恐怖蔓延令你一讀一驚心《攝魂偽術家》18+ 墮落始源: 第112章 - 回歸

我與定邦心知情況不妙，立即向堂官詢問究竟。
「我唔知咁多野，只係醫院負責人指明出殯當晚要點播依隻歌。」堂官說。
「點解醫院會承辦喪禮？乜唔係一向都係由家屬出面搞咩？」我問。
「詳細係點我唔知，可能醫院見佢冇家屬承辦人。」堂官思考一輪後說。
「既然冇任何家屬，負責人點會識得邀請死者同事？況且邀請名單入面又點解會加入埋我地兩個？」定邦加入問道。
「對唔住，我真係咩都唔知，你地都係去問返醫院啦。」堂官露出尷尬表情，然後一臉無奈地說。

最終定邦向殯儀館當值人員取得醫院聯絡人資料後，我們便離開殯儀館。由於我內心依然忐忑不安，恐怕自己會遭遇甚麼不測，定邦見狀立即建議去醫院了解情況。原本查案應該是警方的責任，但由於我放心不下的緣故，在公在私，我與定邦決定一併進行這次調查。根據指示，醫院聯絡人為QE內一名高級醫生，商量過後，定邦駕車接載我抵達醫院。

「請問林醫生嚮度嗎？」定邦跟伊利沙伯醫院羈留病房的當值醫生查問。




「請問你係佢邊位？」當值醫生滿臉狐疑地問，定邦於是向對方展示自己的委任證。
「林醫生冇返工超過一個禮拜，由於打電話又聯絡唔到佢同佢家人，我地正諗緊要唔要報警處理......」當值醫生神情凝重地說道。
「失蹤？聽起來咁就奇怪。請問你知唔知林醫生有冇為一個早前離世病人嚮世界殯儀館代辦喪禮？」定邦繼續問下去。
「你講個病人係咪姓賈個位？佢入院個陣已經係一個植物人，林醫生根本唔認識病人，所以冇可能為佢搞咩喪禮，況且.......」
「況且乜野？」
「況且醫院最近發生好多怪事，有兩名護士自殺，又有護士辭職，人手緊張再加上不安工作氣氛籠罩底下，我唔相信林醫生會咁得閒同病人安排喪禮。」
「有兩名護士自殺？請問係咩原因？」定邦托了一下眼鏡。
「我唔清楚，阿SIR你大可以問下啱啱辭職個位護士，佢同自殺個兩名護士好熟，亦都係最後見過林醫生嘅人，不過佢始終唔肯同我地提起林醫生。」