《天堂之上 - Upon The Heaven》: 第十六集: 堅持
時間過了一個月，阿偉在這個月內對太陽能飛機進行了大大小小的測試，終於成功將電池安裝在飛機上面，接下來的任務就是測試電池提供的電力是否足夠應付飛機起飛的動力。
「我哋宜家試下測試下電池嘅電力有幾多。」阿偉說。
阿偉將電路駁通，開始慢慢啟動引擎。只是，過了兩分鐘，螺旋槳已經開始慢下來，飛機仍然絲毫未動，這次的啟動禮似乎失敗收場。
「宜家呢個程度唔可以應付到飛機嘅飛行電力喎…」阿偉憂心的說。
午飯時間，阿偉又到了阿賜的餐廳食飯，希望找阿賜聊天，因為與他相處或者可以協助到自己，解決甚麼困難，至少看見他的笑臉，心情也會好點。
「阿肚，我哋喺呢邊呀！」阿偉招手呼喚著阿賜。
「喂，阿偉，你好耐都冇落嚟喇喎。」阿賜說。
「呢排掛住測試我哋嘅飛機嘛，係咪咁都嬲先？」阿偉搭著阿賜的肩膀。
「點呀，科學家，進度如何呀？」阿賜問。
「結構基本上冇問題，但係仲差最後一步，我哋嘅太陽能板所提供嘅電力唔足夠飛機所需要嘅電力，所以宜家仲頭痕緊…」阿偉將事實告訴了阿賜。
「睇你個樣就知真係幾難搞喎，咁樣呀……」阿賜想想。「呀，我介紹一個人你識，佢應該可以幫到你。」阿賜將一張卡片交給阿偉。
「恭晴斯？我識佢呀，呢份工都係佢介紹俾我架。」阿偉驚訝的說。
「原來你哋一早已經識架喇，咁真係有緣喇！」阿賜笑著說。
「仲有，嗱，呢個係我嘅新發明，燕窩桂花糕，拎啲返去俾屋企人試下！」阿賜拿出一個盒子。
「多謝你呀！」阿偉終於笑了。「係喎，你原來係國王嘅御用大廚，我喺國王派對先知咋，做咩咁耐都唔同我講呀？」阿偉記起了阿賜的身份。
「國王嘅廚師同埋呢間餐廳嘅老闆對於我嚟講都係一樣嘅，我從來都唔太在意呢啲身份，我最希望嘅就係我嘅客人食完我煮嘅嘢之後都可以開開心心，快快樂樂。」阿賜說著。「上次我知道你有機會參加國王嘅派對先同你賣個關子啫，咁個派對上面啲嘢食水準如何呀？我有冇失手？」
「簡直係我呢一生人食過最好嘅一餐，不過我個朋友阿澄先係最大嬴家，佢最鍾意就係食嘢！」阿偉回應。
「阿澄？哦，佢成日都會嚟我另外一間餐廳食嘢架，就喺佢學校附近嗰度。」阿賜回想起阿澄吃飯的樣子。「仲要叫我教佢一招半式廚神秘技添！」
「佢真係一個傻妹……」阿偉想起派對當日的阿澄。
「好喇，我要返研究室喇，再見喇肥叔叔！」阿偉說。
「肯定又係阿澄教你架啦……」阿賜在遠處說。
聽了阿賜的說話後，阿偉便約見了阿斯，打算跟他討論飛機動力的問題，可是，阿斯非常忙碌，阿偉約了他三次，阿斯才有時間見阿偉。到了約定的日子，阿偉來到了阿斯的辦公室。
「你係…阿偉？我有冇記錯。」阿斯看著窗外問道。
「係呀，我係阿偉呀，我今次嚟係想…」阿偉急不及待的想開始講解他的問題。
「坐低先，唔使咁心急。」阿斯說。「我今日已經做曬所有嘅工作，你有咩問題可以慢慢講。」
「咁就好喇…」阿偉鬆了一口氣。
「我就想……」阿偉將問題完整地，一字不落的對阿斯說了一遍。
「哦，你想我幫你解決電力問題，係唔係？」阿斯問。「之但係咁樣唔啱規矩喎…」
「點解呀，你話有咩問題可以搵你架。」阿偉說。
「呢個係國王嘅規定，呢次嘅比賽係國王舉辦既，佢希望參賽者用自己嘅實力創作，所以…我唔可以幫你！」阿斯決絕的說。
「咁如果我用燃料呢，加上燃料嘅輔助或者可以達到要求呢？」阿偉問。
「第一，呢個比賽要求創新，用燃料咪破壞咗呢個意思囉；第二，燃料喺我哋晴空之城好珍貴嘅資源，唔係咁輕易俾你擅自取用。」阿斯答。
「吓，咁點算呀，你幫下我啦，我好慘架…」阿偉裝作可憐的樣子。
「唔得呀。」阿斯望著窗外的風景說。
「唔通我嘅夢想就咁樣要喺呢度放棄，都行到呢一步…我唔想就咁樣放棄…」阿偉裝作哭泣。
「嗱…我只可以同你講，只要你堅持你嘅信念同埋夢想，總會有一日成功嘅。呢個比賽唔係淨係對參賽者實力嘅試驗，更多嘅係試驗佢哋對自己嘅夢想有幾咁堅持，只要你堅持夢想，或者會有奇蹟發生。我要講嘅係咁多，你返去慢慢諗下…」阿斯好像語帶雙關的說。
