《印度 · 尋油 · 台灣妹》: 《八》

行前多少少，見到前面有間賣香料嘅鋪頭，二話不說就行咗入去。 


鋪頭入面放置咗好多唔同顏色嘅香料，紅、橙、黃、綠、啡、灰、黑 …… 差唔多咩色都有，有啲一條條，有啲一舊舊，有啲一粒粒，林林總總，粗略估計都有幾十袋。 


Priscilla 同 Heidi 好好奇咁指手畫腳，花仔強就企咗响門口休息，而我就行去櫃檯前面，見到有個上咗年紀嘅叔叔，就問佢 


「HELLO！DO YOU HAVE INDIAN GOD OIL？」 




「GOD OIL？」佢好似唔多明 


「唔 …… INDIAN OIL？」 我再簡單啲咁問 


今次佢諗一諗就答 …………




「FOR CAR？」 


“大叔呀，我入得你鋪頭又點會 FOR CAR 吖，咪玩喇！“ 我心諗 


「NO， NO，FOR COOKING！！」 我開始有啲忟咁話 




佢諗咗陣，跟住轉身伸手上櫃頂，攞咗支細細樽嘅野出嚟，再同我講 


「THIS ONE IS VERY GOOD FOR COOKING！！！」 


我接上手一睇，上面全部都係印度文，我識條鐵咩，問阿叔幾錢，佢話七百盧比，又唔貴，買咗可保平安，無慮即決。 


天色漸黑，原來已經七點，我地打算食埋晚飯先番酒店，一來平啲，二來夠地道，於是周圍搵下有咩吸引又特別嘅野食，點知搵搵下，一不留神越行越入，行咗入啲後巷仔入面，正想搵路行番出大街之際，發覺有啲唔妥，感覺到好似有人跟住我地咁，我壓低聲線同花仔講 


「花仔，有啲唔對路，你覺唔覺比人跟踪緊！」 





「你都覺？嘗試行快兩步睇下咩環境先！」花仔就話 


我地一人拖住一件，三步當兩步行，Priscilla 同 Heidi 突然比我地拖住行，都嚇一嚇，但見到我們一面認真，只好繼續急步咁走。只可惜，拖住一個著住民族服嘅女仔，快極有限啦！ 


微弱嘅街燈下，堕入圈套嘅四隻肥羊突然停低，因為 .......... 狼終於來了！前面突然閃出兩名蒙面男人，一肥一矮，手持利刀，對住我比大嗌一聲 


「MONKEY！！」 


「？？」我地四人即時都比唔到反應，隔咗兩秒 




「仆街，MONKEY or MONEY 吖？」雖然比人圍緊，但係花仔竟然仲識講笑 


「MONKEY！！」個肥賊再嗌一次 


我地都無佢咁好氣，由得佢 MONKEY、MONKEY 到飽！ 


我再回頭一望，後面仲有一對，無啦啦比四條友圍，我第一個反應係 


"今次仆街喇！！"