命轉乾坤: 1.點解我咁唔好彩
余立信一面抽煙一面看著手機上的股票報價系統，內心就不禁暗罵道：
「頂！次次都係咁，沽完隻股票就係咁升。」
他嘆了一口氣，呼出的煙圈彷彿滲出陣陣埋怨，早前以高價購入此股票後價位不久就回落，他死守了一個月也沒有明顯起色便在昨天忍痛止蝕。豈料今天股價瞬間上揚至新高，如他在今天才沽出就算扣減手續費也有不俗的利潤。
他繼續查看其他股票資料，呆了很久才發現用膳時間只剩下五分鐘，身為銀行營業員的他是必須在繁忙時間前回到分行。所以他急忙奔跑回去希望不會遲到。
距離分行只餘下一條馬路之隔，可是交通燈卻在這時轉換成紅色，余立信被迫停在一旁等侯，此刻他內心焦急如焚，不斷拍打燈柱的行人警示器。
「每次趕親時間都係咁，盞紅燈幾時至轉呀．．．」
他內心不斷咒罵，埋怨，咒罵，埋怨，但紅燈還是紅燈。
余立信又抽起一支煙，他看見了有隻小鳥倒卧在馬路旁邊的明渠上掙扎，似乎是翅膀受了傷以致無法飛行。
綠燈終於亮起，余立信如箭般直奔回分行。
可是，鳥兒哀傷的眼神和悲傷的鳴叫竟在余立信揮之不去。
為甚麼？
XXX XXX
幸好今天沒有太多顧客，余立信遲了一點回到銀行也沒有人知道，他不久就得知同事Michael正在忙碌地準備文件，看樣子就是有生意了。
他立即走在大堂八卦一下，已經看到同事們正七嘴八舌地討論。
「佢又簽單啦？」身旁的同事阿MARK 道。
「我知道個客一入門口衝上黎就問有冇d儲蓄計劃睇，咁啱Michael係大堂咪俾佢撈到，真係好彩。」服務大使jenny道。
余立信心想，如果他不是這個時段出外用膳這客人很有可能是由他處理，現在只慨嘆自己運氣不好。
Michael這時有如一個勝利者般走出來大堂：「做咩全部人企曬係度？ 」
「你就好啦，連續三日有單開啦。」阿MARK 有點酸意地道。
「我都係好彩啫，頭先個客個戶口有成百個，我兩分鐘就叫佢做左張單年供廿萬。」Michael嘴裏說著自己好彩，但都不經意炫耀自己的能力。
「都係你勁啫，冇返咁上下skill就叫唔到佢做野，記住refer寫返係我呀。」Jenny這時都不忘拍拍馬屁。
余立信聽著聽著不是味兒，他早前拼命地銷售了一個儲蓄計劃，但後來因為顧客兒子入院而擱置，但這刻Michael卻不費吹灰之力就成功，兩人的經過簡直是天淵之別。
可是所有事情都只是看結果，沒有人會看過程。
「原來你地係大堂到傾計，唔怪得我搵到人問野啦。」剛入職不久的Anna氣急敗壞地上前。
余立信看見了Anna的眼神充滿焦慮，肯定是因為遇到問題不懂解答，而客人就在面前要求你立即解決。
「有個客問點解轉賬唔到錢出去其他戶口，我已經查過所有系統都搵唔到原因，究竟係邊到出左問題？」
眾人聽到問題後只是沉默迴避她，很明顯他們是不懂回答。
「呢個問題你打上hotline問下咪得囉。」MARK的回答很明顯是隨便敷衍了事。
「Hotline 打左好耐都冇人聽，而且個客係我面前我點可能打上去問。」 Anna已經急得快要哭出來。
看見Anna有如一個遇溺者般但眾人卻見死不救，余立信冷冷一笑想著：
Anna，你知唔知佢地根本就唔識係度耍緊妳。
余立信不喜歡在別人面前炫耀自己的知識，他向Anna道：「Anna，不如我同妳過去睇下咩事。」
Anna如獲救般立即拉著余立信的手到自己的位子，余立信看見客人已經一臉怒容，他先向客人道歉並馬上解釋Anna是新入職的同事，然後和Anna到