於是，阿偉便回到研究所繼續嘗試不同的方法，但都未能成功。直到再過了一個月，比賽的前一天，阿偉仍然未解決問題，他失望地回到家中，放下了他的背包，又再躺到莊園的草地上。
「咦，你今日咁快返嚟嘅，學校唔使你留堂咩？」阿偉取笑著阿澄。
「我呢啲咁聰明嘅學生點會留堂喎！」阿澄說著。
阿澄到莊園望望，看見阿偉閉著眼睛躺在草地上。
「你又瞓喺草地度，實係有嘢煩啦…」阿澄躺到阿偉身旁。
「你又知？」阿偉問。
「你次次一有嘢諗就會瞓喺度，望住星星，阻住我同波比玩！」阿澄笑說。
「聽日就係比賽喇，我諗我唔會成功架喇，架太陽能飛機根本唔夠電，飛唔起。」阿偉語帶失落地說。
「點解呀，你之前唔係好有信心架咩，做咩咁快打定輸數呀？」阿澄失望的問。
「我之前係好有信心，我以為自己好叻，咩都搞得掂，但係宜家事實證明唔係囉，我根本冇用，咩都解決唔到…」阿偉意志消沉的說。
「唔緊要啦，比賽嚟啫，輸咗咪輸咗囉，冇咩大不了嘅，最緊要係你盡咗力啦！至少你教識咗我哋咩叫做太陽能呀！」阿澄鼓勵著阿偉。
「唔係呀，我唔係為咗個比賽而失望…我係想研究一架可以帶我返香港嘅飛機，我想見我父母，我想見我朋友，我…我真係好掛住…好掛住佢哋…」阿偉眼泛淚光的說。
「咩話，你要走？你…講笑咋係唔係…？」阿澄失望地說。
「我講真架，我真係好掛住佢哋…」阿偉堅定的說。
「既然你咁掛住佢地嘅話，你就更加唔可以放棄，如果唔係你呢一世都唔會見到佢哋架喇！」阿澄說。
「我知，但係我真係唔知可以有咩方法…」阿偉說。
「只要你堅持落去，總有一日你嘅夢想會實現架，可能有奇蹟出現呢！晴空之城呢度每日都會有奇蹟，可能聽日就降臨到你身上呢！」阿澄笑著說。
「你講啲嘢咁似我個朋友嘅…邊個教你架？」阿偉問。
「前半部分係爸爸教我，後半部分…係…我睇電視學架。」阿澄天真的回答。
「無論如何都唔可以放棄，知唔知？」阿澄站起來說。
「好，死就死啦，聽日有嗰句講嗰句，咩都唔使怕嘅！」阿偉也站起來。
比賽當天，阿偉帶著他飛不起的飛機，到了比賽場地。場內有許多其他的參賽者。他們的作品大小不一，有的只像手指般小，有的比阿偉的飛機還要大。因為展示作品前需要先就作品說幾句，為觀眾介紹一下，於是阿偉與隊員商量一下，待會該說些甚麼，阿偉記著阿斯跟阿澄說的話，心裡面只記掛著他的夢想。
比賽進行得非常順利，各參賽者都成功展示了自己的作品，最後該輪到阿偉的組別，阿偉到台上發表演說。
「國王、女王、各位觀眾，大家好，我叫做陳迪偉。本來頭先我同組員傾過一陣上台應該講啲咩，我哋有準備到稿，但係對唔住呀咁多位組員，我想臨時講下第二啲嘢。」阿偉注視著組員，組員們都很期待阿偉的說話，可能知道這架飛機是很難獲獎的，不如讓阿偉說些心底話。
「唔知大家有冇試過同自己好愛嘅人分離，自己或者伴侶、父母、親人去咗一個好遙遠嘅地方，好耐好耐都見唔到大家，唔知對方宜家做緊咩。好似我咁，每晚淨係可以對住星空，望住星星將佢哋當係父母，同佢哋傾計…有時想喊，都唔知喊嚟有咩用，想同人講，又唔知同邊個講，自己又冇能力去搵佢哋，身邊又冇人可以幫到你，只好有咩事都收埋喺心入面。我哋之所以設計呢架飛機，就係想就算冇人幫助你，冇燃料，冇電力，冇能量嘅時候，你都可以憑住自己嘅力量，憑住一絲絲嘅陽光，慢慢咁樣向住父母嘅方向飛過去。就算路途好漫長，你都唔會怕，因為你知道，終有一日你會同父母相聚。只要有呢一份信念，無論宜家身處何方，喺父母心入面，你已經係佢哋最成功嘅仔女。雖然我哋今次嘅作品未能成功起飛，但係我哋相信，只要我哋唔放棄，總會有辦法令佢成功起飛，因為呢個係我一直以嚟嘅夢想，我嘅夢想我一定會堅持到底。今日，我哋唔會係呢度試行我哋嘅飛機，請大家見諒。」阿偉深情地說。
阿偉說完，便下了台，與組員們向來賓介紹自己的作品。雖然作品未能起飛，但太陽能新科技仍然吸引不少人前來觀看，而且電視台也有直播這次的盛會。天冰和澄媽會見到，阿斯和肥叔叔會聽到，阿澄會明白到，還有城中每個角落的人，也會知道。