《印度 · 尋油 · 台灣妹》: 《六》

一覺瞓到朝早八點，起身小完便行去窗口，拉開窗簾一睇，嘩 ~ 陽光普照，藍天白雲，下面係藍色嘅大水池，平靜嘅池面閃閃發光，對面係翠綠嘅樹木，望落去已經好舒服，唔係身處其中，都唔知自己响印度。 


花仔強比啲日光攪醒咗，頭髮蓬鬆咁講


「一起身就見到你個仆街，點解唔係女………………！！」 


「大家咁話啦！快啲起身刷牙換衫啦，樓下咪有女囉！狗公！」我作出反擊 




「係噃，你啱！」 佢講完之後，一個蜈蚣彈飛咗入廁所。 


我同花仔早咗十分鐘到餐廳門口，等咗一陣，已經見到 Priscilla 同 Heidi 行緊過黎，今日兩位靚女都以輕裝上陣，衞衣波鞋牛仔褲，少女十八無醜婦，青春真係無敵，著咩都靚。我地行前兩步揮揮手，大家打過招呼後，就一齊入餐廳，坐低之後，Heidi 就講 


「你們等了很久嗎？」 




「能夠有機會等，是榮幸來的？」花仔強駛出一冠冧女招數，氹到 Priscilla 同 Heidi 會心微笑，我呢啲講野唔叻嘅，真係坐埋一邊睇表演咁濟。大家攞完野食，一路食，一路傾，可能 Priscilla 見我唔多出聲，竟然主動同我傾計，我就用我有限嘅國語加英文回答，大家開開心心咁食完個早餐。 


不得不佩服花仔強嘅細心，一早向職員叫定兩部的士，雖然印度大部分人都識英文，但原來唔包括的士司機，所以佢叫職員同司機講定行程，首先去阿克薩達姆神廟，之後行 Paharganj 市集，食完晚飯先番酒店。 


行出酒店，已經見到兩部黃色頂綠色身嘅三輪車，兩邊無門，得兩碌扶手柱，感覺好唔安全咁，但都無計。花仔建議不如一男一女一架車，咁會安全啲，問兩位靚女介唔介意，佢地都話無所謂。花仔就話同 Heidi 一架，我就同 Priscilla，分配好晒，烈火戰車準備出發，臨上車前，花仔同我笑一笑，單單眼，正一古惑仔。 




上到車，我同 Priscilla 都無乜出聲，尷尷尬尬咁，我用簡單英文問司機車程幾耐，佢答完，我都唔係好明，估大約一小時咁上下。 


凹凹凸凸嘅沙泥路，一路上我地架三輪車都係搖嚟搖去，好似就散咁，我見 Priscilla 驚驚地，揸到支柱實一實，咪主動問下佢野，希望佢無咁驚，大家傾下傾下， 已經差唔多到阿克薩達姆神廟，好衰唔衰，架三輪車唔知碌到啲乜，攪到我成個彈起，一嘢撞上個頂度，好彩個頂用帆布做，所以唔係咁痛，點知 ..