back office細看這客人的戶口紀錄，在電腦翻查了不一會兒便道：「好簡單，戶口係有人set左個轉賬limit。你睇下佢每天轉賬銀碼都唔超過10萬，今次轉兩萬美金咪轉唔到囉。」
「你真係犀利，咁快就知道答案，我之前問其他人ｄ野都整好耐至攪掂，真係唔該晒。」
「唔好咁講，你有咩唔明唔知既咪問我囉，不過Michael至係你mentor，有事最好問左佢先。」
「其實佢真係冇咩教過我，我問佢問題既時侯佢總係講埋Ｄ無謂野。」
「算啦，你都係返埋位做野先，我去隔一隔D客容易既就俾你做，難攪既我同阿KIM吞左佢。」
ANNA這時焦急恐懼全數消除向著余立信甜甜一笑，令余立信不禁有點虛榮，他很喜歡幫助別人，每次替同事解決問題後他都很滿足。
開心背後卻產生了一個問題，這麼多年來自己幫助了不少人，但有誰會記得他的能力，正如anna般所說我是否比其餘的同事能幹？
但我所受的待遇卻比他們差。
為甚麼？
之後余立信回到自己位子工作，分行這時忙得不可開交，連喝杯水上厠所也沒有時間，不經不覺就過了三小時,好不容易才能喘口氣。
「唔知點解今日咁忙，成四點幾都仲咁多客。」余立信和同事kim抱怨道。
「唔係客多，係做野既同事太少。全間分行得我同你同Anna見客，Anna係新既，見個客都起碼問四五次野，咁其實咪得我同你做。」kim極之不滿地道。
「咁其他人去哂邊？」
「咪係哂經理房打機囉，班契弟真係唔駛做。」
余立信怒氣沖沖地衝向房間，就看見了MARK, Michael同客戶經理Jimmy在玩手提電話。
「出面好多客喎，可唔可以幫下手出去清下客先呀。」余立信已經極力壓抑自己的怒火。
「有你同阿kim夠殺啦，駛乜我地D small potato 出手。」MARK 繼續一面把玩遊戲一面道。
「你地好似出緊糧喎，唔好係度楂流攤。」余立信面容已經轉變得非常難看。
「嘩，你D語氣咁似經理既，乜你升左連我呢個RM都唔知既。」Jimmy明顯話中有刺。
「一陣間我要見客，依家同緊佢地研究點做生意，出面D野你地做咪得囉。」Michael一臉不耐煩地道。
「見咩客要咁多人一齊傾呀，Michael你一個都勝任有餘。」
「冇，一陣我要見上次幫我做成球保險既鄭先生，今次諗住同jimmy夾下買基金，數目唔係好多，兩億左右啦。」
「我知道你有個大客跟緊，不過都唔洗呢埋係度．．．乜D基金資料同鬥地主有關咩？」
「我點知道佢幾時黎，一陣我出去做野鄭生黎左冇人招呼就唔好啦。」
這時分行經理許先生大力打開房門咆哮：「喂！成堆人係道做咩？出面冧曬檔喎。CHRIS你仲有心情吹水？單你又冇，客你又唔見，你想點？」
「就係出面咁多客我咪諗住叫佢地出去幫下手囉。我做左幾個鐘都冇停過，想叫ｄ同事幫下手啫。」
「你不如顧下Anna先啦，佢乜都唔識你仲掉低佢自生自滅，你係咪想睇住佢死。」
「ANNA既MENTOR係Michael,依家佢係度打機喎。」余立信覺得十分無辜。
「做人有時又唔駛分得咁清楚，唔好咁自私啦，嗱嗱聲出去跟客，你地都係一樣，即刻出去！」許先生運用分行經理的威嚴馬上趕走他們。
之後余立信當然向KIM大吐苦水。
「沒用呀，依家Michael咁多單佢大哂，要鬧就剩係會鬧我地。」KIM也很明白余立信的無奈，他更清楚箇中內情：「Michael個客本身係工商部REFER過黎開戶口，佢就呃人地係大陸人屈左佢做左張大既保單，仲介紹俾JIMMY做幾千萬基金，之前Michael射左兩張單俾MARK之後，MARK就好似隻狗咁做左佢跟班。」
