《印度 · 尋油 · 台灣妹》: 《三十二》

落到樓下，我開始支持唔住，勉勉強強坐咗响對出花槽，慢慢攞起張廁紙睇，嘩 ~ 成廁張紙紅鬼晒，諗住喺褲袋攞過張新嘅，但係頭痛加上失血過多，撑到呢刻，真係無晒力，眼前一黑，「嘭」一聲跌咗落地，連張開雙眼嘅力都無，只係聽到周圍好嘈，好多人，最後乜都聽唔到就暈咗！ 


「Priscilla！」我大嗌咗一句 


啊 ~ 我喺邊吖？望一望周圍，原來正身處醫院張床上面，護士小姐見我醒番，行過嚟問我有冇邊度唔舒服，我話除咗個頭有少少痛同攰攰地之外，無乜嘢，佢叫我休息一陣，醫生轉頭會過嚟。 


護士小姐走咗，我就攞出手機，打比花仔強，就講 




「花仔，我啊！一陣得唔得閒？」 


「得，去邊度威？」花仔開心仔咁話 


「我喺QE，頭先响街暈咗，你收工過嚟接我得唔得，我唔想比屋企知！」我捽捽頭就講 




「咁大鑊，你無嘢嘛？有冇邊度受傷？」花仔好緊張咁問 


「我冇事，少少頭痛同有啲攰啫，花仔呀，我記得番晒啲嘢！」我好嚴肅咁講 


「吓，印度嗰啲？」花仔驚訝咁話 




「係啊，你嚟到先再講啦！」 


「好，一陣見！」花仔收線之後，我再從聽 Priscilla 嘅留言，一次、二次、三次，心情越聽越沉重。 


陰差陽錯之下，又回覆番啲記憶，但已傷嘅心，應該如何修補？下一步又應該點好呢？



花仔幫我辦理好晒啲手續，兩兄弟就搭小巴落佐敦，搵咗間茶餐廳傾計，我就講番頭先番到公司所發生嘅事比花仔聽，佢聽完就話 


「唉 …… 都係我唔好，講啲唔講啲，話漏咗比你知有關神油嘅嘢，攪到你依家咁！」 




「整定嘅，是福是禍好難講，依家咪幾好，一來記得番成件事，二來比人炒魷，補番一個月人工，咁就有錢去搵 Priscilla，又唔駛請假，咪當放個短假，去完台灣先再算！」我故作輕鬆咁講 


「你真係諗住過台灣搵 Priscilla？」花仔好認真咁問 


「過就過硬㗎喇，但過之前都要計劃下！」我一面誠懇咁答 


「嗱，做兄弟一定全力支持你，有冇咩要幫手？」花仔拍一拍我膊頭咁話 


「有，同我一齊去！」我直接了當咁講 




「吓，去台灣？咁咪又見到 Heidi？」花仔望一望我 


「你仲好驚佢咩？你兩條友都熟到爛啦！」我笑笑口同花仔講 


「邊有話驚啫，去咪去，我實撑你㗎！」花仔拍拍自己心口 


「好兄弟！」 


電話突然響起，一睇，屋企打嚟，一聽電話就話 




「喂喂喂，搵邊位？」 


老豆响電話入面相當緊張，下十二道金牌命令我即刻番去，收線之後，同花仔講話屋企有事要走先，再電聯，我就飛的番歸！


番到屋企，氣氛出奇平靜，老豆坐咗响梳化度睇報紙，媽子就喺廚房度煮餸，而家姐應該仲未番，左望右望都無咩特別。 


忽然，老豆「殊」咗一下，打個眼色，意思係叫我入去房，入到房，佢輕輕力將門關埋，然後轉身， 


O-MY-GOD ~ 我的天啊！究竟發生咩事？ 




只見老豆下體扯到行一行，仿如神州十號已經進入發射階段咁款，估唔到老豆仲咁有心有力，佩服！ 


老豆見我望到眼甘甘，就話 


「你個衰仔仲望，係咪想謀殺老豆分身家？」 


「吓，又關我事？」我好無辜咁同老豆講 


「唔關你事？我攪到依家金槍不倒，咪就係噴咗你嗰支止汗噴霧囉！」雖然老豆好嬲，但又唔敢咁大聲 


啊！！！！係喎，唔記得比咗支神油老豆添，今次大檸樂，媽子有排受鳥！ 


既然唔錯都錯咗，唯有繼續扮傻先。 


「人地比支止汗你噴，因乜解夠你噴下面吖，老豆！」我扮傻咁同佢講 


「我見支嘢凉凉地，咪噴幾下囉，點知攪成咁啫！」老豆講到彎晒腰 


「可能支嘢過咗期咪攪成咁，無嘢嘅，好快冇事！」我繼續扮矇安慰老豆 


「你個衰仔仲講大話，我瀨完嘢，緊係上網查下支嘢啦，打 STUD，乜都出晒嚟，神油當止汗劑比我用，我告你謀殺！」老豆作勢想鍊鬼死我 


「誤會啫，誤會啫，諗深一層，其實咪益咗你，原本一個月一劑，月試嘅，依家一晚七劑，你應該多謝我先真！」 


「仲笑我，我鍊死你個不肖子！」 


「喂，你兩仔爺好出嚟食飯喇，關埋門古古怪怪咁！」救星媽子殺到，我順勢開門走出去食飯，老豆就一小步，一小步咁行出嚟，估唔到呢支神油嘅威力咁可怕！