講開花仔強,都要介紹一下!呢個老死我小學就識到依家,由細玩大,佢份人好識得講嘢,把口過油,同我啱啱相反,咁都做到死黨,真係無野好講!


唔好以為叫花仔強就係 "青頭仔",原本佢叫高強,高大靚仔,有啲似吳彦祖,成日蒲老蘭,咁就自然多野食㗎喇!佢嘅宗旨係 "有食唔食,罪大惡極",點知一次唔小心,食錯野,瀨咗性病,好彩唔係世紀絕症,椰菜花啫,咁緊係比我笑到仆街啦,咪叫佢花瘤強囉!點知條死仔又話反面,又話絕交,OKOK,自此咪改咗呢個朶囉!


約咗花仔強响機場嘅星巴克等,我準時七點十五到,離遠已經見到佢响度溝緊女,死性不改,佢見到我即時比個眼色,意思當然叫我死開一邊先,咪阻住佢搵食,我咪行咗過對面度坐,五分鐘左右,見到條狗公滿面春風咁,緊係又抄咗牌啦,佢一坐低就講


「十九歲妹响澳洲番嚟度假,樣靚有身材,唔錯唔錯!」




「死仔,你溝少陣女會死㗎咩?講番正經先,今次行程你係咪計劃好晒?我咩都無睇過靠你㗎喇!」我問


「我辦事你放心,保證行程精彩,包羅萬有,上食下食,超級超值!」佢一邊講一邊淫笑


「吹水你就叻,嗱嗱聲去登記,然後入閘啦!仲早咩?!」 我無理會佢,一路行一路講




今次我地搭新加坡航空,先到新加坡,再轉機去印度嘅新德里機場,估計全程十個鐘。一上到機,條死狗公又四圍睇下有無咩目標,我就無佢咁好氣,晨早流流起咗身,瞓多陣先。點知隔咗陣,聽到把女人聲講


「先生,唔好意思呀!」


開眼一睇,响我前面係一位二十零歲,長髮大眼嘅女仔,原來佢想我讓一讓開比佢入去窗口位,我講咗句




「Sorry!」


之後就起身,佢點一點頭,加一個甜美笑容,兩邊面上仲有酒窩添,殺死人咩!唔駛講我緊係醒晒啦,仲坐得直一直,我扮晒不經意咁望一望佢,見佢攞住本新加坡旅遊指南,咪借啲意講


「去新加坡玩呀!」自己問完都覺得幾廢


「係呀!你都係?」 個靚女有禮貌咁答


「我?唔係,我去新加坡轉機去印度啫!新加坡係一個唔錯嘅地方,有好多嘢玩,好似聖陶沙、環球影城、新加坡摩天輪 ……」我扮晒專家咁款




「嘩!你咁熟嘅,去過好多次呀?係呢印度有咩玩㗎?成日睇新聞報道,好似好危險咁!」佢個樣好 "卡娃兒" 吖


「新加坡去過一次啫!上年同屋企人去,今次就同朋友去印度,佢負責行程,哈哈,我都唔太知有咩玩,我估都係去下恆河、睇下寺,飲飲食食,買下野咁啦!」


「印度有咩買呀?」佢好奇咁問


「哈哈,我都唔清楚有咩買, 不過我老頂話印度神油好用,咪睇下有無囉!」我隨意咁答


當佢聽完我講之後,唔知點解面上嘅笑容突然消失晒,取而代之嘅係鄙視、不屑嘅眼光,跟住就轉身望窗,無再講過一句嘢,好似我激嬲咗佢咁,但我又唔覺我講錯咗啲乜。




"諗住做個朋友啫,唔駛咁難觸摸呀!" 我心諗,算數,唔啱傾嘅咪繼續瞓。


瞓到迷迷糊糊,發現花仔強已經坐咗响度,仲用手踭撞咗我兩嘢,正所謂 "阻人瞓覺,尤如殺人父母",我極之不滿咁話


「想點呀?大佬」


「隔離條女幾得喎,調過位吖!」 狗公搖晒尾咁講


「佢?傻嘅,一陣你食屎食着豆,又瀨嘢,咪話我無提過你呀! 」我語重心長咁講




「傻?唔撚係嘛?咪吹水喎!」 花仔唔多信我咁款


「呃你托咩,唔信就算!」我都無佢咁好氣,講完再瞓過。