睇完封信,強忍嘅眼淚終於流下,我望住濕透嘅信紙,全身不停咁顫抖,無呼天搶地嘅喊聲,我只係轉過身,垂下頭,大概 Samantha 估到發生咩事,慢慢遞上紙巾,就話 


「嗰位小姐走咗半個鐘左右,試下追吖!」 


「唔該妳,Samantha」講完之後,抹抹淚水,就搭落地下。 


上到的士,我攞出電話,嘗試打比 Priscilla,好可惜,手上仍然係嗰部無電嘅電話,望住呢部該死嘅垃圾,真係火都嚟 




「你呢部垃圾,我係咪得罪你啊,點解每次有急事要用你嗰陣,永遠都無電嘅?點解?點解呀?」 


司機大佬可能比我啲怨氣嚇一嚇,就話 


「先生,電話無電啫,唔駛咁激動呀?」 




「激動?就係因為無電,攪到我鍾意嘅人搵我唔到,依家佢要飛喇!!」 


「咁慘呀,嗱,攞去叉住先,希望幫到你啦!」司機大佬隨即遞個 "尿袋" 比我! 


「唔該你啊,司機大佬!」搭的遇貴人,火速插落部電話度。 




過咗陣,一開,得4%,嘗試打比 Priscilla,唔知點解未能接通,望一望,電話顯示有好多訊息同留言,但係無電,只好晏啲先攪,依家可以做嘅,就係send 個訊息比花仔,叫佢用盡辦法聯絡 Priscilla,我依家趕去緊機場,再聯絡! 


關番電話,希望叉得幾多得幾多,車已經去到東涌,我再次望住封信,開始埋怨自己,點解尋晚我唔落車?如果我跑過去,成件事可能就唔會變成依家咁,如果 …… 


但世事邊有得如果吖,嚟緊係最後機會,神啊,咩考驗都夠喇,請你比一次機會我啦!


我真係好想知道,究竟係我樣衰定命苦?其實我間中都有買旗,幫下人,星期二、四、六,都有捐錢比馬會,做下善事,我又唔多講粗口,又無架子,做朋友簡直一流,但係點解愛情路上咁多波折? 


尋日玩咗半日酒店,輪到今日玩機場,同樣搵一個人,同樣咁高難度,樓上離境,樓下入境,唔知咩航班時間,唔知咩航空公司,唔知點搵! 




落車,開番電話,30% 電量,二點四十二分,睇見花仔回覆,話仲係聯絡唔到 Priscilla,既然無晒辦法,唯有靠運,但係淨係靠運氣,我實輸緊,點好,點算好啊? 


如果唔盡快搵,Priscilla 入咗閘,咁就玩完,不過,成個機場咁大,仲慘過玩捉迷藏,有咩辦法! 


包皮環境,為咗見 Priscilla,就算可能犯法,都要搏一搏,我即時跑去機場嘅顧客服務中心,個樣有咁慘時得咁慘,個小姐見我情色慌張,就問 


「先生,有咩可以幫到你?」 


「小姐,我唔見咗未婚妻吖,佢係台灣人,有罕見嘅《先天性神經突發無定向哮喘病》,一個字「麻煩」,但係佢啲藥响晒我度,佢一個女仔人生路不熟,一緊張就會病發,我好擔心佢,妳可唔可以幫下我?」我講到有咁誇張得咁誇張 




「先生,咁大件事,我同你去搵警察幫手吖!」個小姐聽到唔見咗人,就話 


「小姐,我頭先已經搵咗警察,佢地都幫我搵緊,妳可唔可以幫我廣播一下,我求求你吖,我好擔心我未婚妻啊!」搵警察?咪瀨嘢,我即刻轉移話題 


個小姐十五十六,仲未下到主意,既然係咁,唯有再去盡啲,一哭二鬧博上吊,我即時咪埋雙眼,個口好似食咗屎咁,擘到大一大,跟住一嘢搣落大脾度,啲眼淚就跌就跌咁款,「嘭」一聲,跪咗响地,就話


「小姐,我求下妳快啲啦,我真係無晒辦法啊!」呢句係真心話,無講大話 


「先生,你起身先,我幫你向上頭問下,你等一等!」個小姐見我咁慘就話 




「唔 …… 該晒妳啊,小姐」 


隨即個小姐就打電話比佢上頭,我合埋眼,揸實拳頭等結果。 


隔咗一陣,個小姐收線,就同我講 


「先生, 我上頭話救人要緊,麻煩你比你未婚妻啲資料我,我即時為你廣播!」 


「小姐,真係唔該晒妳,我未婚妻叫杜愷情 Priscilla To,我叫 Da Vinci,麻煩你用英文同國語吖,佢唔識聽廣東話㗎!」我聽到後,立即講 




「先生,你叫 Da ..... Vin..ci..?」個小姐望一望我,忽然有啲猶豫 


「係啊,我未婚妻係咁叫我㗎,哈 .. 哈」我有小小尷尬咁答 


「咁 ... 你响度等等!」個小姐再望一望我,就轉身行開 


Yes! Yes! 咁都搏到,我真係天才啊!可以做嘅都做晒,依家真係睇彩數喇!