是咁的，照顧過我嘅護士死咗: 四十二、阿連出手

「唔好呀！」林林喺我背後大叫。

跟住落嚟一切好似慢鏡咁，大陸鐵拳兜口兜面衝埋嚟，沙煲咁大個拳頭佔據我嘅視線。

人群露出驚恐嘅表情。

拳頭正要打中我鼻樑。

拳頭偏離原本嘅軌跡。





大陸阿叔成個人側向一邊，啪咚一聲跌咗落地。

「邊個比你打我兄弟呀！？」

阿連推開咗個阿叔，之後走上前又揼又踢咁，估唔到佢狠起上嚟都真係幾狠。

食蕉好快嚟到，就將阿叔趕走。

原來阿叔只係嚟探病，佢唔係病人，唔怪得咁惡啦。





林林急急腳行去我面前：「你⋯⋯你係咪痴咗呀？我比佢濕一搥有幾閒？你比佢中一拳即刻死架！」

林林想幫我檢查，佢雖然好心急想知我有無事，但都好輕力咁幫我檢查。

而接觸我皮膚同肌肉嘅手，我感覺到，仲喺度震緊。