「唔怪得佢地依家咁FRIEND啦，但我覺得個客都好戇居啫，為左開個戶口咁就俾人LOCK左成百個。」
「戇咩居，呢D咁既客根本開個戶口用黎洗黑錢之嘛，佢好彩BUSINESS個MANAGER係佢舅父，成日射D大客俾佢。」
余立信心想，自己為何這麼辛苦做這麼多事卻毫無收獲，相反Michael只是好運有親戚照顧就順暢無阻，究竟是甚麼道理？難道無運氣無家底就只好永遠被踐踏？
命運如一個永不停轉的巨輪把光陰輾碎殆盡，余立信雖然工作算是爽利勤快，但仍然要加班至七時才能離開公司，便匆匆忙忙乘車到旺角。
原來他約了女朋友靜婷看戲，距離八點還有一點空檔便在繁榮的西洋菜街踱步，靜婷不斷埋怨最近這星期余立信太忙以致兩人都沒法見面。
「我就黎唔記得你係咩樣。」靜婷嬌嗔地道，她攬著余立信的手更加緊扣。
「冇咁誇張呀？我每晚都有同你傾視像電話。」余立信不太集中聽靜婷的話，他左顧右盼身旁的街頭表演。
「視像點及真人呢？我問你點賠償俾我？」靜婷繼續地輕聲叫嚷。
余立信內心覺得有點煩厭，靜婷沒錯是個好女孩但是不夠細心，有很多地方都沒法為自己分憂，如果她能察覺自己的煩惱就不會這樣子囉嗦。
西洋菜街是一條非常煩囂的地方，到處都是人群，迎面而來的女子漂亮得好像明星般，在經過時留下一股花香的氣味，她身旁的男友彷彿帶著炫耀的笑容走過。
如果我有個這麼漂亮的女子當情人就好了。
但說句老實話，像靜婷這種清純的女孩子是可遇不可求，她不嫌棄自己貧窮，又不苛求自己給予她舒適生活，像剛剛迎面而來的女孩雖然比靜婷吸引得多，但相處下去呢？我可以駕馭這種女子嗎？
「喂，我同你講緊野，你冇心裝載！」靜婷用力鬆開了余立信的手。
「我有聽到，有聽到，你話點樣補償俾你嘛，得得得。」余立信指著前面那隊正在表演的樂隊：「我去搶了他們的結他唱歌比你聽。」
然後靜婷就拉著作狀上前的余立信手臂：「哎呀，人地只係想你多Ｄ時間陪我之嘛。」
「你知道我可以去唱歌，仲唱得好過佢地。」余立信突然一臉認真道。
「知道啦，走啦，夠鐘入場睇戲啦。」靜婷半推半拉地強行嚷著他走，之後她又再聽著余立信訴說自己如何放棄理想為家人賺錢。
散場後時間已經接近十點，余立信送別了靜婷回家便衝衝乘車往返自己的居所。在車上，他默默地想著未來之事，已經不下數萬次，但問題仍是如冤鬼般纏身，幾年後自己於是一個怎樣的人呢？以現在的薪水來說想結婚置業簡直是天荒夜談。想轉工嗎？外面的競爭這麼激烈，自己年紀和學歷都比不上海外留學的年輕後輩，過多一段日子自己的銷售成績不理想可能成為一個冗員。
我最終都會被這世界淘汰嗎．．．余立信腦海浮現出一幅幅悲慘的畫面。
然後，他竟看見中午受傷倒在地上的小鳥．．．
我明白為何自己會這麼記得牠．．．我本來就像牠一樣．．．翅膀受傷無法飛翔．．．等待死亡的來臨。
苦惱，悲傷，失落，嘆氣又陪伴著他一起回家。
抬頭仰望月明星稀的夜空，他埋怨著上天為何對他如此不公平。
如果我不是需要賺錢養家，我可能已是一個知名歌手。
如果我有百萬現金，我可能已經能投資股票獲利幾十倍。
如果我有個學位，可能已經升上經理之位。
如果．．．
「如果？如果？你唔係咁多如果依家就唔會冇左條命。」
余立信聽到一把孩童的聲音在耳邊。
他東張西望。
