[軍豪視角]

我由蒲崗村道一直踩單車去到沙田坳道,再轉去東頭邨方向,途中都有一啲喪屍見到我,不過街上面依然都係一片死寂。

忽然有一隻喪屍跳出嚟,我估計佢應該係啱啱變冇耐,膚色未完全變到喪屍咁,特別生猛,佢撲向我,我轉身回避,一腳撐開佢,然後掹刀仔出嚟先斬咗佢手掌,然後由佢下巴捅上去。基本上佢咁樣就死咗。

突然間喺衙前圍村附近嚟左一群人,望住我捅死佢

「喂!前面踩單車個靚仔,你喺邊度嚟㗎?發生咩事?」為首嘅一個青年男人大聲問





「我喺蒲崗村道嗰邊落嚟,你好,頭先佢衝出黎襲擊我,於是我就解決佢。」我心諗,扮吓Kai子先

「你哋上面死剩幾多人,點解會選擇落嚟?」嗰個男人繼續問

「一百幾十個啦,想出嚟闖下搵多啲資源。」我

「如果你有啲咩花樣或者小動作,我即刻開槍打爆你個頭。」佢掹咗支槍出嚟

仆乖,竟然佢有槍





「大佬你想點啊?」我

「我見你一表人才,我想帶你返去見吓我哋嘅話事人啫!話說在下孔日月,人稱臥龍。」嗰個男人

嘩頂!孔明,臥龍,真係出師表咩大佬?當然我冇講出口啦

「可唔可以講吓你哋嘅幸存區嘅架構?」我

「嘩靚仔咁快想套料?」孔日月「跟我返去山寨先講啦!我介紹我三哥俾你識」





於是我就跟住佢哋踩單車去咗大概係以前嘅賈炳達道附近嘅單車公園

咁順攤嘅,佢哋係咪低能㗎?

「講!你究竟係咩人?你過嚟做乜嘢?」嗰個比佢哋叫做三哥嘅中年男人帶頭用槍指住我個頭

都估到唔會咁順攤㗎啦,今次真係英雄本色

「有事慢慢講,我最憎人攞支槍指住我個頭!」我

「唔好扮Mark哥啦!」三哥

「你就係三哥?苗僑偉?」我繼續扮低能仔

「唔好同我搞爛gag,講,你嚟呢度有咩目的?」三哥





「我要生存,我要資源,聽人講九龍城附近有九龍寨,我覺得我可以有一番作為。」我

「我都幾滿意呢個解釋。畢竟人喺呢個世界都係為咗生存而努力,明仔你點睇?」三哥

笑死,原來唔係得我咁諗,日月=明

「咁我簡單同佢講下我哋嘅勢力分布。」孔日月

「首先,我哋叫做九龍寨,係由三哥同我同埋另外七個兄弟一齊創建嘅,我排行第七,開初我哋都冇乜嘢,但係合久必分,自從大哥意外走咗之後基本上我哋就面和心不和。」孔日月

「估唔到我一入嚟你就咁信任我。」我

「唔好自作多情,我講咁多嘢都係因為呢啲嘢係所有喺度嘅人都知嘅,本身我哋將成個九龍城區劃分左九個勢力範圍,自從大哥死咗之後,佢嘅領土就慢慢俾人瓜分左,同時我哋八個亦都分黨分派,今日俾你殺死嗰個就係老六。我哋而家得返七個人」孔日月繼續講





「點解你可以咁冷血無情見到佢死都冇反應?你唔會嬲我?」我

突然間孔日月扯高件衫,只見心口附近有一條四五吋長嘅疤痕

「呢一刀,係老六劈我㗎,由佢劈我一刀開始我已經當冇咗呢個兄弟!所以佢係生係死都唔關我事,況且佢已經變咗做喪屍」

「簡單啲講,即係話你哋而家有內訌,同時你哋都需要招兵買馬所以帶我返嚟?」我

「睇唔出你都幾醒目!」三哥終於出聲
已有 0 人追稿