算啦,  不過以後我都唔會再做呢種傻事架嘞。」


 
呀俊聽倒 Miss 咁講就百般安慰住佢, 但就估唔倒響一個電話之後, Miss 居然就咁比人打沉咗落嚟。