《印度 · 尋油 · 台灣妹》: 《二十四》

酒店距離銀行只係二十分鐘車程，去到對完護照同相關號碼等資料，好快就攞到錢，行出銀行見到對面有座大型商場，咪行去睇下，順便買啲手信。 


唔知點解，印度啲商場可以咁大，外圍掛滿大大小小嘅廣告板，細心一睇，除咗老麥之外，其他牌子都唔多識。 


呢個四層高嘅商場有啲似愉景新城，我隨意周圍行，見到有間賣茶葉嘅鋪頭，入去問下有咩好介紹，個老細好好人，係咁請我試飲，我揀咗佢極力推介嘅 MASALA TEA，買咗兩包孝敬老豆，之後入咗一間賣圍巾嘅，位姐姐就介紹我買一種叫 "PASHIMINA" 嘅圍巾，有淨色，有暗花，話啲女仕一定喜歡，我買咗三條，一條媽子，一條家姐，一條比 "佢" 。 


行咗兩個零鐘，一抽二褦，準備離開商場番酒店，忽然，我目光比一樣野吸引住，响一個平平無奇嘅廚窗入面，放咗好多無可能睇得明嘅藥物，但係當中有一盒竟然深深吸引住我，灰色呈長方形嘅盒，正面印住兩個印度男女嘅公仔，上面寫住 




" FEEL THE HE-MAN IN YOU " 


而下面就寫住 


" FOR HAPPY LOVE-LIFE " 




畫公仔都畫到出腸，呢支仲唔係我一直搵嘅 <印度神油>，誇張到出 HE-MAN，有無咁堅吖？用之前駛唔駛大嗌一聲 

「請骷髏頭堡賜我力量！」 


為免再生誤會，我就行入去問個清楚，個肥阿叔見我鬼鬼鼠鼠咁問神油，好仆街咁大大聲聲嗌出嚟，攪到啲人望鬼住我，唔知佢真專業定玩鬼我，攞條假狗出嚟示範比我睇，又咁又咁，我頂佢唔順就問 


「OKOK. HOW MUCH？」六百盧比？無慮即決，閃。




手握神油，令我諗起辛棄疾 <青玉案 > 當中一句 


"眾里尋它千百度，驀然回首，神油卻在廚櫃最高處" 


搵錯，再搵，搵到又唔見咗，以為搵唔番，又無啦啦會遇到，呢一刻我異常激動，咁都可以搵到支神油，係咪暗示我仲有可能再遇 Priscilla 呢？ 


諗番轉頭，根本就係一字咁淺，買藥緊係去藥房㗎啦，起碼感覺安全啲同有保證吖，之前攪咁多野都唔知為乜，呢啲連小學雞都識嘅常識，我無奶油咁失敗㗎，一定係鬼掩眼。 


我攞住一袋二袋番到酒店，開門諗住同花仔講搵到神油喇，點知見到 Ankit 坐咗喺度，係喎，尋晚約好今日電聯，唔記得咗添，花仔笑淫淫咁叫我快啲過嚟，我放低啲野就行過去，見花仔手上面揸住本相簿，咪問佢有咩好野睇，佢就遞本野比我，叫我自己揀，打開一睇， 




WHAT IS THIS？