《印度 · 尋油 · 台灣妹》: 《一》

蝦佬！我叫阿達，今年二十六歲，有一份穩定職業，無不良嗜好，朋友多數叫我做 「文西」，唔知點解，前女友好唔鍾意呢個花名，但我又覺得無乜問題吖，「達文西」都係一句啫。平日除咗番工放工之外，一有時間我就去旅行，長途又好，短線都好，總希望去唔同國家見識下！


上個月同老死花仔強食飯，席間佢話計劃月尾去印度旅行，唔跟團，問我有無興趣，我諗咗一陣，見印度又未去過，加上月尾有假，咪答應佢囉！


同花仔強去旅行有樣好，佢份人好鬼穩陣，去之前一定會計劃好晒先出發，邊日去咩景點、搭咩車 …… 全部上網同睇書搵齊晒，相反我份人就比較懶，乜都唔洗理就啱晒我。


決定咗十一月二十一號出發，玩五日，上網訂好機票，辨理好晒簽證，諗住帶小小嘢，就等出發嗰日，當然口頭上都要同公司老細講句啦，啲同事知道我去印度玩，仲要自由行，個個都好驚訝，靚太珊姐就問我印度有乜好玩，隔離枱阿鬼就叫我小心個 "菊花仔"，有咩事唔好反抗， 上司大鳥哥就叫我帶定支KY响身，遇到啲咩野，反抗唔到咪享受吓囉！你一言我一語，水花四濺，見佢地仲興奮過我，我心諗 "去印度啫，駛唔駛講到咁可怕啊，最多咪小心啲！" 我笑一笑，就無理佢地。




出發前兩日，下晏食完飯番到公司，諗住去廁所開個大，點知一推門，大鳥哥就衝咗入嚟，佢鬼鬼鼠鼠望咗兩眼，就一手拉咗我入去最尾嗰格，然後轉身鎖門，我比佢突而其來嘅舉動嚇一嚇，我口震震咁問


「大鳥哥，你 …… 做咩啊？我 …… 係咪做錯咗啲咩？」


「達仔，我想你幫我做樣野！」大鳥哥笑淫淫咁望住我




依家兩個男人面對面，仲身處同一廁格，望住佢個淫樣，令我即時諗起阿鬼之前講過，話大鳥哥好似係攪 …………


「大鳥哥，即係咁 …… 會唔會有啲咩誤會呢？其實 …… 我係百分之百鍾意女人，當然，我都完全支持同性戀合法化啦！但係阿大鳥哥，呢個 moment 你 …… 可唔可以比條生路我行吓？」


「屌！你係咪儍撚咗啊，我想你幫我响印度買樣野咋，白痴仔！」大鳥扯扯地火咁講




「駛唔駛咁神秘啊，究竟買啲咩咁緊要？」我挺一挺胸咁問


見佢雙眼半開半合，嘴角含春咁，跟住細細聲講


《印 · 度 · 神 · 油》