他看見了左邊。
一輛時速達六十公里的輕鐵向著余立信迎面衝至，只需要一秒鐘，余立信的身軀便會被輾得血肉模糊。
不可能有任何反應！！
在死前一剎那，他腦海一片空白，在他生命發生的所有事情都會終結，靜婷，工作，音樂，家庭，一切一切都如虛幻般變成碎片，倘若他的神經還能反應的話，他一定後悔，後悔在生命的盡頭前的一刻他卻用來埋怨。
人生卻是沒有如果，也沒有第二次機會。
但在千鈞一髮間，輕鐵停止了輾過余立信的動作，正確是時間如違反了物理規則靜止了，空氣中的塵埃、水珠都硬生生停留在半空。
余立信目定口呆地不能反應，因為一切都不能解釋。
「你好，初次見面，我叫．．．係人類知識上係無任何名稱稱呼我。」
余立信看見了一個身穿白色西裝的少年，一張秀氣的稚臉配上英俊的濃眉，彷彿某個紅透半邊天的超級巨星。
「你．．．你係邊個，點解會咁？」
那白衣少年看見了余立信的驚慌臉不禁莞爾一笑：「你問我？你知唔知你剛才應該俾輕鐵撞死？」
余立信臉容頓時青白一遍，雖然是一剎那間，但他也清楚剛才那輕鐵是朝他駛向，照道理自己真的應被輾過。
「咁你．．．係咩人．．．唔通係死神？」
「死神？呢個名又幾好聽，幾有型。好啦，我就叫死神。」那少年一臉俏皮道。
余立信面對這個結局實在沒法回應，他只能帶著懊悔的表情道：「我．．．我真係死左．．．咁後生就死左。」
死神沒有理會余立信的反應繼續道：「其實我係由天界黎既，至於能夠同你相遇過係因為「上帝之失誤」，不過我諗你唔需要亦唔會明白。」
「上帝之失誤，係咪代表我唔駛死，我可以重新活過來。」
「你錯啦。世界所有事物都冇第二次機會。」死神微笑得非常和善：「我話過我係代表天界黎既。」
「你黎做咩，拯救我？」余立信面露喜色。
「你係咪曾經好似好有原因咁有鬧過天，總係覺得自己好有道理，其實個天每日都唔知俾幾多兆生物鬧，我地習慣左啦。」
「咁，個天會不會俾多次機會我．．．我發誓以後唔話個天，以後每日都祈禱。」
死神繼續自說自話：「你呢，就鬧得特別有型，真係無時無刻都係度怨天怨地，有時仲係幫人鬧。喂！你成日問如果。好啦我問返你轉頭。如果個天真係俾你要乜有乜，你係咪就唔鬧個天先？」
「咁．．．如果我可以達成自己心目中想要嘅野，我錫啖個天都黎唔切啦．．．」
「好，就咁決定！由明天開始你就可以要乜有乜，好似一個成語咁，叫隨心所欲。」
「吓，有冇咁犀利？一定有咩附帶資料，你係咪魔鬼黎呀？你係咪要我出賣個靈魂，或者殺人呀變妖怪咁，我唔要變個D咩惡魔傀儡。」
「你唔好咁白痴呀，係你地D人類攪到個世界咁複雜。好簡單既比喻，你想升職既就升職，你想結婚既就結婚，一切都如你所願，但你記住一樣野，升職係需要學歷同埋表現，如你所願既意思係你能夠掌握一切，運氣，際遇籠罩著你全身，你將會脫胎換骨。」
「真係一切如我所願，唔需要付出代價？」余立信懷疑地道。
「你究竟係聽唔明我講野定係你蠢，你想成為一個當紅既結他手，咁苦練結他咪係代價囉，之後你出去街度彈，有人賞識你，幫你出碟之後你咪紅囉，咁你咪得償所願呀。」
說到這裏余立信再蠢都明白，但他仍然懷疑道：「點解我咁好彩，冇可能喎，我唔明點解個天要幫我，就係因為我鬧個天？仲有你，你頭先講既野我明白，但我唔相信。」
「我數三聲，你接受定係唔接受，一．．．二．．．」死神沒好氣地道。
「我接受！」余立信的反應直接不過，他不知道這個簡單的答覆將會對自己的命運產生巨變。