恐怖蔓延令你一讀一驚心《攝魂偽術家》18+ 墮落始源: 第88章 - 死亡陷阱

丁佑男今天負責駕車接送唐龍離開住宅，在車內的唐龍一臉憂戚，像身體患上重病的模樣。
「佑男，被你推薦成為白紙扇個位到底係邊個？點解咁生面口？我嚮社團咁耐從來未曾見過佢。」唐龍說。
「唐生，新任白紙扇係由阿嫂親自揀，我對佢唔熟。係咪有問題？」丁佑男在駕駛座說，同時在倒後鏡中留意到唐龍面上表現出痛苦的神情。「唐生，須唔須要送你去醫院？」
「唔駛，你先車我返屋企休息。」唐龍咳了數下，然後以疲倦的聲線竭力說下去：「成個興展堂我最信得過只有你，我盤生意都係諗住等你接手。我覺得個條風水佬好有問題，你幫我起佢底，唔好俾PAULINE知道。」
「明白。」

在唐龍大宅內，程淑雯與新任白紙扇在睡房內進行陰陽交合大法，正當互相短兵相接，呻吟聲浪此起彼落之際，冷不防唐龍已悄然進入屋中，並且站在睡房門外窺探一二。
「老鬼，我已經幫你殺多個人，將條屍斬件後，就可以用來做拼圖中間個身，只要再收集齊其他兩隻腳，你個仔就可以醒返。」程淑雯一邊呻吟一邊說。
「等妳落手隊冧唐龍後，我地就會多一隻腳用。」男人說。
「唐龍條老野一早被我落咗降頭，計落應該就快埋單啦，但係丁佑男當唐龍係佢老竇咁服侍，我諗佢唔會落到手親自切佢條屍，唔........呀！呀！」程淑雯說話時進入了高潮狀態。




「乜妳唔知我依個替身係做殯儀館嗎？我可以隨時打開棺材切佢隻腳出來，就好似殺死隻雞咁容易。」

站在門外的唐龍接連按了幾下手提電話的按鈕後，便想拔足逃跑，可惜當他接近大宅門口時，終於不支倒地，在他昏迷前見到的，竟是赤裸著身體並且擺出一副狂妄傲慢，不可一世表情的程淑雯。

三日後的晚上，何定邦在指定時間抵達百老匯電影中心看戲。 招卓行亦於電影開場前不約而同抵達。
「RICKY，根據尋日醫院線報，話唐龍係嚮屋企猝死。你收到咩料？」何定邦說。
「非常古怪，新任阿嫂決定唔搞任何葬禮，話會自己留嚮殯儀館守夜，然後將唐龍速速火葬。」招卓行說。
「知唔知興展堂依家邊個揸旗？」
「表面上係丁佑男，但實際上係程淑雯。我已經查出係佢殺唐龍同搵人嚮你架車度放炸彈，我過兩日就會收到一段片做證據，但線人同時要求我地提供保護。」
「冇問題。咁我地約翻嚮坪洲交收，到時你用快艇接走線人，我會安排一間安全屋俾佢暫住。」




「明白。話時話，我收到料何SIR你計劃結婚，幾時註冊呀？雖然我來唔到，但都恭喜你。」
「結婚計劃暫時要擱置，因為女友個妹患上末期癌症，香港暫時未有方法醫治，如果去美國求醫費用又會係天文數字。」
「唉，真係天意弄人。」

二人於電影播放完畢後離開。在漆黑的戲院中，有一人正尾隨監視二人，那人是阿賓。