是咁的，照顧過我嘅護士死咗: 四十、臭三八

灰煙噴向林林塊面，林林咳咗兩聲。

「咳咳！你唔整熄佢丫嘛？好！阿正，打電話！」

「我打咗架喇，警衛過緊嚟。」

個阿叔開始有啲怯，但我見到佢額頭爆出青筋。

我推開阿連。





「喂你想死呀？」

「你繼續做視而不見嗰班人啦，仲衰過沉默大多數呀！」

我講完即刻以我嘅最高速兀兀下咁走入人群之中。

個阿叔掉咗支煙落地。

「哼，臭三八！」





原本以為件事就咁告一段落，點知個阿叔突然舉手就想打落林林度。