辦理完手續,攞埋行李,我同花仔就昂首闊步咁行出大堂,一出就見到 Heidi 不停揮手示意,我地亦好興奮咁揮動雙手。 


唔知點解,今次花仔強見到 Heidi,一啲都唔驚, 仲挺咗下胸,充滿自信咁款,相反 Heidi 就好小鳥依人咁撟住佢隻手,望住呢個咁古怪嘅情景,一定發生咗啲嘢。 


花仔見我咁奇怪,就細細聲同我 


「挑,淨係你識溝台灣妹咩,哈哈哈!」 




「哦,祝你地白頭到老,年生貴子呀!」我笑笑口就話 


「吊,講呢啲,行啦!」 


我地一行三人就坐上預先準備嘅車,向 Priscilla 家出發,Priscilla 住响忠孝東路,即係101嗰頭,Heidi 話車程唔係好耐,大約十五分鐘左右。 




基於費事眼冤做電燈膽,我讓對 "黐" 情男女坐後面,我好識做咁坐前排,當架車慢慢離開機場,我開始覺得成個世界無晒聲,好靜好靜,即將嚟緊嘅係我人生一個重大關口,比當年十八歲放學著住校服行好景買咸碟,遇到訓導主任更加緊張,一生嘅幸福就掌握响我手,未來呢半小時就係所有嘢嘅關鍵,俗啲講句


「有前冇後,打死 __ 就!」(請填上適當數字) 


真係話都無咁快就到,架車停咗响一幢大廈前,落車一睇,嘩 ~ 眼前係一幢用米白色花崗石造嘅建築物,古典得嚟又有現代感,雖然望落去好似兩個 "凸凸" 字咁,但我估計應該都唔平。 




抬頭望住呢幢大廈,我額頭不其然流咗滴汗,就問 Heidi 


「Priscilla 住在這兒?」 


「對,八樓!」Heidi 就答 


「這兒很昂貴嗎?」我有啲唔好意思咁問 


「算貴吧!差不多一億台幣!」 




「100,000,000 台幣!!!!!!!」我發覺背脊出緊汗 


「對,台北市沒有不貴的地方,哈」Heidi 笑微微咁話 


聽見 Heidi 咁答,額頭又流多咗好多滴汗,一股蠻勁開始遇到考驗,我望一望對面,見到有間星巴克(利申,真係咁啱有間!),我就話不如過去坐低飲杯嘢,壯壯膽先,佢地都唔反對!


三條友坐低,嗰兩條友即刻卿卿我我,當我死嘅,完全無諗下我嘅感受,又話陪我見證,依家望都唔望下,算,唔同你計,於是我就問花仔 


「飲乜吖,我去買!」 




「是旦啦,我地求其一杯得㗎喇!」花仔雙眼目不斜視咁望住 Heidi 


「咁飲凍砒霜啦,啱晒痴男怨女啊!」我細細聲咁話 


「咩話?」花仔忽然借咗順風耳! 


「無嘢,凍杏霜吖嘛,你繼續啦!」我忟忟地咁話 


「???」 




買完咖啡坐响度,個心仍然跳得好利害,無諗個 Priscilla 屋企咁有錢,我之前份人工得果二皮幾,依家仲要失業,你估我真係聖鬥士星矢,為咗雅典娜無懼勇闖十二宫呀。 


花仔條痴男見我木無表情,知道唔妥就問 


「點啊,想縮沙呀?」 


「 唉 …… 未入白羊宮,啲氣勢已經輸晒!」 我有啲垂頭喪氣 


「兄弟,下定決心就唔好驚咁多喇,最多咪中佢父母兩招 <鑽石星麈拳>,你想食人個女,冷言冷語就在所難免,又唔駛死嘅,去馬啦!」 花仔雙手搭住我膊頭,就講 




「呢啲我明,我只係怕害咗 Priscilla 啫!」 我慢慢抬頭咁話 


「咪諗咁多啦,第一步都未攪掂,諗咁多托咩!」 花仔加大力度 


「好,死就死!」我一啖啜晒成杯咖啡(嘩 ~ 好很凍!),跟住就向十二宫進發!