《印度 · 尋油 · 台灣妹》: 《三十六》

開門係一位五十零歲嘅女士，見佢衣著樸素，應該唔會係天蠍座米羅，Heidi 隨即叫佢一聲 


「你好，英姐！」 


「王小姐，找小姐嗎？」英姐微微笑咁話 


「對呀！她起了床沒有？」Heidi 隨即就問 




「小姐她一早轉了衣服，出了門！」英姐就話 


我地聽到之後，你眼望我眼，玩咩啊？雅典娜失咗踪，有無咁好彩，買合彩又唔見中。 


「英姐，妳知不知道她去那兒？」Heidi 緊張地問 




「小姐沒有說，我見她背着一個大包包，一個行李箱子，我猜她去旅行吧！」英姐諗咗一諗就話 


「去旅行 …… ？」我地三人同一時間講 


「啊啊啊，英姐，杜小姐是不是帶著一頂紅色的帽子？」忽然花仔問咗一個好奇怪嘅問題 




「唔 …… 對對對，是紅色的帽子！」英姐好肯定咁講 


紅色 ..... 帽？紅色帽！！ 


「花仔，你唔好話比我知，响機場話熟口熟面嗰個係 …… Priscilla！」我語帶埋怨咁話 


「 …… 」花仔望住我眼定定，無出聲 


我嘆一嘆氣，搖一搖頭，有冇咁邪啊，一個向左走，一個向右走，玩夠喇喎，考驗呢家嘢，一次起兩次止，三次就佛都有火。 




雖然個心滿腔憤怒，但都無謂浪費時間，攞出手機打番香港（上次瀨完嘢，即刻申請番個漫遊！） 


「喂，媽子，有冇個女仔搵過我或者嚟過？」 


「無呀，咁 …… 如果有個講國語嘅女仔搵我，即刻打比我，係呀，有咩番嚟先講啦，拜拜！」我帶點失望咁收線 


Heidi 知道無 Priscilla 消息，就直接打電話比 Priscilla，可惜電話未能接通。既然咩消息都無，Heidi 就叫我同花仔响門口等等，佢同英姐入 Priscilla 房睇下。 


依家嘅環境就好似喺產房門口等消息一樣，呼呼呼 ～ 過咗一陣，Heidi 行番出嚟，手上多咗張紙仔，上面寫住幾隻字 




"九 龍 旺 角"


「九龍旺角？」 


旺角，一個旅客必到嘅景點，只要你諗到啲乜，呢處都幾乎可以搵到，呢個地方話大唔大，話細唔細，但係人口密度就超高，條條街都人山人海，酒店加賓館無一百，都有幾十間，要搵一個人，真係唔係咁易。 


只係得簡單四個字，同大海撈針無乜分別，企响門口都唔係辦法，我地決定離開十二宮，响對面商場搵個地方傾下 （無去星X克喇！）。 


今次 Priscilla 神神秘秘去香港，目的都好明顯，就係去搵我（除非唔係），佢對愛情呢份勇氣，真係令我從心中佩服起上嚟，但係一個女仔人生路不熟，好容易發生意外，所以必須盡快搵到佢。 




不過講就易，搵就難，正常嘅情況下，我地估計 Priscilla 應該住酒店，而唔揀賓館，响我心目中，旺角只係得朗豪酒店同帝京酒店，但係上網搵完，原來仲有七間 


逸豪酒店 

京港酒店 

地王酒店 

仕德福酒店 

旺角維景酒店 

東方泛達國際酒店 



豪東酒店新天地酒店 


即係有可能要去晒九間酒店，先搵到 Priscilla 下落，如果再不幸啲，咁就無法估計！ 


於是我叫 Heidi 寫低 Priscilla 個啲資料比我， 


" 杜愷情 ~ Du Kai Qing Priscilla~ 23 歲 "


除此之外，其他一概空白，咁少資料，真係連金田七十一都攪唔掂。 


傾到呢度，望下錶，原來已經十二點，要打握時間，我決定即時返回機場，盡快番香港，雖然花仔極力要求陪我番去，但係我又點可以咁自私，拆散呢對痴男怨女，加上花仔留喺台灣，有咩消息都可以即時通知我。 


同花仔、Heidi 道別之後，飛快去到機場，想快啲番香港？得，只要比得起錢，攪埋手續，話咁快就可以坐二點機返港。 


上機前，我已經搵晒九間酒店地址同電話，過零鐘機程，足夠我計劃一陣點樣行動，為咗令呢次行動更加完整，我決定為佢起咗個名，叫 


《杜如風》